OBAJA 1
1
1Enda me nubuat Obaja, e me kata si ibelasken TUHAN si Erdolat kerna bangsa Edom.
TUHAN ngukum Edom
TUHAN enggo nuruh suruh-suruhenna man bangsa-bangsa
janah kerina kita enggo megisa kai si ikatakenna,
“Ersikaplah! Ota kita erperang ras Edom!” #Jes 34:5-17; 63:1-6; Jer 49:7-22; Esek 25:12-14; 35:1-15; Amos 1:11-12; Mal 1:2-5
2Nina TUHAN man Edom,
“Kubahan maka kote kam
kerina kalak megombang man bandu.
3Ukurndu si meganjang enggo nebu-nebu kam.
Kutandu si erbentengken lingling batu,
rumahndu si meganjang i datas deleng-deleng;
nindu i bas ukurndu,
“Ise ngasup si pesusur Aku?”
4Aminna pe ibahanndu inganndu
seri ganjangna ras asar rajawali
aminna tempa-tempa i tengah bintang-bintang pe inganndu,
kupesusur nge kam.
5Tupung pinangko reh berngi-berngi,
kai ia perlu e ngenca ibuatna.
Tupung kalak pepulung buah anggur,
itadingkenna nge deba-deba.
Tapi imbang-imbangndu isapuna kam kerina.
6O, kesusuren Esau, barang-barangndu enggo irampas.
7Teman-temanndu enggo nipu kam,
enggo ipelawesna kam i bas negerindu nari.
Kalak si erteman ras kam enggo naluken kam.
Temanndu si sada perpangan enggo nidingi kam;
nina kerna kam, ‘I ja nge kebeluhenna ndube?’
8Tupung paksa Kuukum Edom.
Kukernepken me kalakna si erpengertin,
Kulesapken kalak si pentar.
9Si mbisa i Teman nari la banci lang nggirgir,
kerina tentera Edom la banci lang ibunuh.”
Sabapna maka Edom iukum
10“Perbahan isamun dingen ibunuhndu
seninandu kesusuren Jakup,
la banci lang kernep kam
janah ijuruken rasa lalap.
11Tedis kam i dauh-dauh nari, i bas wari e,
tupung pintu gerbang Jerusalem iruntuhken musuh,
seri kam jahatna ras kalak si la itandai,
e me ras kalak si ngangkut barang-barang Jerusalem,
dingen mbagi-mbagikenca sapih-sapih ia.
12Engkai maka erpesta kam,
erkiteken kiniseran si jadi man seninandu kalak Juda e?
Engkai maka meriah akapndu,
tupung Juda iruntuhken?
Engkai maka kam tawa
tupung ia i bas kepiceten?
13Engkai maka ibengketindu kuta bangsangKu,
ersenang-senang i bas kiniseranna,
janah muati kebayakenna,
tupung ia i bas kepiceten?
14Engkai maka kam tedis i simpang-simpang
nangkap ia si atena kiam?
Engkai maka iendeskenndu ia man imbang-imbangna
tupung ia i bas kepiceten?
Dibata ngukum bangsa-bangsa
15Enggo kap ndeher warina, Aku, TUHAN,
mereken ukumen man bangsa-bangsa.
O Edom kai si enggo ilakokenndu,
la banci lang ilakoken ka man bandu.
16BangsangKu enggo minem calung ukumen si pagit
i datas delengKu si badia.
Tapi kerina bangsa-bangsa i sekelewetna la banci lang minem
calung ukumen si terpagiten.
La banci lang kerina ia nginemsa jenari lesap.
Israel menang
17Tapi kalak si pulah nangkeng kap ku Deleng Sion,
janah deleng e jadi ingan si badia.
Kesusuren Jakup la banci lang ndatken bagin,
i bas taneh kalak si ndube ngerebut tanehna.
18Kesusuren Jakup ras Jusup desken api si gurlah,
desken api si enciluki pinugun nggala;
icilukna me kerina kesusuren Esau,
janah sekalak pe la banci pulah ibahanna.
Aku TUHAN kap si enggo melasken kata enda.
19Bangsa i Selatan Juda nari la banci lang engkuasai Edom,
kalak si arah Barat ture-ture deleng nari la banci lang naluken kalak Pilisti.
Eperaim ras Samaria la banci la man Israel,
kalak Benyamin ibuatna me Gileat.
20Tentera si ibuang i Utara Israel nari
la banci la mulih pelawes kalak Punikia, terus ku Utara Sarpat.
Kalak Jerusalem si ibuang ku Sardis
italukenna me kuta-kuta i Utara Juda.
21Kalak Jerusalem si permenang
iserangna janah ikuasaina me Edom.
Dingen TUHAN jine me si jadi Rajana.”
Currently Selected:
OBAJA 1: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
