JOP 3
3
Jop ngaduken kiniseranna man Dibata
1Kedungenna ngerana Jop, isumpahina wari tubuhna. Nina, #Jer 20:14-18
2-3“O Dibata, sumpahilah wari tubuhku;
sumpahilah berngi kejadinku.
4Salihkenlah wari e jadi gelap, o Dibata;
ndigan pe olanai inget wari e,
ndigan pe olanai pelepas terang ersinalsal ku je.
5Bahanlah wari e wari si geltem dingen gelap mesangat;
tutupilah e alu embun mekapal, dingen sasapken matawarina.
6Sasapkenlah berngi e;
olanai kira i bas wari-wari bulan tah tahun.
7Bahan berngi e berngi si melungen;
berngi i ja la lit keriahen.
8Suruh tukang sihir numpahi wari e,
kalak si beluh merentahken nipe naga.
9Ola pelepas bintang erpagi-pagi ersinalsal;
ola bere pengarapen kerna matawari pultak erpagi-pagi,
10erkiteken ipelepasna aku tubuh,
dingen ijemjemkenna aku kempak kesusahen ras ceda ate.
11Madin kuakap aku mate i bas bertin nandeku,
ntah mate tupung paksa aku tubuh.
12Engkai maka iampu nandeku aku?
Engkai maka ipepinemna aku?
13Adi mate aku tupung si e,
tentu senang-senang kuakap genduari,
14medem bagi raja-raja ras menteri-menteri,
si mulihi majekken istana-istana si adi.
15Jenari banci aku medem bagi anak raja-raja
si ndemi rumahna alu emas ras pirak;
16ntah pe medem bagi anak si mate tupung tubuhna.
17I bas kuburen, kalak jahat ngadi erbahan jahat,
dingen kalak si latih erdahin, ndatken pengadi-ngadin.
18Kalak tabanen pe ngenanami kedamen,
lanai isergangi, lanai iperentah alu kata mesergi.
19Kalak si kugapa pe lit i je, si terberita ras si la itandai;
budak-budak pe kedungenna bebas i je.
20Engkai maka manusia ipelepas nggeluh i bas kiniseran?
Engkai maka ibereken terang man kalak si sangana erceda ate?
21Itimaina kematen, tapi lalap la reh,
ulin akapna kuburen asangken erta si meherga. #Ket 9:6
22La atena malem adi langa ia mate, dingen ikuburken.
23Kai gunana manusia nggeluh, adi la terarapkenna wari si pepagi?
Adi ikarangken Dibata nge ia?
24Nakan pe la terpan tapi tangis ngandung aku,
ndehereng aku lanai terpengadi.
25Asa kai si kuaruken ras kubiari enggo tuhu jadi.
26La lit kedamen i bas aku, la lit kesenangen,
kesusahenku lalap la erkedungen.”
Currently Selected:
JOP 3: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
