NEHEMIA 8

Esra ngogeken Undang-undang man bangsa Israel

1Kenca enggo seh bulan si pepituken kerina kalak Israel enggo ringan i bas kuta pengulihenna. I bas wari si pemena bulan e, kerina ia pulung i Jerusalem, i tengah kesain deherken Gerbang Lau. Ipindo kalak ndai man Esra, e me sekalak imam dingen ahli Undang-undang si ibereken TUHAN man Israel arah Musa, gelah i buatna kitap Undang-undang e. 2E maka ibaba Esra kitap e ku perpulungen ndai, i ja enggo pulung subuk dilaki, diberu, bage pe danak-danak si enggo ngasup ngantusisa. 3Alu ngala kempak jelma si pulung i bas kesain deherken Gerbang Lau e, iogeken Esra Undang-undang ndai mulai matawari pultak nari seh ciger, janah kerinana megikenca alu tutus.

4Esra tedis i das sada mimbar si enggo ibahan guna keperlun si e. Kalak si tedis arah kemuhenna e me: Matitia, Sema, Anaya, Uria, Hilkia ras Maaseya; janah si tedis arah kawesna e me: Pedaya, Misael, Malkiya, Hasum, Hasbaddana, Sakaria ras Mesullam.

5Sanga Esra tedis i das mimbar kerina kalak ngidahsa sabap ganjangen ia asang kerina kalak ndai. Kenca italangina kitap e, minter kalak ndai tedis kerina. 6Nina Esra, “Pujilah TUHAN, Dibata si Mbelin!”

Kerina kalak ndai ngangkat tanna janahna ngaloi, “Amin! Amin!” Jenari nembah erjimpuh ia kerina, ayona seh ku taneh.

7Kenca bage keke ia kerina, tedis ia i bas inganna sekalak-sekalak, janah kalak Lewi si tersena i jenda nerangken Undang-undang e man bana, e me: Jesua, Bani, Serebia, Jamin, Akkub, Sabbetai, Hodia, Maaseya, Kelita, Asaria, Josabat, Hanan ras Pelia. 8Langsung iterjemahken kalak ndai Undang-undang Dibata e, jenari iterangkenna seh maka kerina kalak ndai ngangkasa.

9Kenca ibegi kalak ndai kai si ikataken i bas Undang-undang e, tangis ia kerina. E maka Nehemia gubernur tupung si e, ras Esra sekalak imam dingen ahli Undang-undang, bage pe kalak Lewi si nerangken Undang-undang e, ngataken man bana kerina nina, “Wari enda e me sada wari si badia man TUHAN Dibatandu. E maka ola kam tangis ntah pe erceda ate. 10Genduari mulihlah ku rumah janah man-manlah kam. Rasken panganndu ras anggurndu ras kalak si kekurangen. Sendah e me wari si badia man TUHANta, e maka ola ceda atendu. Keriahen si ibereken TUHAN man bandu erbahanca kam megegeh.”

11Kalak Lewi niar-niar lako pesinik jelma si nterem janah ngatakenca gelah ola erceda ate i bas wari si bage badiana. 12E maka kerina ia mulih ku rumah jenari man ras minem alu meriah ukur janah iraskenna sikerajangenna ras kalak si deban, sabap angkana kai si enggo iogeken man bana.

Wari Raya Sapo-sapo

13Papagina, kepala-kepala terpuk, rikut ras imam-imam ras kalak Lewi, lawes njumpai Esra guna mpelajari pengajaren Undang-undang e. 14Datca maka Undang-undang si ibereken TUHAN arah Musa, merentahken bangsa Israel gelah tading i bas Sapo-sapo kidekah Wari Raya Sapo-sapo i bas bulan si pepituken. #Im 23:33-36,39-43; Ul 16:13-15 15E maka ibereken kalak ndai perentah-perentah si tersurat arah teruh enda, jenari ikiremkenna ku belang kuta Jerusalem ras kuta-kuta si deban bage pe ku kuta-kuta. Perentah e, e me: “Laweslah ku uruk-uruk jenari buatlah dahan-dahan tusam, dahan saitun, dahan mirt, bulung kurma, ras dahan kayu si deban si gupgup, lako mahan Sapo-sapo sue ras perentah si tersurat i bas Undang-undang.”

16E maka ibuat kalak ndai dahan-dahan jenari ibahanna Sapo-sapo i datas tarum rumahna, i kesain rumahna, i kesain Rumah Pertoton ras i taneh lapang deherken Gerbang Lau ras Gerbang Eperaim. 17Kerina kalak si enggo mulih i bas pembuangen e nari erbahan Sapo-sapo jenari ringan i bas. Enda me si pemenana kal ibahan kenca Josua anak Nun nai mate. E maka seh akapna riahna. 18Mulai i bas wari si pemena nari seh ku wari pendungi Wari Raya e, tep-tep wari ioge kalak ndai sada bagin i bas Undang-undang Dibata. Pitu wari dekahna kalak ndai ngerayakenca, janah i bas wari si pewaluhken ibahan acara pendungi, sue ras si iperentahken Undang-undang.

Currently Selected:

NEHEMIA 8: BTX

Highlight

Copy

Compare