JOP 1
1
Jop iuji Iblis
1I negeri Us lit sekalak dilaki, Jop gelarna. Ia nembah janah erkemalangen man Dibata. Ia kalak si mehuli, janah la lit perbahanenna si jahat. 2Anakna pitu dilaki, telu diberu; 3biri-birina lit pitu ribu, untana telu ribu, lembuna seribu ras keledena lima ratus. Suruh-suruhenna pe seh kal teremna. E maka banci ikataken ia me si bayakna i Timur.
4Anak-anak Jop si dilaki semal erbahan pesta man-man alu ergiliren, janah anak-anakna si deban pe ikut reh ku pesta e. Turangna si telu pe tetap itenahkenna ikut pulung. 5Kenca tiap pesta enggo dung, lampas erpagi-pagi keke Jop, jenari ipersembahkenna persembahen tutungen guna pebadiaken anakna e sekalak-sekalak. Si e ilakokenna sabap rukur ia, banci jadi anakna e enggo erbahan dosa si la teridah, janah erkiteken si e ceda ukur Dibata alu la iarapna.
6Kenca enggo seh warina maka malekat-malekat ngadap TUHAN, Iblis pe ikut ras malekat-malekat e. #Kej 6:2 7Nungkun TUHAN man Iblis nina, “I ja nari kam ndai?”
Ngaloi Iblis, “Erdalan-dalan ku jah ku jenda niar-niar doni.”
8“Iperdiatekenndu nge suruh-suruhenKu Jop?” nina TUHAN nungkun. “La lit sekalak pe i babo doni si bagi ia patuhna ras ulina. Isembahna Aku janah la lit si jahat ilakokenna.”
9Nina Iblis njabapsa, “Nggit kin iakapNdu Jop nembah kam adi la ia rulih? #Ket 12:10 10Gelgel nari ikawaliNdu ia ras isi jabuna bage pe sikerajangenna kerina. Ipasu-pasuNdu kai si ilakokenna, janah iberekenNdu man bana mbue lembu seh dem negeri e. 11Tapi genduari, bicara ibuatNdu kerina si lit i bas ia, ugapa pe isumpahina Kam i adep-adepenNdu.”
12“Merandal,” nina TUHAN man Iblis, “kai si lit i bas ia, genduari i bas kuasandu. Tapi Jop la banci ikuitndu.” E maka lawes Iblis.
Anak-anak Jop ras kebayakenna ikernepken
13I bas sada wari, asum anak-anak Jop erpesta man-man i bas rumah seninana sintua, 14reh sekalak kiam-kiam maba berita man Jop. Nina man Jop, “Asum kami sangana nenggalaken lembu, kelede pe nggagat i bas mbalmbal i deherna, 15rempet reh kalak Seba, iserangna jenari irampasna kerinana. Ibunuhna kerina suruh-suruhenndu, aku ngenca pulah lako meritakenca man bandu.”
16Ope denga ia dung ngerana, enggo ka seh suruh-suruhen si deban nina, “Biri-biri ras permakanna enggo keri mate idumpang perkas. Aku ngenca pulah lako meritakenca man bandu.”
17Ope denga ia dung ngerana, reh ka suruh-suruhen si deban nina, “Kami iserang telu terpuk gerombolen kalak Kaldea. Unta-unta irampasna, janah kerina suruh-suruhenndu ibunuhna, aku ngenca pulah lako meritakenca bandu.”
18Ope denga ia dung ngerana, reh ka suruh-suruhen si deban nina, “Asum anak-anakndu man-man i rumah anakndu sintua, 19rempet rembus angin meter i gurun pasir nari. Runtuh rumah e iembusna, janah mate kerina anakndu ibahanna. Aku ngenca pulah lako meritakenca man bandu.”
20Kenca bage tedis Jop janah icaingkenna uisna perban cedana atena. Iguntingna buk takalna, kenca bage nembah erjimpuh ia, ayona seh ku taneh. 21Nina, “Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari enggo ka ibuatNa. Terpujilah gelarNa.”
22I bas kerina kejadin enda ndai Jop la erdosa, sabap la ia nggit nalahken Dibata.
Currently Selected:
JOP 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.