JESAYA 19
19
Dibata ngukum Mesir
1Enda me berita kerna Mesir.
Pedas me TUHAN reh ku Mesir alu ngersak embun. Berhala-berhala Mesir nggirgir i lebe-lebeNa, janah kalak Mesir bene ukurna. #Jer 46:2-26; Esek 29:1–32:32 2Nina TUHAN, “Kubahan me perang sapih-sapih kalak Mesir; seninana ngelawan seninana, anak kuta ngelawan kalak si sekutan ras ia. Kuta-kuta erperang ras kuta si deban, janah raja-raja ngelawan raja-raja guna ndatken kuasa. 3Sura-sura kalak Mesir la surung Kubahan, janah Kubeneken ukurna. E maka ipindona penampat man berhala-berhalana, jenari lawes ia nungkuni guru-guru si baso, ipindona pedah man begu-begu kalak si enggo mate. 4Kuendesken Mesir ku teruh kuasa sekalak raja si merentah ia alu kejam.” Enda kata i bas TUHAN si Mada Kuasa nari.
5Lau Nil merembo, janah kedungenna kerah me. 6Baluren lau belin e mbau tupung launa mulai lawes kukerahna. Batang rengo ras rih si lit i je melus, 7janah kerina benih sinuan-sinuan si iamburken i gedang-gedang tepi Lau Nil kerah jenari kabang iembusken angin. 8Kasa kalak si pendahinna nangkap nurung i Lau Nil la banci lang kelsehen janah ngandung, kawilna ras jalana lanai lit gunana. 9Kalak si erbahan kain lenen erndele ate; 10tukang tenun ras tukang-tukang si pentar, erceda ate janah tumpat ukurna.
11Kerina peminpin Kuta Soan bodoh kal tuhu-tuhu! Kalak si pentar kal i Mesir mereken pedah si sea-sea! Uga maka pang kal ia ngatakenca man raja, “Kami me kesusuren kalak pentar, kesusuren raja-raja si adi?” 12Raja Mesir, i ja penasihatndu si cerdik e? Banci jadi ngasup ia nuriken kai sura-sura TUHAN si Mada Kuasa nandangi Mesir. 13Kerina peminpin-peminpin kuta Soan ras Mempis bodoh tuhu-tuhu! Arusna ia me si negu-negu bangsa e, tapi kepeken bekas pemabaina maka kalak papak. 14TUHAN mahanca maka peminpin-peminpin e mereken nasihat si la erturi-turin. Erkiteken si e salah kerina kai si ilakoken Mesir, desken kalak mabuk, mbewat-mbewat perdalanna janah celus i bas utahna jine. 15Lanai lit kalak ngasup nampati Mesir subuk kalak bayak tah kalak musil, kalak si mehaga tah si la itandai.
Isembah Mesir me pagi TUHAN
16Seh me paksana kalak Mesir percikcik ras permela bali ras diberu. Nggirgir ia ban biarna tupung idahna TUHAN si Mada Kuasa enggo ngawatken tanNa lako ngukum. 17Kalak Mesir mbiar ngenehen Juda tep-tep kali adi isingetken kerna putusen si enggo itentuken TUHAN si Mada Kuasa man bana.
18Adi paksa si e enggo seh pake me pagi cakap Heber i bas lima kuta Mesir. Kalak si ringan i je melasken sumpahna i bas gelar TUHAN si Mada Kuasa. Sada i bas kuta e pagi igelari “Kuta Matawari”.
19Adi paksa si e enggo seh, lit pagi sada batar-batar ingan persembahen man TUHAN i negeri Mesir, janah sada tugu i perbalengen Mesir si ipersembahken man TUHAN. 20E me pagi jadi tanda kesaksin maka TUHAN si Mada Kuasa ringan i negeri Mesir. Adi kalak si i je itindihna, jenari erlebuh ia kempak TUHAN mindo penampat, isuruh TUHAN sekalak jelma mulahi bangsa e. 21Ipetangkas TUHAN me diriNa man bangsa Mesir, e maka itandai ras isembah bangsa e me IA, jenari ibahanna me persembahen gelehen ras persembahen si deban. Erpadan me ia man TUHAN alu sumpah, janah kai si ipadankenna e idalankenna. 22Iukum TUHAN me kalak Mesir, tapi kenca bage ipepalemNa ka. Mulihken pagi bangsa e kempak TUHAN e maka ibegiken TUHAN pertotonna jenari ipepalemNa ka.
23Adi paksa si e enggo seh, lit pagi pasar mbelang i Mesir nari seh ku Assur. Kalak si ringan i negeri si dua e mentas-mentas ku jah ku je arah pasar e, janah negeri si dua e ersembah ras-ras. 24Tupung si e, Israel seri pagi ergana ras Mesir ras Assur, janah negeri si telu e mereken kesangapen man kerina doni enda. 25Ipasu-pasu TUHAN si Mada Kuasa negeri si telu e, niNa, “Kupasu-pasu me kam o Mesir, bangsangKu; Assur tinepangKu, ras Israel bangsa pilihenKu.”
Currently Selected:
JESAYA 19: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
