HABAKUK 2
2
Jabap TUHAN man Habakuk
1Kunangkihi menara penjaganku jenari kutimai kai isuruh TUHAN si man katankenku ras jabapNa kerna jungut-jungutku e.
2Bagenda me jabap TUHAN man bangku, “Suratkenlah alu terang i bas papan batu kai si Kupetangkas man bandu, gelah iher kiam pe murah ngogesa. 3Suratken e, sabap langa seh paksana si e jadi. Tapi pedas me seh paksana, janah kai si Kucidahken man bandu e la banci lang jadi. Tempa-tempa melawen ia reh, tapi timailah; labo banci la jadi, janah labo ipedekah-dekah. #Heb 10:37 4Janah enda me berita e: Kalak jahat labo pulah, tapi kalak bujur la banci lang nggeluh erkiteken tetap ia ernalem man Dibata.” #Rom 1:17; Gal 3:11; Heb 10:38
Cilaka man kalak jahat
5Kebayaken penipu kap. Kalak rangap meganjang ukurna dingen la pernah teneng; bali ras doni kematen, la pernah puas akapna; em sabapna maka italukenna bangsa-bangsa alu la ermedu-medu guna dirina jine. 6Bangsa si italuken e la banci lang naling-naling bangsa si ngayak ia, nina, “Ibuatndu si la sikerajangenndu, e maka bene me kam! Asa kai nari dekahna kam pebayak bandu alu maksa kalak si rutang nggalar utangna alu barang jaminen si enggo ipepulungndu?”
7Ope denga ietehndu, kam jine si enggo naluken kalak si la banci lang rutang, janah ipaksa nggalar bungana. Nandangi reh me musuh-musuhndu, janah nggirgir kam ibahanna. Irampasina me kam! 8Enggo melala negeri si irampasindu pendudukna, tapi kalak si tading denga la banci lang ngerampasi kam, erkite-kiteken kam enggo munuhi janah mesangat pencedakenndu bangsa-bangsa ras kuta-kuta i doni enda.
9Cilaka me kam! Enggo ipebayakndu keluargandu alu erta si irampasndu alu gegeh, janah enggo icubakenndu mahan rumahndu aman dingen la kena bahaya. 10Tapi rencananndu e mahanca keluargandu mela; alu engkernepken melala bangsa, ibabandu kap kecedan man dirindu jine. 11Sabap batu i bas tembok nderkuh me janah rusuk-rusuk i bas tarum erlolingen ngaloisa.
12Cilaka me kam! Ipajekkenndu kuta i babo kejahaten, ras dareh. 13Bangsa-bangsa si italukenndu ngelatih bana alu pendahin si sia-sia, janah kerina si enggo ipajekkenna masap ipan api. TUHAN si Mada Kuasa kap si mahan si enda. 14Tapi doni enda dem me alu penandai kerna kemulian TUHAN bali ras lawit dem alu lau. #Jes 11:9
15Cilaka me kam! I bas rawaNdu si mesangat ibahanndu mela akap kalak si sibalengen ras kam. Kote ia ibahanndu, tempa-tempa mabuk ibahan anggur. 16Tapi kam jine pe nandangi mela me akapndu, labo kemulian idatndu. Kam pe nandangi minem me, jenari mbewat-mbewat. TUHAN kap si mahanca kam minem tare calung ukumenndu, janah kehaganndu salih jadi kemelan. 17Enggo irabindu kerangen Libanon; genduari kam me irabi. Ibunuhindu rubia-rubiana, genduari gentar me kam ibahan rubia-rubia. Si enda jadi erkiteken kam enggo munuhi janah enggo mesangat pencedaindu bangsa-bangsa ras kuta-kuta i doni enda.
18Kai kin gunana gana-gana? Gana-gana la lebih asangken bahan-bahanen tan manusia, janah la lit kai pe si iajarkenna seakatan guak. Kai kin untungna man kalak si mahan gana-gana e adi ernalem gia ia man bana? Ngerana pe ia labo banci. 19Cilaka me kam! Ikatakenndu man sempenggel kayu, “Medakken!” Man sengkibul batu si pekak ikatakenna, “Kekeken!” Ngasup kin gana-gana mereken ketangkasen man bandu? Aminna ilapisi gia gana-gana e alu pirak tah emas, labo lit kegeluhen i je.
20 TUHAN lit i bas RumahNa si Badia; kerina doni siniklah i adep-adepenNa.
Currently Selected:
HABAKUK 2: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
