JESAYA 63
63
Kerina bangsa talu ibahan TUHAN
1“Ise kin kam, si reh i kuta Bosra, i negeri Edom nari? Ise kin kam si ruisken uis mejile, megara rupana, si erdalan alu kuasa ras gegeh?”
Nina TUHAN, “Aku kap enda, TUHAN si erkuasa ngkelini; Aku reh meritaken kemenangenKu.” #Jes 34:5-17; Jer 49:7-22; Esek 25:12-14; 35:1-15; Amos 1:11-12; Oba 1-14; Mal 1:2-5
2“Engkai maka bage kal garana rupa uisndu, bali ras rupa uis kalak si ngerik buah anggur?”
3Nina TUHAN ngaloi, “Sabap bangsa-bangsa enggo Kuerik bagi buah anggur, janah la lit ise pe si nampati Aku. Perban nembehna ateKu enggo Kuerik ia, janah darehna mbincar ku uisKu. #Ket 14:20; 19:13; 19:15 4Enggo Kutetapken maka paksana enggo seh lako ngkelini bangsangKu; enggo seh paksana ngukum musuh-musuhna. 5Jengang kal Aku, sabap tupung Kutatap ku sekelewetKu, la lit ise pe reh nampati Aku. Tapi perban rawana ateKu, megegeh Aku, janah menang Aku alu la ise pe nampatisa. #Jes 59:16 6Erkiteken rawangKu, Kuperjati kerina bangsa-bangsa janah Kuripukken, darehna Kuamburken ku taneh.”
Kiniulin TUHAN man Israel
7Ateku nuriken kerna kekelengen TUHAN si la lit sibarna,
kupuji IA, erkiteken kasa kai si enggo ibahanNa.
Man bangsa Israel enggo mbue kal pasu-pasuNa,
erkiteken kekelengenNa si tetap ras perkuah ateNa.
8Nina TUHAN, “BangsangKu kap ia, e maka labo banci Aku itipuna.” Erkiteken si e ikelinina bangsa e 9i bas kerina kiniseranna nari. Labo malekat, tapi TUHAN jine kap si ngkelinisa. Erkiteken kekelengenNa ras perkuah ateNa, ipulahiNa bangsa e. I bas paksa si enggo lepas lalap ipekena-kenaNa ia, 10tapi ilawanna TUHAN janah ceda kal ate TUHAN ibahanna. Erkiteken si e TUHAN erkusur jadi imbangna, janah iperangi TUHAN bangsa e.
11I jem teringet bangsa e kempak paksa si enggo lepas, kempak Musa, suruh-suruhen TUHAN nai, janah nina, “I ja genduari TUHAN si ngkelini peminpin-peminpin bangsaNa i bas lau lawit nari? I ja kin TUHAN si mereken kesahNa si badia man Musa? 12-13I ja kin TUHAN, si ngelakoken perbahanen si mbelin alu kuasaNa arah Musa? Erbelah ibahanNa lau lawit jenari itaruhkenNa bangsaNa arah lau si mbages e, gelah datca gelar si termur-mur seh rasa lalap.”
Arah penegu-negu TUHAN, perdalanna paguh desken kuda i mbalmbal janah la pernah tertuktuk. #Kel 14:21 14Desken rarasen lembu si igera ku baluren si mehumur, bage me TUHAN mereken pengadi-ngadin man bangsaNa. Itegu-teguNa bangsaNa erkiteken si e ermulia gelarNa.
Pertoton mindo perkuah ate ras penampat
15O TUHAN, tatap min kami i Surga nari,
inganNdu si badia dingen mulia.
I ja kin kuasa ras kinimbisanNdu?
I ja kin kekelengen ras perkuah ateNdu?
I ja dage pusuhNdu si rusur ertedeh ate nandangi kami?
Ola min Kam ndiri-ndiri ngenehen kami.
16Ma Kam kin Bapa kami?
Abraham ras Jakup labo nandai kami.
TUHAN, Kam nge si tuhuna Bapa kami,
si ngkelini kami i bas paksa si nuria nari.
17Engkai maka ipediat kam kami papak?
Engkai maka ibahan Kam ukur kami mersik,
seh maka lanai kami mbiar nimbak?
Mulihlah Kam TUHAN, erkiteken suruh-suruhenNdu,
erkiteken nai nari bangsa e sikerajangenNdu.
18Engkai maka ipediatNdu musuh merjaki RumahNdu si Badia,
ngkai maka ibereNdu kami sempat itabanna?
19Kami tempa-tempa la pernah irajaiNdu,
tempa-tempa kami la bangsaNdu.
Currently Selected:
JESAYA 63: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
