HOSEA 1
1
1Enda me kata TUHAN si seh man Hosea anak Beeri tupung Usia, Jotam, Ahas, ras Hiskia, raja-raja Juda, dingen Jerobeam anak Joas, raja Israel. #2Raj 14:23-29; 15:1-7; 15:32-38; 16:1-20; 18:1–20:21; 2Kro 26:1-23; 27:1-8; 28:1-27; 29:1–32:33
Ndehara ras anak-anak Hosea
2Tupung TUHAN mula-mulana ngerana man Israel arah Hosea nina man Hosea, “To empoi sekalak diberu; ndeharandu e jadi diberu perlua-lua pagi, janah anakna pe bagi ia ka. Bage ka me bangsangKu pe; enggo itadingkenna Aku janah enggo erlua-lua ia.”
3E maka iempoi Hosea sekalak diberu anak Diblaim, Gomer gelarna. Kenca tubuh anakna sintua, dilaki, 4nina TUHAN man Hosea, “Bahan gelarna “Jesreel”, sabap lanai ndekah, Kuukum me raja Israel, erkiteken nai ninina Jehu munuh i Jesreel. E maka Kupengadi me kerajan Israel. #2Raj 10:11 5Tupung si e pagi i bas Baluren Jesreel me Kukernepken gegeh tentera Israel.”
6Kenca bage mehuli ka kula Gomer; jenari ipupusna sekalak anak diberu. Nina TUHAN man Hosea, “Bahan gelarna ‘La-ikelengi’, sabap lanai ateKu keleng man rayat kerajan Israel, janah lanai Kualemi salahna. 7Tapi man rayat kerajan Juda Kucidahken kekelengenKu. Aku, TUHAN Dibatana si ngkelini ia, tapi ia Kukelini la salu perang, la salu pedang tah panah, la salu kuda ras kalak si ngersak kuda.”
8Kenca anakna si diberu e ngadi minem, mehuli ka kula Gomer, jenari ipupusna sekalak anak dilaki. 9Nina TUHAN man Hosea, “Bahan gelarna ‘La-bangsangKu’, sabap kalak Israel la bangsangKu, janah Aku la Dibatana.”
Israel ikelengi ka pagi mulihi
10Bangsa Israel bali pagi teremna ras kersik i lawit, la terkira dingen la tersukati. Genduari tuhu ikataken Dibata, “La kam bangsangKu,” tapi reh me pagi warina i ja ikatakenNa man bangsa e, “Kam kap anak-anak Dibata si Nggeluh!” #Rom 9:26 11Kalak Juda ipersada pagi ras kalak Israel. Ipilihna pagi sekalak jadi rajana, e maka keke ia mulihi janah nggeluh senang i bas negerina. Tuhu, wari Jesreel e me sada wari si mbelin pagi!
Currently Selected:
HOSEA 1: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
