JEREMIA 20
20
Perjengilen Jeremia ras Pashur
1Imam Pashur anak Immer, e me kap kepala i bas Rumah Pertoton. Tupung ibegina aku ngerana kerna perkara-perkara si enda ndai kerina, 2isuruhna kalak ngeligasi aku, jenari ipasungkenna aku i deher Pintu Gerbang Benyamin si arah datas i bas Rumah Pertoton. 3Pepagina kenca aku enggo itangtangi Pashur i bas pasungen nari ningku man bana, “Lanai Pashur gelarndu ibahan TUHAN. Tapi genduari gelarndu isambari jadi Kebiaren Arah Apai Pe. 4TUHAN jine si ngatakenca, ‘Kubahan maka mbiar kam man bandu dingen teman-temanndu pe mbiar ngenehen kam. Janah idahndu me ia kerina itampuli imbang-imbangna alu pedang. Kuendesken kerina kalak Juda kuteruh kuasa raja Babilon. Deba ibabana tertaban ku Babilon janah si deban itampulina alu pedang. 5Kupediat pe imbang-imbangna ngerampuki kerina erta-erta kuta enda, bage pe ibuatna sikerajangenna ras kebayakenna, rikut ras erta-erta raja pe, jenari iangkut ku Babilon. 6Kerna kam o Pashur, kam ras keluargandu itangkap jenari iangkut ku Babilon. I jah mate me kam, jenari ikuburken, ras kerina teman-temanndu si enggo pernah ibualindu.’ ”
Jeremia ngadu man TUHAN
7O TUHAN, enggo itipuNdu aku,
e maka tertipu aku.
Gegehen kap Kam asangken aku
e maka enggo italukenNdu aku.
Kerina kalak nokoh-nokohi aku,
gedang-gedang wari iuru-uruna aku.
8Tep-tep ngerana, terpaksa aku serko
ningku, “Kerina sigegeh gegeh, kerina ikernepken!”
O TUHAN, erkiteken nehken kataNdu,
gedang-gedang wari aku iuru-uru ras igombangi kalak.
9Tapi tupung kukataken, “Kulupakenlah TUHAN,
lanai aku ngerana i bas gelar TUHAN,”
e maka kataNdu desken api,
si gurlah i bas pusuhku.
Ngutkut i bas tulanku.
Kucubaken sinik, tapi la tersinikken aku.
10Kubegi kerina kalak kusik-kusik,
“Arah ja pa pe kebiaren!
Ota siaduken ia man si erkuasa!”
Temanku si ndeher kal pe itimaina pergulingku
nina, “Entah mawen banci ia sitipu
jenari sitangkap lako erbalas man bana.”
11Tapi, O TUHAN, Kam kap ras aku.
Kam kap gegehku, Kam kap si mbisangku.
Kerina kalak si ngayak-ngayak aku la banci la guling.
Lalap pagi mela iakapna.
Perban la ia ngasup ngeligas aku,
mela iakapna; rasa lalap la terlupakenca.
12O TUHAN si Mada Kuasa, Kam kap si nguji kalak alu bujur.
IetehNdu kai si lit i bas pusuh ras ukurna.
E maka bahan maka kuidah Kam erbalas nandangi imbang-imbangKu,
sabap enggo kuendesken perkarangku ku bas tanNdu.
13Rendelah man TUHAN!
Pujilah TUHAN!
IA kap si mulahi kalak si itindih
i bas kuasa kalak jahat nari.
14Sumpahilah wari tubuhku!
Olanai inget wari tupung nandengku mupus aku! #Jop 3:1-19
15Sumpahilah kalak si erbahan meriah iakap bapangku
tupung isehkenna bana berita enda,
“Dilaki! Enggo tubuh sada anakndu dilaki!”
16Balilah ia ras kuta-kuta enda,
kuta si ikernepken TUHAN alu la alang-alangen.
Erpagi-pagi ibeginalah sora nderkuh,
ingan sora surak-surak perang,
17erkiteken la ibunuhna aku ope denga tubuh.
Adi bage bertin nandengku kap min ndai jadi kuburenku.
18Engkai maka aku tubuh?
Ngenanami kiniseran; ras si pagitna ngenca,
engkeriken umur geluhku i bas kemelan?
Currently Selected:
JEREMIA 20: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
