JESAYA 32
32
Raja si bujur
1I bas sada paksa lit me sekalak si ngerajai alu bujur, janah peminpin-peminpin negeri e merentah alu adil. 2Kerina ia desken ingan cicio tupung udan ras angin meter. Bali ras lau si maler i bas gurun pasir, desken awih batu si galang i bas taneh si salang. 3Matana erpengidah janah pinggelna erpemegi nandangi keperlun-keperlun rayatna. 4La saja sabar, tapi kerina si ibahanna ilakokenna sue ras kai si lit i bas ukurna. 5E maka lanai lit ise pe pagi erpengakap maka kalak lenge e me kalak mehaga, tah pe penipu ikataken kalak bujur. 6Kalak lenge pengeranana pe bodoh, janah ia ngukurken perbahanen si jahat. Kai si ilakokenna ras si ikatakenna, kerina nggombangi Dibata. Kalak si kelihen la pernah iberena nakan janah kalak si muas la pernah iberena minem. 7Kalak jahat lenge kap, janah jahat perbahanenna; erpekat ia ncedaken kalak musil alu kata guak, janah iambatina kalak musil maka ola idatca hakna. 8Tapi kalak si mehaga bujur perbahanna janah paguh i bas kai si benar.
Ukumen ras kiniulin Dibata
9Begikenlah o kam diberu-diberu si senang pergeluhndu si la lit kesusahenndu. 10Tuhu puas akapndu nggeluh genduari, tapi kira-kira setahun nari gulut me akapndu, sabap lanai lit buah anggur si man peraninndu. 11Gelgel nari senang akapndu nggeluh, la lit kai pe kesusahenndu, tapi genduari gentarlah dingen nggirgirlah! Tangtangilah uisndu, jenari iketken uis merigat-rigat i bas awakndu. 12Temtemilah bandu, erkiteken jumandu si mehumur ras peken anggurndu enggo icedaken, 13rambah duri ras sikucingen enggo turah i bas taneh bangsangKu. Ngandungilah rumah-rumahndu ingan kalak si ersenang-senang, bage pe kuta si dem alu keriahen e. 14Istana pe itadingken nge janah ibukota e jadi ingan si melungen. Rumah-rumah ras benteng-benteng si ngkelewetisa radas seh rasa lalap. Kelede kerangen kiam-kiam, janah biri-biri ndat gagaten i je.
15Tapi ibereken Dibata ka sekali nari kesahNa man banta. E maka taneh tenggiring jadi mehumur, janah juma pe mbuah ka. 16I belang-belang negeri e idalanken kebujuren ras keadilen. 17Erkiteken kerina kalak ngelakoken si bujur e maka lit kedamen ras ketenengen seh rasa lalap. 18Kesusahen lanai lit i bas bangsa Dibata janah rumahna dem alu kedamen ras ketenengen. (19Tapi udan baho ndabuh i bas kerangen, janah kuta e iradasken.) 20Kerina kalak ermalem ate erkiteken lau guna senuan-senuan la kurang janah i tengah mbalmbal si kelede ras lembu banci kiam-kiam alu bebas.
Currently Selected:
JESAYA 32: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
