JOP 24
24
1Engkai maka itetapken Dibata sada wari pengadilen,
maka kalak si nembah man baNa ndat keadilen?
2Lit kalak si miserken baleng,
gelah tanehna jadi mbelang.
Biri-biri kalak itangkona,
jenari itamakenna ku rarasen biri-birina.
3Kelede anak melumang ibabakenna,
lembu diberu balu-balu itagangina
seh tergalarisa utangna.
4Iambatina kalak musil ndatken sikerajangenna,
e maka la banci lang cebuni kalak si mesera geluhna.
5Dage kalak musil enggo bagi kelede kerangen,
si ndarami nakan i bas taneh mesawang kelegon,
sabap lanai lit inganna si deban,
ndatken nakan man anak-anakna si kelihen.
6Juma kalak si deban la banci lang iperanina,
janah buah anggur kalak jahat ipumahina.
7Gedang-gedang berngi medem ia la ruis,
mbergeh pe akapna cabinna la lit.
8Kerina dagingna litap erkiteken udan i deleng,
janah perban la lit inganna cio,
ipedegesna dagingna ku lingling.
9Iperkawanken kalak jahat anak melumang si kitik denga,
janah anak kalak musil ibuatna man penggalar utangna.
10Tapi kalak musil la banci lang lawes alu la lit uisna,
tupung rani gandum i juma-kalak,
melihe akapna.
11Itutuna buah saitun muat minakna,
ierikna buah anggur muat launa,
tapi ia jine kote perban muasna.
12I bas kuta-kuta ndehereng kalak si menam mate,
kalak si luka-luka pe nderkuh mindo penampat,
tapi pertotonNa la sitik pe diate Dibata.
13Lit kalak si erlawanen geluhna ras terang;
terang e la itandaina,
janah la ikutkenna dalan terang.
14Kalak pemunuh keke sanga wari gelap denga,
jenari luar ia munuh kalak musil ras si mesera;
adi berngi enggo seh ka,
bagi sekalak pinangko,
nuruk-nuruk ia.
15Nima-nima wari gelap,
lanai sabar perlua-lua,
gelah ola itandai kalak, itamburina ayona.
16Pinangko mbongkar rumah sanga berngi;
la atena ngena terang, e maka suari lawes ia cebuni.
17Ngidah matawari pultak erpagi-pagi,
mbiar ka ia,
tapi berngi si gelap si mejin,
ngena kal atena.”
Sopar pe ngerana ka nina,
18“Kalak jahat bene iombakken lau mbelin,
taneh si jadi baginna isumpahi Dibata;
peken anggurna enggo melungun,
buah anggurna lanai lit si ngeriksa.
19Bagi salju masap kena lego ras las matawari,
bage me kalak perdosa isasapken i bas doni kegeluhen nari.
20Bernga mangani dagingna,
nandena pe ngelupaken ia,
gelarna lanai lit si ngingetsa,
desken kayu mbulak,
ia ikernepken Dibata.
21Si e jadi sabap nandangi diberu balu-balu kejam ia,
janah diberu si la banci mupus,
rate mesui ibahanna.
22Alu kuasaNa, ibunuh Dibata kalak si mbisa,
keke Dibata ngelawan,
e maka bene pengarapen kalak si la mbiar baNa.
23Banci jadi ipelepas Dibata ia nggeluh senang,
tapi perbahanenna la erngadi-ngadi iperdiateken.
24Kentisik ngenca senang geluhna,
jenari seh rasa lalap bene ia;
ia melus desken dukut-dukut,
desken ruhi page si enggo ikeret.
25Ise pe ngatakenca maka tuhu katangku enda,
janah la lit sitik pe lepakna.”
Currently Selected:
JOP 24: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
