JEREMIA 17
17
Dosa ras ukumen man Juda
1Nina TUHAN, “O kalak Juda, dosandu enggo isuratken salu pena besi. Dosandu enggo iukir i bas pusuhndu ras i bas tanduk batar-batarndu alu intan si ntelap. 2Bangsandu mereken persembahen i babo batar-batar, dingen nembah man gana-gana Dewi Asera si ipajekken deherken tep-tep batang kayu si merabun i datas uruk-uruk, 3bage pe i datas deleng-deleng i tengah mbalmbal. Kubahan maka ibuat imbang-imbangndu kerina erta-ertandu ras kebayakenndu erkiteken dosa-dosa si ilakokenndu i belang-belang negeri enda. 4Terpaksa ipulahindu negeri si enggo Kubereken man bandu jenari Kubahan kam erdahin guna imbang-imbangndu i bas negeri si langa pernah ietehndu, erkiteken rawangKu gurlah desken api si la ernimpet-nimpet.”
Erbage-bage perkatan
5Nina TUHAN,
“Kalak si nundalken Aku,
kalak si erpengarapen man jelma,
kalak si ernalem man gegehna
Kuukum kerina.
6Ia desken kayu kitik-kitik i gurun pasir,
turah i taneh mesawang si kerah, i babo taneh sira,
ise pe la lit tading i je, kai pe la turah.
La lit kai pe si mehuli jadi man bana.
7Tapi kalak si ernalem man bangKu,
Kupasu-pasu kap ia.
8Ia bali ras batang kayu si turah deher lau maler,
uratna njoler seh kempak lau.
La aru atena tupung paksa perlego,
erkiteken bulungna tetap meratah.
La aru atena tupung paksa perlego,
lalap meramis buahna. #Msm 1:3
9Ise ngasup ngantusisa pusuh manusia?
La lit si deban bali ras pusuh manusia penipuna;
mekeleksa guna ipepalem.
10Aku kap TUHAN, si mperdiateken perukuren manusia,
si nguji pusuh manusia
si ersimulih kempak kalak rikutken lagu langkahna,
sue ras kai si ibahanna.” #Msm 62:13; Ket 2:23
11Kalak si ndatken untung alu la bujur
bali kap ras perik si ngkeremken naruh temanna.
I bas pertengahen umur geluhna bene me kebayakenna,
i bas pengkeri-kerin geluhna teridah maka kalak lenge kepe ia.
12Rumah Pertotonta bali kap ras mahkota si mulia,
bena-benana nari kin enggo pajek i datas ancuk-ancuk deleng.
13O TUHAN, Kam kap pengarapen Israel,
kalak si nadingken Kam mela kap iakapna.
Lesap me ia,
desken gelar si isuratken i bas taneh,
sabap itadingkenna Kam TUHAN,
sumbul si nggeluh.
Jeremia mindo penampat man TUHAN
14O TUHAN, pepalem min aku,
maka mejuah-juah aku;
pulahi min aku,
maka terkelin aku.
Kam kap ngenca si kupuji!
15Nina kalak man bangku, “I ja dage ancamen si ibahan TUHAN man banta e? Suruhlah maka idalankenNa!” 16Tapi, O TUHAN, la pernah kupindo maka seh wari kiniseran man bana. IdahNdu kap si e kerina O TUHAN. IetehNdu kap kai si enggo kukataken. 17Ola kearun man bangku. Kam kap jine inganku cicio tupung paksa kiniseran. 18Bahan mela iakap kalak si ngayak-ngayak aku, tapi pulahi min aku. Demi ia alu kebiaren, tapi ola bereken kebiaren man bangku. Bereken man bana cilaka jenari perperken ia.
Mpersingeti wari Sabat
19Nina TUHAN man bangku, “O Jeremia momoken katangKu enda i bas Pintu gerbang bangsa e, gerbang dalan bengket raja-raja Juda dingen dalan ndarat i bas kuta e nari. Kenca bage lawes kam ku pintu-pintu gerbang si deban i Jerusalem. 20Kataken man raja-raja Juda, man kerina kalak Juda, ras man kerina kalak si ringan i Jerusalem si bengket arah pintu-pintu gerbang, gelah idengkehkenna kai si Kukataken. 21Turiken man bana adi keleng atena geluhna, la banci ia ngangkut barang-barang tupung wari Sabat, janah mabasa arah pintu gerbang Jerusalem. #Neh 13:15-22 22La banci kai pe ibabana ndarat i bas rumahna nari tupung wari Sabat; la banci erdahin. Arus maka ipebadiakenna wari Sabat sue ras si Kuperentahken man nini-ninina. #Kel 20:8-10; Ul 5:12-14 23Nini-ninina la Aku ibegikenna, la Aku diatena pe. Tapi mekeng pusuhna; la ia erkemalangen man bangKu dingen la ia nggit erlajar i bas Aku nari.
24Kataken man bangsa e maka arus ipatuhina kerina si Kuperentahken. La banci ibabana babanna arah pintu gerbang Jerusalem tupung wari Sabat. Arus maka ipebadiakenna wari Sabat dingen la banci kai pe idahikenna. 25E maka raja-raja ras si biak raja banci bengket arah pintu gerbang Jerusalem maka bali kuasana ras kuasa Daud nai. Raduken kalak Juda ras Jerusalem inangkihina gereta kuda, dingen iersakna kuda. Kuta Jerusalem gelgel idemi salu jelma si nterem. 26I bas kuta-kuta Juda, i bas kuta-kuta sekelewet Jerusalem nari, i bas daerah Benyamin nari, i ture-ture deleng nari, i deleng-deleng nari, bage i Selatan Juda nari, rehen kerina kalak ku Rumah PertotonKu; ipersembahkenna ku je persembahen tutungen, persembahen gelehen, persembahen pangan, kumenen, dingen persembahen pengataken bujur man TUHAN. 27Tapi arus maka ia erkemalangen man bangKu, dingen arus iperdiatekenna wari Sabat. I bas wari e la banci ibabana babanna arah pintun gerbang Jerusalem. Adi ibabana la banci lang Kuciluk me pintun gerbang Jerusalem. Kerina istana Jerusalem ipan api, la ise pe ngasup nimpetisa.”
Currently Selected:
JEREMIA 17: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
