KUAN-KUANEN 20
20
1Inemen keras erbahanca kalak kurang ajar ras ngguntari
kalak bodoh kap adi minem seh mabuk.
2Ola legi rawa raja, sabap rawana desken sora singa si erdengum.
Mbiarlah man bana maka kam la cilaka.
3Kerina kalak lenge mesikel ia rubat,
perbahanen si terpuji e me nilahken perubaten.
4Perjuma-juma si malas la idahikenna dahin tupung paksana,
e maka tupung peranin kai pe la lit ulih jumana.
5Perukuren jelma bali kap ras lau i bas telagah si mbages,
tapi kalak si lit perukurenna ngasup njaruksa.
6Nterem kalak ngataken ia setia,
tapi kalak si tuhu-tuhu setia mesera njumpaisa.
7Untung kap anak si erbapaken kalak bujur,
dingen si ndalanken perbahanen si bujur.
8Tupung raja ngadili, iperiksana kerina,
dingen idahna tep-tep kejahaten.
9Lit kin kalak si pang ngerana,
“Enggo bersih perukurenku, aku enggo bebas i bas dosa nari?”
10Timbangen dingen sukat-sukat si la bujur,
la ngena ate TUHAN.
11Sekalak anak icidahkenna ise ia, arah perbahanenna,
arah kai si ibahanna ieteh kap mehuli ntah lang biakna.
12Pinggel guna megiken, mata guna ngenen,
duana e TUHAN kap si njadikenca.
13Adi dekahen kam medem, musil me kam,
kalak mejingkat cukup me nakanna.
14Mehergasa iakap sinukur barang si itukurna,
tapi kenca enggo jadi, iagahkenna kap barang si itukurna.
15Ranan si isina pemeteh,
ergan kap e asangken emas ntah mutiara.
16Ise si nggit njamini utang kalak si la itandaina,
buatlah ertana jadi jaminen padanna e.
17Kai si iidatndu alu nipu, tangtangna e entebu nanamna,
tapi dungna seri nanamna ras kersik.
18Ope denga erbahan sada keputusen, pindolah lebe pedah,
ola lebe lawes erperang adi langa ibahanndu rencana.
19Percekurak ndigan pe la tersimpanca rahasia,
sirangilah kalak si petca ngerana.
20Adi isumpahindu nande bapandu bene me geluhndu,
desken lampu si nimpet i bas berngi si gelap.
21Reh murahna iakap kalak muat erta,
reh la ulina akibatna.
22Ola belasken kejahaten,
teklah man TUHAN, maka kam ibenarken.
23Timbangen dingen sukat-sukat si la bujur,
ciga ate TUHAN.
24Enggo itetapken TUHAN dalan kegeluhen manusia,
em sabapna lanai iangka manusia perdalanen geluhna.
25Ukurken lebe mbages-mbages ope denga erpadan mereken kahul man TUHAN,
banci jadi dungna erkadiola kam.
26Raja si pentar ietehna ise si erbahan salah,
iukumna kalak si bage alu la encidahken ate mekuah.
27Ibereken TUHAN man banta pusuh peraten,
gelah banci si tandai dirinta jine.
28Adi sekalak raja merentah alu bujur, adil dingen setia,
e maka tetap kuasana.
29Kehagan kalak nguda e me gegehna,
dingen pujin man kalak si metua erkiteken ubanna.
30Mawen-mawen pengalamen si pagit e pe lit gunana,
gelah kalak nggit ngobah cara geluhna.
Currently Selected:
KUAN-KUANEN 20: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
