JEREMIA 48
48
Moap ikernepken
1Enda me kata TUHAN si Mada Kuasa, Dibata nu Israel kerna Moap,
“O andiko kalak Nebo,
enggo kernep kal kutandu.
Kiryataim enggo talu,
benteng-bentengna si enteguh enggo runtuh,
juru kal iakap kalak si ringan i je. #Jes 15:1–16:14; 25:10-12; Esek 25:8-11; Amos 2:1-3; Sep 2:8-11
2Kemulian Moap enggo bene,
Hesbon enggo italuken musuh,
erpekat kalak engkernepken Moap,
Kuta Madmen enggo melungun
enggo reh tentera nalukenca.
3Dengkehkenlah! Nderkuh kalak Horonaim.
Enggo kernep! Enggo meripuk!
4Moap enggo kernep,
dengkehken perserko danak-danak.
5Begiken danak-danak kesi-kesi;
gedang-gedang dalan ku Luhit:
sora tangis kalak si itindih,
gedang-gedang dalan ngincuah ku Horonaim.
6Nina kalak enda, ‘Kiamken, kelini, kelini kesahndu!
Kiamken bagi kelede kerangen si meliar!’
7O, Moap ernalem kam kempak gegeh dingen kebayakenndu,
tapi genduari irebut me kam.
Dewandu Kemos iangkut me ku pembuangen,
ikut ras pengulu-pengulu ras imam-imamna.
8La lit sada kuta pe pulah, kerina iradasken
subuk berneh-berneh entah taneh kendit.
Aku TUHAN kap si enggo melasken kata enda.
9Pajekken sada batu kubur man Moap,
nandangi ikernepken me ia.
Kuta-kutana jadi batu si ergun-gun,
lanai ise pe si tading i je.”
(10Cilakalah kalak si ndahiken dahin TUHAN alu ukur la si tutus. Cilakalah kalak si la nampul dingen munuh!)
Kuta-kuta Moap ikernepken
11Nina TUHAN, “Moap nai-nai nari tetap aman, la pernah iangkut tertaban. Moap desken lau anggur si teneng kap, la pernah iuseken ku guci si deban e maka la sambar-sambar bauna, nanamna pe tetap gelgel.
12E maka genduari enggo seh paksana Aku nuruh kalak nguseken Moap desken anggur. Ipelumena me guci anggur e, jenari idampeskenna maka meripuk. 13E maka erkadiola Moap kempak dewana Kemos, bali ras tupung Israel erkadiola kempak Betel dewa penalemenna.
14O kalak Moap, ngkai maka ikatakenndu kam pahlawan-pahlawan
tentera si mbisa pang iuji i bas perang?
15Moap ras kuta-kutana enggo kernep,
anak peranna si terpilih enggo igelehi.
Aku kap Raja, TUHAN si Mada Kuasa,
Aku kap si enggo melasken kata enda.
16Cilaka man Moap nandangi reh me,
keruntuhenna enggo ndeher.
17O kam kalak si ndeher rassa, tangisilah Moap,
o kam kerina si meteh kinibelinen gelarna.
Katakenlah: Kuasana enggo meripuk,
kemulian dingen gegehna lanai lit.
18O kam kalak si tading i Dibon,
nusurlah i bas inganndu si mehamat nari,
kundulkenlah i bas abu taneh.
Si engkernepken Moap enggo ndeher,
benteng-bentengna jadi runtuh.
19O kam si tading i Arur
tedislah kam nimai i tepi dalan
sungkuni kalak si kiam
sungkuni ia kerna kai si enggo jadi.
20Bagenda me jabapna, ‘Moap enggo guling,
tangisilah enggo mela kal iakapna.
Momokenlah i gedang-gedang Lau Arnon,
maka Moap enggo kernep!’
21Pengukumen enggo reh man kuta-kuta si lit i taneh kendit i deleng-deleng e me: Holon, Jahas, Mepat, 22Dibon, Nebo, Bet-Diblataim, 23Kiryataim, Betgamul, Betmeon, 24Keriot ras Besrah. Ukumen enggo reh ku kerina kuta-kuta Moap, subuk ndeher entah ndauh. 25Kuasa Moap enggo pecah, gegehna enggo bene. Aku TUHAN kap si enggo melasken kata enda.”
Moap ipeteruk
26Nina TUHAN, “Bahan maka mabuk Moap, erkiteken ia ngelawan Aku. Erguling-guling ia i bas utahna jine. Tawa kalak ngenehenca. 27O Moap ingetndu kang, uga kam nai nguru-nguru kalak Israel? Ngupir kam ngenenca tempa-tempa ia enggo itangkap gerombolen penamun.
28O kam kalak si tading i Moap, tadingkenlah kutandu! Laweslah dingen tadinglah i bas lingling batu. Jadilah bali ras nderapati si rasar i bas embang. 29Lanai kap tanggung megombangna Moap. Enggo Kubegi uga megombangna ia, sombong, beluh iakapna bana, seh kal iakapna ganjangna bana. 30Aku TUHAN, Kueteh kap uga ia gombangna. Rananna meganjang la erguna janah pengelakona la erpepah. 31E maka ngandung Aku erkiteken kerina kalak Moap, ras kerina kalak si tading i Kir Heres. 32Serko Aku guna Sibma lebihen asangken perserkongKu man kalak Jaser. O kuta Sibma, kam bali kap ras batang anggur si dahan-dahanna njoler ngepar Lawit Mati seh kempak Jaser. Tapi genduari enggo kernep kal kerina buahndu tupung paksa perlego. 33Kemalemen ate ras keriahen enggo ibuat negeri Moap si mehumur nari. Aku si erbahanca maka lau anggur lanai maler i bas pengeriken nari. Lanai lit kalak si ngerik anggur janah ersurak perban riahna.
34O kalak Hesbon ras Eleale, serkoken. Perserkona terbegi seh ku Jahas. Kalak si i Soar pe megisa, terus kempak Horonaim ras Eglat-Selisia. Lau anak Nimrim pe enggo kerah. 35Lanai Kubere kalak Moap mereken persembahen gelehen i bas ingan-inganna ersembah. Lanai ia Kubere nggeleh persembahen man gana-ganana. Aku TUHAN kap si enggo melasken kata enda.
36E maka ceda ateKu ngenen kalak Moap, ras man kalak Kir Heres, bali ras gogona ate kalak si erbahan lagu tangis-tangis alu ngembus surdam. Sabap kebayakenna enggo lesap kal kerina. 37Kerina ia enggo itakal-tabuken, janggutna enggo icukurna. Kerina ia enggo nggarusi tanna, dingen tep-tep kalak enggo make uis guni tanda ate ceda. 38Kerina ingan ngada-ngada i datas rumah kalak Moap, kerina tanah lapang ingan jelma si nterem la lit kalak la rate ceda. Sabap enggo Kudampesken Moap bali ras guci si lanai ipake kalak. 39Moap enggo getem! Tangisken! Enggo bene kemulian Moap. Enggo runtuh ia, kerina bangsa sekelewetna nguru-nguru ia. Aku TUHAN kap si enggo melasken kata enda.”
Lanai lit dalan pulah man Moap
40 TUHAN erpadan sada bangsa nangkis Moap desken rajawali engkimbangken kabengna. 41Kerina kuta ras benteng-bentengna italuken. I bas paksa e, tentera Moap gentar bali ras sekalak pernanden mupus. 42Ikernepken me Moap janah lanai ia jadi sada bangsa sabap brontak ia ngelawan aku. 43Kebiaren, lubang, siding itogeng man kalak Moap. TUHAN kap si ngerana enda. 44Kalak si kiam atena i bas kebiaren nari, ndabuh ia ku lubang. Kalak si atena ngelompati lubang kena siding ia. Sabap TUHAN enggo netapken sada paksa guna ngukum Moap.
45Pengongsi-pengongsi si lanai ergegeh icubakenna ndatken pengkawali i kuta Hesbon, kuta si pernah iperentah Raja Sihon, tapi kuta e enggo meseng. Api enggo engkernepken perdempaken ras takal kalak Moap si pet erperang e. 46Mekuah kal ate ngenen Moap. Kalak si nembah man Kemos enggo kernep. Anakna si dilaki ras diberu enggo iangkut tertaban.
47Tapi i bas wari-wari si reh ibahan TUHAN ka nge maka Moap makmur ka mulihi. Enda me kerina si ikataken TUHAN kerna Moap.
Currently Selected:
JEREMIA 48: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
