JOP 36
36
1-2Sabar kam lebe,
dengkehken kentisik nari saja.
3Pemetehku melala,
janah kupake ateku
lako encidahken maka bujur kap si Nepa aku.
4Kai si kukataken bandu la lit la tuhu,
janah tuhu-tuhu kal kalak pentar si tedis i lebe-lebendu.
5Dibata mbelin tuhu-tuhu! Kerina ietehNa.
Amin bage gia,
la ise pe iakapNa la terpake.
6Kalak jahat la ipelepasNa gedang umurna;
nandangi kalak mesera,
bujur perbahanNa.
7Kalak bujur ikawaliNa
ibahanNa erkuasa desken raja-raja,
janah ibereNa kalak bujur asa lalap ipehaga.
8Tapi adi kalak teriket alu rante,
ngenanami kiniseran erkiteken perbahanenna jine,
9arah kiniseranna e icidahken Dibata
dosa-dosa ras ganjang ukurna.
10Ipedengkehken Dibata bana pertenget,
gelah itadingkenna si jahat.
11Adi ikutken ras isembahna Dibata,
e maka dame ras senang me geluhna.
12Tapi adi la iikutkenna Dibata,
i bas kinimotun, mate me ia.
13Kalak si la erdibata lalap merawa,
janah aminna iukum Dibata pe ia,
la ia erlebuh man baNa.
14Mate ia paksa nguda denga,
kesahna peltep arah dalan si njuruken.
15Si tuhuna, Dibata ngajarken manusia arah kiniseranna,
janah ipake Dibata kesusahenna gelah medak matana.
16Dibata mulahi kam bas kiniseran nari;
ibereNa kam nggeluh alu senang;
panganndu melala,
kai pe la kurang.
17Tapi sue ras kejahatenndu,
iukumNa kam genduari.
18Metengetlah maka ola kam tertipu erkiteken sogok,
tah pe kebayaken mabai kam papak.
19Banci kin kebayakenndu nampati kam?
Kerina gegehndu pe la banci mulahi kam.
20Ola arapken kerehen berngi si gelap,
i ja bangsa-bangsa kerina masap.
21Metengetlah maka ola kam erkusur kempak kejahaten.
Sabap kiniserandu ibereken gelah itadingkenndu kejahaten.
22Ingetlah uga belinna kuasa Dibata;
i ja kin lit guru bagi IA beluhna?
23Ise ngasup ngajarken IA?
Ise pang nalahken perbahanen Dibata?
24IA tetap ipuji erkiteken perbahanenNa;
dage, kam pe pujilah IA.
25Kerina kalak enggo ngidah kai si ilakokenNa,
tapi la ise pe ngangkasa kerinana.
26Labo tersipati kita uga belinna kemulian Dibata,
janah tahun-tahunNa pe la terkira kita.
27Dibata kap si pepulung lau i doni nari ku das embun,
jenari isalihkenNa jadi taktak udan.
28IbereNa udan naktak i bas embun nari,
isiramkenNa ku manusia i doni.
29La ise pe metehsa uga perkimbangna embun,
dingen persora lenggur i langit i ja Dibata ringan.
30IkilapkenNa kilap si terang arah langit i das,
tapi tetap gelap i bas kelbung lawit si mbages.
31Bage me bangsa-bangsa ibereNa nakan,
janah isikapkenNa simpar pangan.
32ItangkapNa perkas salu tanNa,
jenari iperentahkenNa ndumpang si man dumpangenna.
33Sora lenggur meritaken kerehen Dibata,
si merangi kerina kejahaten manusia.
Currently Selected:
JOP 36: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
