HEBER 5

1Kerina Imam si Mbelin ipilih i tengah-tengah manusia nari, jenari itangkuhken lako ndahiken dahin Dibata guna manusia, gelah ipersembahkenna pemere-pemere bage pe persembahen kerna dosa manusia. 2Erkiteken ia pe melala kekotenna, e maka kepate ia nandangi kalak si la erpemeteh dingen si papak. 3Janah erkiteken ia kote, arus ipersembahkenna persembahen, labo saja kerna dosa-dosa kalak tapi pe kerna dosa-dosana. #Im 9:7 4Labo lit kalak milih dirina ndatken kehamaten jadi Imam si Mbelin. Dibata nge si ndilo kalak jadi Imam si Mbelin, bagi Arun nai. #Kel 28:1

5Bage me pe Kristus, labo IA milih diriNa guna ipehaga jadi Imam si Mbelin. Tapi Dibata ngataken man baNa,

“Kam me AnakKu;

i bas wari enda Aku enggo jadi BapaNdu.” #Msm 2:7

6I bas bagin si deban i bas Pustaka Si Badia ikataken Dibata ka pe,

“Jadi Imam me Kam rasa lalap,

rikutken golongen Imam Malkisedek.” #Msm 110:4

7Paksa Jesus nggeluh i doni enda, ertoto IA mindo alu serko ras iluh mambur man Dibata si ngasup nelamatken IA i bas kematen nari. Erkiteken ipeteruk Jesus diriNa dingen erpengendes man Dibata, ibegiken Dibata pemindonNa. #Mat 26:36-46; Mrk 14:32-42; Luk 22:39-46 8Tapi aminna pe Jesus Anak Dibata, erlajar patuh IA arah kiniseranNa. 9Erkiteken si e me maka kenca IA serta ibahan Dibata, IA jadi ulu keselamaten si rasa lalap, nandangi kerina kalak si erkemalangen man baNa. 10Janah itetapken Dibata IA jadi Imam si Mbelin “rikutken golongen Imam Malkisedek.”

Ola tadingken kiniteken

11Melala denga si arus ikataken kami kerna si enda, tapi mesera iakap kami nurikenca sabap kai pe melet kam ngangkasa. 12Si tuhuna enggo cukup kesempaten man bandu gelah banci kam jadi guru, tapi seh asa genduari perlu denga kam iajari i bas bena-benana nari kerna ajaren-ajaren Dibata. Langa bo kam man nakan keras, tapi minem susu denga nge kam. #1Kor 3:2 13Kalak si arus denga minem susu, anak-anak denga kap ia, la ietehna kai si benar ras kai si salah. 14Tapi nakan keras e me guna kalak si mbelin, si arah pengalamenna ngasup ia meteh apai si bujur apai si jahat.

Currently Selected:

HEBER 5: BTX

Highlight

Copy