JOP 34
34
1-2O, kam kerina si pentar ras erpemeteh,
dengkehken kai si kukataken.
3Adi icecap nge maka idat nanam pangan;
bage pe adi idengkehken nge maka ierti kata kepentaren.
4Marilah siorati kai si benar,
si tetapkenlah ras-ras apai si bujur.
5Enggo ikataken Jop maka la lit salahna,
tapi la adil perbahan Dibata man bana.
6Tole nina Jop, ‘Perguak ikatakenndu aku,
perban aku la erdosa ningku;
genduari enggo mekelek ibahan Dibata ugahku,
aminna pe la lit salahku.’
7Pernah kin idahndu jelma bagi Jop enda?
La erngadi-ngadi iuru-uruna Dibata.
8Kalak jahat ibahanna man temanna meriah,
janah ras kalak perdosa ia gawah-gawah.
9Ikataken Jop maka sitik pe labo lit untungna,
adi ipala-palai pe ngikutken sura-sura Dibata.
10O kam si lit pengertindu,
begikenlah!
Nggit kin Dibata si Mada Kuasa mahan si salah?
11Tentu lang;
tapi ibalasNa man manusia sue ras perbahanenna,
janah ilakokenNa man bana sue ras perlangkahna. #Msm 62:13
12Dibata si Mada Kuasa la nggit ngelakoken si jahat;
janah man ise pe la pernah la adil perbahanNa.
13Bas ise nari kin ialoken Dibata kuasaNa?
Ise kin ngendesken doni enda baNa?
14Adi ibuat Dibata mulihi kesah kegeluhen,
15tentu kerina manusia mate,
janah salih mulihi jadi abu.
16Genduari adi lit kin pengertinndu,
begikenlah katangku.
17Pang kam nalahken Dibata si Bujur ras Medolat e?
Akapndu kin ciga ateNa keadilen?
18Iukum Dibata raja-raja si la terpake,
bage pe penguasa-penguasa si ngelakoken kejahaten.
19La ikapitiNa penguasa-penguasa,
janah la akapNa ergan kalak bayak asa kalak si kekurangen,
sabap IA nge si njadiken kerina manusia.
20I tengah berngi, manusia banci rempet mate,
iukum Dibata ia,
e maka masap ia dingen bene,
janah murah saja nge akapNa munuhsa subuk kalak mbisa pe.
21IperdiatekenNa kerina langkah manusia,
idah Dibata kerina perdalanenna.
22La lit ingan si gelap,
aminna kugapa pe gelapna,
si banci man ingan cebuni kalak perdosa.
23La perlu itentuken Dibata paksana,
ndigan manusia reh iadiliNa.
24La perlu iselidikiNa leben,
guna mindahken si erkuasa janah nggantikenca alu kalak si deban.
25Sabap kai si ibahan penguasa e iteh Dibata kerina,
idabuhkenNa kuasana sanga berngi,
jenari iripukkenNa.
26Iukumna penguasa erkiteken kejahatenna,
janah kerina kalak banci ngidahsa.
27Sabap lanai iikutkenna Dibata,
janah la diatena kerina perentahNa.
28Kalak e me erbahanca si musil erlebuh man Dibata,
janah Dibata megi pernderkuhna.
29Adi sinik saja gia Dibata,
ise banci nalahisa?
Adi ibuniken Dibata ayoNa,
tentu manusia lanai ngasup ngkawali dirina.
30Di bage,
kai pe lanai banci ilakoken bangsa-bangsa,
gelah kalak si kejam si la erdibata ola jadi rajana.
31O Jop, enggo kin iakuindu dosandu man Dibata!
Enggo kin kam erpadan maka lanai iulihindu erbahan dosa?
32Enggo kin ipindondu gelah icidahken Dibata salahndu?
Enggo kam ngaku maka salahndu e lanai iulihi?
33Adi la akapndu payo perbahanen Dibata
banci kin iarapkenndu i bas IA nari atendu ngena?
Genduari, kamlah erbahan keputusan, labo aku;
kataken dage uga ukurndu.
34Kalak si lit pengertinna tentu payo akapna;
kalak pentar si megiken aku tentu ngatakenca,
35kai si ibelasken Jop labo iangkana,
janah kai si ikatakenna la lit ertina.
36Ukurilah mbages-mbages kai si ikatakenna,
tentu idahndu maka bagi kalak jahat pengeranana.
37Tambah-tambah ia erdosa,
Dibata pe ilawanna ka;
megombang ia man Dibata,
i lebe-lebenta kerina.
Currently Selected:
JOP 34: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
