JOP 6
6
Erjabap Jop nina,
1-2“Adi kesusahenku ras ceda ateku itimbang,
3beraten kap e asa kersik i bas lawit.
Dage ola kam sengget, adi meter gia pengeranangku.
4Anak panah Dibata si Mada Kuasa enggo lecep i bas dagingku,
janah racunna enggo niar ku pusuhku.
Kebiaren si mbelin i bas Dibata nari, isuruhNa ngepung aku.
5Puas iakap kelede adi lit dukut man gagatenna,
janah lembu pe la erboh adi sangana nggagat page.
6Tapi ise ngasup manca pangan si la ernanam, erkiteken la isirai?
Kailah nanamna bagin si mbentar i bas tinaruh?
7La ateku bage man pangan si bage,
janah kai si kupan mutah aku ibahanna.
8Engkai maka la ibereken Dibata pemindonku?
Engkai maka la ialoiNa pertotonku?
9Olanai min Dibata alang-alangen munuh aku!
10Adi kueteh nggit IA munuh aku,
landek-landek aku minter perban meriah kuakap,
aminna gia suina lanai teralang.
Kueteh maka Dibata badia kap;
la pernah kulawan perentahNa.
11Kai nari gegehku maka banci aku terus nggeluh?
Kai gunana nggeluh adi la lit pengarapenku?
12I bas batu nari kin aku ibahan?
Tembaga kin dagingku?
13Lanai lit gegehku guna ngkelini diringku,
kujapa pe lanai lit inganku mindo penampat.
14I bas kesusahen si bagenda, aku perlu teman setia,
enggo kulupaken Dibata ntah lang.
15Tapi kam, o teman-temanku,
kam desken lau belin si erbahanca kam tertipu,
desken alur lau belin si kerah adi la lit udan reh.
16Lau belin dem alu salju ras es,
17tapi lesap kena las wari,
alur lau belin nganga dingen kerah.
18Perlajang papak ndarami lau,
terjelpa-jelpa, jenari mate i gurun pasir.
19Perlajang i Syeba ras Tema nari terdaram-daram,
20tapi pengarapenna peltep i tepi lau belin si kerah.
21Kam bali ras lau belin e nandangi aku,
idahndu kiniseranku jenari isurutindu bandu perban mbiar kam.
22Pernah kin kupindo pemerendu?
Ntah kusuruh kam nogok kalak i bas gelarku?
23Ntah gelah ipulahindu aku i bas musuh nari?
Ntah gelah itebusindu aku i bas kuasa kalak si jahat nari?
24Ajari dage aku; turiken dage salah lepakku.
Banci aku sinik jenari kubegiken kam.
25Kata tuhu tentu erbahanca aku sadar;
tapi si sea-sea kap cakap si ibelaskenndu.
26Perban tumpat ukurku, bagi angin saja akapndu cakapku;
adi bage ngkai maka aku ijabapindu?
27Kam, anak melumang pe itikam-tandukkenndu,
temanndu si ndeherna pe idayakenndu!
28Tataplah ayongku;
labo aku nggit guak.
29Kusurlah ukurndu. Ngadiken erbahan si la bujur.
Ola ukumndu aku, sabap aku labo salah.
30Akapndu kin aku guak?
Akapndu kin la kueteh apai benar, apai salah?
Currently Selected:
JOP 6: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
