HAKIM-HAKIM 12
12
Jepta ras bangsa Eperaim
1Kalak Eperaim ersikap lawes erperang. Ikeparina Lau Jordan muat lawes ku Sapon nina man Jepta, “Engkai maka la ilebuhndu kami gelah ras kita ngelawan bangsa Amon? E maka iciluk kami ate kami rumahndu ras kerina isina.”
2Tapi nina Jepta ngaloi, “Aku ras bangsangku mbelin perubaten kami ras bangsa Amon. Enggo kam kulebuh, tapi la kam nggit nampati kami ngelawan bangsa Amon. 3Kenca ieteh kami maka kam la nggit, kuasamken kesahku, kukepari perbalengen kami, janah kuperang kalak e, janah TUHAN mereken kemenangen man bangku. E maka ngkai maka kam reh ngelawan kami genduari?” 4Kenca bage ipepulung Jepta kerina kalak Gileat ngelawan kalak Eperaim janah talu ibahanna. (Pernah ikataken kalak Eperaim, “Kam kalak Gileat si ringan i Eperaim ras Manase, enggo kiam i bas bangsa Eperaim nari!”) 5Gelah bangsa Eperaim ola kiam, itimai bangsa Gileat i bas ingan-ingan ngepar Lau Jordan. Sanga icubaken bangsa Eperaim kiam alu mindo ijin ngepar, isungkun bangsa Gileat ia, “Bangsa Eperaim kam?” Adi “lang” nina, 6isuruhna ia melasken, “Syibolet.” Tapi ibelaskenna “Sibolet” erkiteken la ia beluh melaskenca alu payo. E maka itangkapna janah ibunuhna i bas sada ingan ngepar Lau Jordan. I bas paksa e lit empat puluh dua ribu kalak bangsa Eperaim ibunuh.
7Jepta minpin Israel enem tahun dekahna. Kenca bage, mate ia e maka ikuburken i bas kutana i Gileat.
Ibsan, Elon, ras Abdon
8Kenca Jepta, si minpin Israel e me Ibsan i Betlehem nari. 9Lit anakna telu puluh kalak dilaki, telu puluh kalak diberu. La ibere Ibsan anakna si dilaki ras si diberu erjabu ras kalak si sada terpuk ras ia, tapi arus ras terpuk si deban. Ibsan minpin Israel pitu tahun dekahna, 10e maka mate ia janah ikuburken i Betlehem.
11Kenca Ibsan, Elon i Sebulon nari minpin Israel lit sepuluh tahun dekahna. 12E maka mate ia janah ikuburken i Ayalon i daerah Sebulon.
13Kenca Elon, kalak Israel ipinpin Abdon anak Helel i Piraton nari. 14Lit empat puluh anakna dilaki ras telu puluh kempuna dilaki, si ngersak pitu puluh kelede. Abdon minpin Israel waluh tahun, 15e maka mate ia janah ikuburken i Piraton i daerah Eperaim i deleng-deleng Amalek.
Currently Selected:
HAKIM-HAKIM 12: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
