JESAYA 10
10
1Cilaka me kam! Ibahanndu undang-undang si la bujur lako nindes bangsaKu. 2Bage me perbahanenndu gelah kalak musil la ndatken hak ras keadilen. Bage me perbahanenndu lako ngerampas erta-erta diberu balu-balu ras anak melumang. 3Kai nari pagi ibahanndu tupung Dibata ngukum kam? Kai nari ibahanndu tupung iberekenNa mara i bas negeri si ndauh nari? Ku ja nari kam kiam ndarami penampat? Ku ja nari ibunikenndu kebayakenndu e? 4Lanai lit dalanndu pulah, seakatan mate i bas peperangen tah pe isaren-saren kalak jadi tabanen. Tapi amin enggo pe bage, pernembeh ate TUHAN langa ngadi; iawatkenNa denga tanNa lako ngukum bangsa e.
Raja Assur jadi perkakas Dibata
5Nina TUHAN, “Assur Kupake desken perpalu nggudam kalak si nembeh ateKu. #Jes 14:24-27; Nah 1:1–3:19; Sep 2:13-15 6Kusuruh Assur nerang bangsa si la mbiar bangKu, bangsa si mahanca ateKu gara. Kusuruh Assur ngerampasi, nangkoi ras ndedehi bangsa e desken kubang i bas dalan.”
7Tapi raja Assur la bage sura-surana. Ipakena atena kinimbisanna ngkernepken melala bangsa. 8Alu gombangna nina, “Kerina puanglimangku raja-raja kap! 9Ma enggo kutaluken kuta Kalno bali ras Karkemis, kuta Hamat bali ras Arpad? Enggo kutaluken Samaria bali ras Damaskus. 10Kerajan-kerajan si nembah man berhala-berhala enggo kutaluken; kerajan-kerajan e buen berhalana asa si lit i Jerusalem ras Samaria. 11Samaria ras kerina berhalana enggo kukernepken; janah bage ka me kubahan nandangi Jerusalem ras kerina gana-gana si isembah i bas kuta e.”
12Tapi nina TUHAN, “Adi enggo dung dahinKu i Deleng Sion ras i Jerusalem, Kuukum raja Assur perban megombang dingen meganjang ukurna.”
13Alu megombang nina raja Assur ngerana, “Kerina si e enggo kubahan alu gegehku jine. Aku megegeh, pentar ras beluh; kumasapken baleng negeri-negeri janah kurampas perbekalen si lit i bas lumbungna. Desken raksasa kudedehi kerina penduduk negeri e. 14Bangsa-bangsa i bas doni desken sada asar perik; kupepulung kebayaken bangsa-bangsa e bali murahna ras pepulung naruh i bas asar-asar. Sada pe la pang erkepek, sada pe la pang kumekik.”
15Tapi nina TUHAN, “Banci kin ikataken kapak belinen ia asa si makesa? Pentingen kin gaji asa kalak si nggajikenca? Perpalu labo banci ngawatken jelma; jelma nge ngawatken perpalu.”
16 TUHAN si Mada Kuasa namaken penakit lako ngukum puanglima-puanglima si mbur genduari. Melas pagi akapna i bas kulana si mbur e, tempa-tempa i je lit api si gurlah la erngadi-ngadi. 17Dibata, terang Israel, jadi api pagi. Dibata si Badia nu Israel jadi dilah api, janah sada wari saja keri icilukna kerina si nasa lit, subuk dukut si erduri bage pe rambah erduri. 18Kerangen si mbelang, juma si mehumur ikernepken kerina, bali ras penakit si mekelek ngkernepken sekalak jelma. 19Sitik nari ngenca pagi batang kayu si tading seh maka sekalak danak-danak pe ngasup meligaisa.
Piga-piga kalak ngenca mulih
20Lit pagi paksana i ja kalak Israel si tading denga lanai ernalem man bangsa si menam ngkernepken ia. Tupung e tuhu-tuhu ia ernalem man TUHAN, Dibata si Badia nu Israel. 21Piga-piga i bas kalak Israel mulihken pagi tek kempak Dibatana si mbisa. 22Aminna gia genduari kalak Israel bali buena ras kersik i tepi lawit, piga-piga kalak saja ngenca pagi si mulihken. Bangsa e lanai banci lang ikernepken janah patut kal bage ibahan man bana. #Rom 9:27 23Tuhu, TUHAN si Mada Kuasa, si Erdolat, la banci lang engkernepken kerina negeri e, sue ras si enggo ikatakenNa.
Iukum TUHAN pagi kerajan Assur
24 TUHAN si Mada Kuasa si Erdolat ngerana man bangsaNa si ringan i Sion nina, “Ola kam mbiar nandangi kalak Assur e aminna gia itindes dingen isega-segana kam bali ras perbahanen kalak Mesir nai. 25Enggo me bias ukumen si Kubereken man bandu, janah kenca bage Kukernepken me bangsa Assur e. 26Aku, TUHAN si Mada Kuasa, tentu ngeligas bangsa e alu perligasKu, bali ras pengeligasKu bangsa Midian i Batu Oreb. Kuukum me Assur bali ras Kuukum Mesir nai. 27Adi paksa si e enggo seh, Kubebasken me kam i bas kuasa Assur nari, janah pasangen si mberat si itamakenna i bas kudukndu Kupenggelken me.”
Musuh reh nerang
28Tentera musuh enggo naluken kuta Ai! Enggo ibentasina kuta Migron! Perbekalenna itadingkenna i Mikmas! 29Enggo ikeparina dalan si sempit i babo deleng, jenari erberngi ia i Geba. Kalak si ringan i Rama gentar kerina, janah penduduk kuta Raja Saul e me Gibea enggo ngerbul. 30Serkolah, o anak kuta Gallim! Begiken o anak kuta Laisa! Aloilah o anak kuta Anatot! 31Penduduk kuta Madmena ras Gebim enggo kiam lako ngkelini kesahna. 32Sendah musuh enggo ngkuasai kuta Nob, janah i bas kuta e ianjuna tinju-tinjuna kempak Deleng Sion, ku kuta Jerusalem.
33Kerina kuta enda ndai iruntuhken TUHAN si Mada Kuasa desken dahan-dahan si ikeret i bas batang kayu nari. Si meganjangna ras si megegehna ituhtuhi janah idabuhken. 34Desken kayu i tengah kerangen itabah alu kapak, bage me ia kerina itabah TUHAN. Janah aminna paguh pe ia bagi kayu asis Libanon, ampar nge ia ibahan TUHAN.
Currently Selected:
JESAYA 10: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
