JOSUA 13
13
Daerah-daerah si man buaten denga
1Josua enggo metua kal genduari. Ikataken TUHAN man bana, nina, “Kam enggo metua kal, tapi mbelang denga taneh si man buaten. 2Kerina daerah Pilisti ras Gesur, 3bage pe kerina daerah Apim kempak Selatan. (Taneh si i bas Lau Sihor nari, i perbalengen Mesir, seh ku Utara ku perbalengen Ekron ianggap taneh kalak Kanaan; raja-raja kalak Pilisti ringan i Gasa, Asdot, Askelon, Gat, ras Ekron.) 4Negeri kalak Kanaan pe lit denga, ras Meara (sikerajangen kalak Sidon), seh ku Apek, i perbalengen kalak Amori; 5taneh kalak Gebal; kerina daerah Libanon kempak Timur, i Baalgat nari, e me si arah Selatan Deleng Hermon, ku dalan Hamat. 6Enda subuk kerina daerah kalak Sidon, si ringan i deleng-deleng kelang-kelang Deleng Libanon ras Misrepot Maim. Kupelawes ateKu bangsa-bangsa enda asum bangsa-bangsa e iserang bangsa Israel. Arus ibagi-bagikenndu taneh e sapih-sapih kalak Israel, bagi si enggo Kupedahken man bandu gelah ilakokenndu. #Bil 33:54 7Dage genduari, bagikenlah taneh e man si siwah suku nari ras setengah suku Manase, jadi sikerajangenna.”
Pembagin daerah si arah Timur Lau Jordan
8Suku Ruben ras Gat ras setengah i bas suku Manase enggo ngaloken taneh si ibereken Musa, suruh-suruhen TUHAN, man bana; taneh e arah Timur Lau Jordan. #Bil 32:33; Ul 3:12 9Daerahna seh ku Aroer (i tepi Baluren Arnon) ras kuta si i tengah baluren subuk pe taneh kendit i Medeba nari seh ku Dibon. 10Taneh e seh ku perbalengen Amon ras bengket kerina kuta-kuta si nai iperentah Sihon raja kalak Amori, si ringan i Hesbon. 11I je bengket Gileat, daerah Gesur ras Maaka, kerina Deleng Hermon, ras kerina taneh Basan seh ku Saleka. 12I je bengket kerajan Raja Og, si perpudina i bas kalak Repaim, si erkuasa i Astarot ras Edrei. Musa enggo naluken bangsa-bangsa enda jenari ipelawesna ndarat. 13Amin bage gia, kalak Gesur ras Maaka la ipelawes bangsa Israel; ia tetap denga ringan i Israel.
14Man suku Lewi la lit ibereken Musa taneh, sue ras si enggo ipedahken TUHAN man Musa. Kalak Lewi arus ngaloken sikerajangenna sada bagin i bas persembahen si itutung i babo batar-batar man TUHAN Dibata Israel. #Ul 18:1
Daerah si ibereken man suku Ruben
15Musa enggo mereken sada bagin taneh e man keluarga-keluarga i bas suku Ruben jadi sikerajangenna. 16Daerahna seh ku Aroer (i tepi Baluren Arnon) ras kuta si i tengah baluren e, subuk kendit-kendit i sekelewet Medeba. 17I je bengket Hesbon ras kerina kuta-kuta i kendit-kendit e, e me kap: Dibon, Bamot Baal, Bet Baalmeon, 18Jahas, Kedemot, Mepaat, 19Kiriataim, Sipma, Seretsahar si i das uruk-uruk i bas baluren e, 20Betpeor, reben-reben Deleng Pisga, ras Bet Jesimot. 21I je kerina kuta-kuta si lit i bas kendit-kendit ras kerina kerajan Sihon raja kalak Amori, si ringan i Hesbon. Italuken Musa ia, bage pe pengulu-pengulu Midian: Ewi, Rekem, Sur, Hur, ras Reba. Kerina pengulu enda lit i teruh kuasa Raja Sihon, janah kalak e erdahin nampati raja e. 22I bas kalak si ibunuh bangsa Israel e lit sekalak guru si beluh ngoge nasip, gelarna Bilham anak Beor. 23Lau Jordan baleng suku Ruben arah Barat. Enda me kuta-kuta ras kuta-kuta si ibereken man keluarga i bas suku Ruben jadi sikerajangenna.
Daerah si ibereken man suku Gat
24Man keluarga suku Gat pe enggo ibereken Musa sada bagin taneh e jadi sikerajangenna. 25Daerahna bengket Jaser ras kerina kuta-kuta Gileat, setengah taneh Amon seh ku Aroer, si arah Timur Raba; 26tanehna e mulai i Hesbon nari ku Ramat Mispa ras Betonim, i Mahanaim nari ku perbalengen Lodebar. 27I bas Baluren Lau Jordan si ku je e me Bet Haram, Betnimra, Sukot, ras Sapon, sisa kerajan Raja Sihon i Hesbon nari. Balengna arah Barat e me Lau Jordan seh ku Dano Galilea i Utara. 28Enda me kuta-kuta ras kuta-kuta si ibereken man keluarga suku Gat jadi sikerajangenna.
Daerah si ibereken man suku Manase si arah Timur Lau Jordan
29Musa enggo mereken sada bagin taneh e man setengah keluarga suku Manase jadi sikerajangenna. 30Daerahna seh ku Mahanaim janah bengket kerina daerah Basan, e me kerina kerajan Raja Og, raja Basan, bage pe enem puluhna kuta-kuta Jair i Basan. 31I je bengket setengah taneh Gileat, bage pe Astarot ras Edrei, duana kuta kerajan Raja Og i Basan. Kerina si enda ibereken man setengah keluarga kesusuren Mahir anak Manase.
32Bagenda me Musa magi-magiken taneh si arah Timur Jeriho ras Lau Jordan asum ia i Kendit Moap. 33Tapi man suku Lewi la lit iberekenna taneh. Ikatakenna man suku e kerina maka sikerajangenna e me sada bagin i bas persembahen man TUHAN Dibata Israel. #Bil 18:20; Ul 18:2
Currently Selected:
JOSUA 13: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
