HAKIM-HAKIM 8
8
Bangsa Midian kerina italuken
1Kenca bage nina dilaki-dilaki suku Eperaim man Gideon, “Engkai maka la ilebuhndu kami sanga ngelawan bangsa Midian. Engkai maka bage perbahanenndu nandangi kami?” Jungut-jungut kal kalak enda erkiteken si e.
2Nina Gideon man kalak enda, “Kai si enggo kubahan e langa kap kai pe e ibandingken ras kai si enggo ibahanndu. Aminna sitik pe si ibahanndu o kam kalak Eperaim, ergan kap e asangken kai si enggo ilakoken kerina terpukku. 3Sabap arah gegeh Dibata enggo ibunuhndu peminpin bangsa Midian si dua e, Oreb ras Seeb. Kai kin si enggo kubahan e ibandingken ras si ibahanndu e?” Kenca ikataken Gideon e lanai ate kalak enda merawasa kal. #Msm 83:11
4I bas paksa e Gideon ras temanna si telu ratus kalak e enggo seh i Lau Jordan janah enggo ikeparina lau e. Enggo latih iakapna, tapi ielisna denga musuh e. 5Sanga ia seh i Sukot nina man kalak dilaki i bas kuta e, “Tolong bereken sitik roti man teman-temanku enda. Latih kal iakapna, janah aku sangana ngelis Sebah ras Salmuna, raja bangsa Midian e.”
6Tapi nina peminpin kuta Sukot, “Engkai maka ibereken kami pangan man tenterandu? Langa kap itangkapndu Sebah ras Salmuna.”
7E maka nina Gideon, “Merandal! Kenca iendesken TUHAN ku bas tanku Sebah ras Salmuna, Kuligas kam alu duri ras rambah gurun si erduri!” 8Lawes Gideon ku Penuel, janah ibahanna ka pemindonna bagi si ndai man kalak si i je. Tapi seri jabap kalak Penuel ras kalak Sukot ndai. 9E maka nina Gideon man kalak enda, “La banci la mulih aku ku jenda alu mejuah-juah, janah sanga si e pagi kuradasken menarandu enda!”
10Sebah ras Salmuna sangana i Karkor ras tenterana. Kerina tentera i bas suku gurun pasir e 15.000 kalak nari ngenca tading; 120.000 tentera enggo ibunuh. 11Gideon erdalan gedang-gedang dalan si lit i tepi gurun pasir e arah Timur kuta Nobah ras Jogbeha, jenari rempet iserangna tentera e, sanga ia la erjaga-jaga. 12Kiam raja Midian si dua e, Sebah ras Salmuna, tapi ielis Gideon duana seh tertangkap, janah perbahan si e huntak kerina tenterana.
13Sanga mulihken Gideon i bas peperangen nari arah Dalan Heres, 14itangkapna sada anak perana anak kuta Sukot janah isungkunina. Isuratken anak perana e man Gideon pitu gelar peminpin Sukot. 15Kenca bage idahi Gideon dilaki-dilaki kalak Sukot janah nina, “Ingetndu kang sanga kam la nggit nampati aku? Ikatakenndu maka la kam nggit mereken pangan man tenterangku si sangana latih erkiteken langa kutangkap Sebah ras Salmuna. Enda endi!” 16E maka ibuat Gideon duri ras rambah gurun si erduri, ipergunakenna e ngukum peminpin kuta Sukot. 17Menara i Penuel pe iruntuhkenna janah ibunuhina kerina dilaki i bas kuta e.
18Kenca bage nungkun Gideon man Sebah ras Salmuna, “Uga kalakna dilaki si ibunuhndu i Tabor?” Nina kalak ndai njabapsa, “Seri ras kam kalakna, tep-tep kalak bali ras anak raja.”
19Nina Gideon, “Seninangku kap e, anak nandengku. Situhuna adi la min ndai ibunuhndu ia, kam pe labo kubunuh.” 20E maka nina Gideon man Jeter, anakna sintua, “To bunuh kalak ah!” Tapi la isintak anak e pedangna. Mbiar ia perbahan ia danak-danak denga.
21Perbahan e nina Sebah ras Salmuna man Gideon, “Mari, kam saja munuh kami, sabap dilaki nge maka ngasup ngelakoken pendahin dilaki.” E maka ibunuh Gideon Sebah ras Salmuna janah ibuatna perhiasen si lit i kerahung untana.
22Kenca bage nina bangsa Israel man Gideon, “Kamlah jadi pemerentah kami, kam ras sinursurndu, sabap enggo iselamatkenndu kami i bas bangsa Midian nari.”
23Nina Gideon njabapsa, “Aku ras anakku la banci jadi pemerentahndu. TUHAN kap pemerentahndu.” 24Tapi nina Gideon ngumputisa, “Lit sada pemindonku man bandu. Tep-tep kalak kam mereken man bangku anting-anting si enggo ibuatndu.” (Kalak Midian, seri ras kalak gurun pasir si deban, ipakena anting-anting emas.)
25Nina kalak e njabapsa, “Meriah kal ukur kami merekenca man bandu.” Ikimbangken kalak ndai uis e maka itamakenna ku je kerina anting-anting si enggo ibuatna. 26Anting-anting emas si ialoken Gideon e menam dua puluh kilo beratna, janah e langa bengket perhiasen-perhiasen, bura ras baju raja-raja bangsa Midian, bage pe bura-bura si lit i bas kerahung untana. 27Ibahan Gideon sada gana-gana i bas emas e nari janah itamakenna i kutana i Opra. Kerina bangsa Israel nadingken Dibata, janah lawes ku je nembah gana-gana e. E enggo jadi siding man Gideon ras man keluargana.
28Bage me enggo italuken bangsa Israel bangsa Midian janah lanai pang kumekik pe. Negeri e dame empat puluh tahun dekahna seh Gideon mate.
Gideon mate
29Mulih Gideon ku rumahna janah i jah me ia tading. 30Lit pitu puluh kalak anakna dilaki sabap melala ndeharana. 31I Sikem pe lit sekalak gundikna; i je lit sada anak pupusna, janah Abimelek ibahanna gelarna. 32Gideon anak Joas mate kenca cawir metua, janah ikuburken i kuburen bapana Joas i Opra, kuta sikerajangen terpuk Abieser.
33Kenca kematen Gideon lanai ka bangsa Israel setia man Dibata. E maka isembahna Baal. Ibahanna Baal-Perpadanen jadi dibatana, 34janah lanai ingetna TUHAN Dibatana, si enggo mulahi ia i bas kerina musuh-musuh i sekelewetna nari. 35La icidahkenna pe kehamatenna man keluarga Gideon kerna kerina si mehuli si enggo ibahanna nandangi Israel.
Currently Selected:
HAKIM-HAKIM 8: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
