KEJADIN 49
49
Pedah Jakup si perpudina
1Idilo Jakup anak-anakna si dilaki, jenari nina, “Pulunglah kam kerina gelah kuturiken kai si jadi man bandu i bas wari si reh enda.
2Pulung lah, begiken lah, o anak-anak Jakup.
Begiken lah kata bapandu Israel.
3Ruben anakku sintua, kam kap gegehku,
kam buah si pemena, tandana aku dilaki.
Kemegahenku si mbelinna,
i bas kerina anak-anakku.
4Kam desken lau si ergalun merawa,
tapi labo kam anakku si pentingna,
sabap ipedemindu gundikku,
ingan medem bapandu iliamindu.
5Simeon ras Lewi ersenina,
ipakena perkakasna ngamburken dareh kalak.
6Alu erbuni-buni arih-arih ia, ncampurisa aku la nggit.
I bas kerina perjumpanna pe bage ka, ikut ningen aku labo nggit.
Sabap ibunuhna kalak iban rawana
nahe lembu ipenggelkenna guna kesenangenna.
7Kena sumpah lah rawana, perban bage hantuna.
Kena sumpah lah pernembehna, perban bage kejamna.
Ateku ngkerapken ia i belang-belang taneh Israel,
ateku nirang-nirang ia i tengah-tengah penduduk Israel.
8Juda, kam ipuji senina-seninandu,
kerahung musuh-musuhndu ijenggelndu,
senina-seninandu mungkuk i lebe-lebendu.
9Juda desken sada singa,
kenca njerngem mulihken nangkih ku liangna,
ngenat, jenari gempang,
si nggasgasisa, ise pe la pang. #Bil 24:9; Ket 5:5
10Juda me si ncikep tungkat kinirajan,
kesusurenna erkuasa seh rasa lalap,
bangsa-bangsa maba persembahen man bana,
nembah alu erkemalangen i lebe-lebena.
11Ku batang anggur itambatkenna keledena,
ku batang anggur si mejilena.
Icucina uisna alu lau anggur,
bali ras dareh megara rupana.
12Matana megara perban minem lau anggur,
ipenna mbentar minem susu.
13Sebulon ringan i tepi lawit,
i je me ingan kapal ngadi-ngadi.
Mbelang daerahna seh ku Sidon.
14Isakar megegeh desken kelede,
singenat itindan babanna.
15Tapi iidahna ingan pengadi-ngadin e mejile,
janah taneh e pe la teralang jilena,
e maka itarekenna gurungna ngangkat babanna,
janah ipaksa ia erdahin desken sekalak budak.
16Dan, ia me jadi peminpin bangsana
seh bali ras suku-suku Israel si debanna.
17Desken nipe i tepi pasar me kap ia,
nipe si erbisa i duru dalan,
itagutna padit-padit kuda,
seh maka sualak ku pudi si ngersaksa.
18O, TUHAN, keselamaten i bas Kam nari
e me si kutima-timai.
19Gat, iserbu gerombolen pengerampok,
tapi erkusur ia, iayakina pengerampok e.
20Aser, ulih tanehna pangan si entabeh,
isikapkenna pangan, metunggung man pangan raja.
21Naptali, desken belkih beru-beru si pulah-pulah,
anak-anak si ipupusna mejile rupana.
22Jusup desken sada batang kayu
si turah i duru ulu lau.
Meramis buahna i bas dahanna
sindauh njurjur ngepari bidena.
23Musuhna megasgas la teralang,
ngayaki ia ersenjataken panah,
24tapi panah Jusup tetap paguh,
janah tanna tetap megegeh,
erkiteken gegeh Permakan si Mada Kuasa
Dibata Jakup, Sekawal Israel.
25Dibata bapandu nge si nampati kam,
alu mereken udan i das nari
ras lau i teruh nari
alu mereken asuh-asuhen ras anak nterem.
26Alu mereken pangan ras rudang-rudang,
alu mereken deleng-deleng si nuria,
ras barang-barang si mejile i uruk-uruk si rasa lalap nari.
Kerina pasu-pasu enda nusurlah ku babo takal Jusup
ku babo perdempakenna, ia si iserapken i bas senina-seninana nari.
27Benyamin desken serigala si merawa.
Pagi-pagi ipanganina kai si ijerngemna,
karaben ibagi-bagikenna kai si la kerisa.”
28Enda me sepuluh duana suku bangsa Israel, janah enda ndai me kata pemasu-masun si ibereken bapana, si sentudu man bana sekalak-sekalak.
Kematen ras penguburen Jakup
29Dungna nina Jakup man anak-anakna si dilaki, “Dage, erkiteken lanai bo ndekah umurku, kuburkenlah aku pagi ras nini-niningku i bas gua si lit i juma Epron kalak Heti e, 30i Mahpela arah Timur Mamre, i taneh Kanaan. Itukur Abraham gua ras juma e i bas si Epron kalak Heti nari man taneh kuburen. #Kej 23:3-20 31I je me Abraham ras ndeharana Sara ikuburken; i je ka pe Isak ras ndeharana Ribka ikuburken. I je ka me pe enggo kukuburken Lea. #Kej 25:9-10; 35:29 32Juma ras gua e itukur i bas kalak Heti e nari, e maka i je lah aku ikuburken.” 33Kenca enggo dung Jakup mereken pedah-pedahna man anak-anakna, medem ia mulihken je mate ia. #Perb 7:15
Currently Selected:
KEJADIN 49: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.