HEBER 1
1
Kata Dibata arah AnakNa
1Nai enggo megati Dibata ngerana man nini-nininta arah nabi-nabi alu erbage-bage cara. 2Tapi i bas paksa-paksa si arah pudi enda ngerana IA man banta arah AnakNa. Arah AnakNa e me Dibata njadiken kerina si nasa lit; AnakNa e itetapkenNa jadi si mada kerina si nasa lit. 3Arah IA ersinalsal terang kemulian Dibata, janah IA tuhu-tuhu gambar Dibata. IA me si natang kerina si nasa lit alu kataNa si erkuasa. Kenca ibersihkenNa manusia i bas dosa-dosa nari, kundul IA i Surga arah kemuhen Dibata si Mada Kuasa si meganjangna.
Anak e beliden asa malekat-malekat
4Anak e enggo jadi ndauh ganjangen asangken malekat-malekat, bagi gelarNa pe enggo ibereken Dibata ganjangen asangken gelar malekat-malekat. 5Sabap man malekat-malekat labo pernah ikataken Dibata,
“Kam me anakKu;
sendah Aku jadi Bapandu.”
Man malekat si apai pe labo pernah ikataken Dibata,
“Aku me jadi BapaNa,
janah IA me jadi AnakKu.” #Msm 2:7; 2Sam 7:14; 1Kro 17:13
6Tapi asum isuruh Dibata ateNa anakNa sintua ku doni enda, ikatakenNa,
“Kerina malekat Dibata arus nembah man Anak e.” #Ul 32:43
7Kerna malekat-malekat ikataken Dibata,
“Ibahan Dibata malekat-malekatNa angin,
janah suruh-suruhenNa dilah api.” #Msm 104:4
8Tapi kerna Anak e ikataken Dibata,
“Kursi pemerentahenNdu o Dibata, rasa lalap me!
PemerentahenNdu e me pemerentahen si adil. #Msm 45:7-8
9Ngena atendu si bujur, janah nembeh atendu nandangi si jahat;
erkiteken si e me maka Dibata, e me Dibatandu, enggo ngangkat Kam,
jenari ipehagaNa Kam lebih
asa temanNdu, si erbahanca meriah ukurNdu.”
10IkatakenNa pe tole,
“Kam o Tuhan, mula-mulana enggo njadiken doni enda,
janah alu tanNdu jine enggo ijadikenNdu langit. #Msm 102:26-28
11Masap me pagi si enda kerina, tapi Kam tetap nge rasa lalap;
reh mawesna me pagi kerina bagi uis.
12IlipatNdu me pagi kerina si nasa lit bagi uis,
jenari isambari pagi alu si deban.
Tapi Kam tetap nge rasa lalap,
umurNdu la erkeri-kerin.”
13Man malekat-malekat si apai pe labo pernah ikataken Dibata,
“Kundullah i jenda arah kemuhenKu,
seh kutamaken imbang-imbangNdu
jadi dedeh-dedehen naheNdu.” #Msm 110:1
14Adi bage kai dage malekat-malekat e? Malekat-malekat e, e me kesah penampat persuruhen Dibata guna nampati kalak si ngaloken keselamaten pagi.
Currently Selected:
HEBER 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.