HAKIM-HAKIM 10
10
Tola
1Kenca mate Abimelek, Tola anak Puah, kempu Dodo reh mbebasken Israel. Ia i bas suku Isakar nari janah ringan i Samir i deleng-deleng Eperaim. 2Ia jadi peminpin Israel dua puluh telu tahun dekahna. Kenca ia mate e maka ikuburken i Samir.
Jair
3Kenca Tola, keke ka Jair i Gileat nari. Ipinpinna Israel dua puluh dua tahun. 4Anakna lit telu puluh kalak si ngersak telu puluh kelede. Lit telu puluh kutana i negeri Gileat, janah seh asa genduari igelari kuta-kuta Jair. 5Mate si Jair e maka ikuburken i Kamon.
Jepta
6Bangsa Israel erbahan dosa denga man TUHAN alu nembah man Baal ras Astarte, bage pe man dibata-dibata Siria, Sidon, Moap, Amon ras Pilisti. Itadingkenna TUHAN janah ngadi ia nembah man baNa. 7E maka merawa TUHAN man bangsa Israel, janah ipelepasNa bangsa Pilisti ras bangsa Amon ngkuasaisa. 8Sepuluh waluh tahun dekahna bangsa Pilisti ras Amon nindih ras ngayak-ngayak bangsa Israel si ringan i negeri bangsa Amori i Timur Lau Jordan i Gileat. 9Bangsa Amon pe ngepari Lau Jordan merangi suku Juda, Benyamin ras Eperaim. Israel lit i bas kiniseran si mbelin.
10E maka erlebuh bangsa Israel ku TUHAN nina, “Enggo kami erdosa man baNdu, erkiteken itadingken kami Kam, Dibata kami, janah isembah kami Baal.”
11Ibereken TUHAN jabapen enda, “Bangsa Mesir, bangsa Amori, bangsa Amon, bangsa Pilisti, 12bangsa Sidon, bangsa Amalek, ras bangsa Maoni ndedeh kam i bas paksa si lepas, e maka erlebuh kam man bangKu. La kin kam Kuselamatken i bas kalak e nari? 13Tapi itadingkenndu kang Aku janah nembah man dibata-dibata si deban, e maka tetap nge ateKu lanai mulahi kam. 14To lebuh dibata-dibata si enggo ipilihndu. Suruh ia mulahi kam katawari kam i bas kiniseran.”
15Tapi nina bangsa Israel man TUHAN, “Kami enggo erdosa. Bahanlah kai ateNdu, saja ngenca ngarap kami gelah ibebaskenNdu kami genduari.” 16E maka iambekkenna dibata-dibata si deban, jenari isembahna TUHAN. E maka lanai tahan TUHAN ngidah kiniseran Israel.
17Kenca bage ersikap tentera bangsa Amon ku peperangen, janah erkemah ia i Gileat. Bangsa Israel pulung janah erkemah i kuta Mispa i Gileat. 18I jah nina bangsa Israel ras peminpinna sapih-sapih ia, “Ise pang arah lebe ngelawan bangsa Amon. Ia jadi peminpin kerina kalak si ringan i Gileat.”
Currently Selected:
HAKIM-HAKIM 10: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
