KEJADIN 45
45
Ituriken Jusup man senina-seninana ise ia si tuhuna
1Lanai tertahan Jusup ukurna i lebe-lebe suruh-suruhenna kerina, e maka isuruhna kalak nadingken ingan e. La lit ise pe si deban ras Jusup sanga iturikenna man senina-seninana ise kin ia si tuhuna. #Perb 7:13 2Perban gangna sorana tangis kalak Mesir pe nterem megisa, janah berita e ipeseh ku istana raja. 3Nina Jusup kempak senina-seninana, “Aku kap si Jusup. Nggeluh denga nge bapangku?” Tapi perban biarna senina-seninana e megi si e lanai ia ngasup njabapsa. 4E maka nina Jusup man kalak enda, “Mari terdeheren ku jenda.” Ideheri kalak enda ia, e maka nina Jusup, “Aku kap seninandu si Jusup si dayakenndu ku Mesir. 5Genduari ola aru atendu, ola isalahkenndu bandu erkiteken idayakenndu aku ku jenda. Si tuhuna Dibata nge si erbahan maka aku leben seh asang kam ku jenda guna nelamatken kalak si nterem. 6Enda pedua tahunken denga nge kelihen i negeri enda. Lima tahun nari dekahna la lit kalak si nenggala tah pe rani. 7Dibata si erbahanca maka aku leben seh asang kam, guna nelamatken kam alu cara si luar biasa enda, gelah alu bage kam ras kesusurenndu selamat. 8Erkiteken si e si tuhuna labo kam si erbahanca maka aku seh i jenda tapi Dibata nge. IbahanNa aku jadi penungkunen raja. IberekenNa man bangku kuasa nandangi kerina negeri enda; aku me si merentah kerina negeri Mesir.
9Genduari pedaslah mulih ku bapangku; kataken man bana, maka bagenda nina anakna Jusup, ‘Enggo ijadiken Dibata aku jadi si merentah belang-belang negeri Mesir; minterlah kam reh. #Perb 7:14 10Banci kam ringan i daerah Gosen gelah ndeher ras aku – kam, anak-anakndu, kempu-kempundu, biri-birindu, kambingndu, lembundu, ras kerina sikerajangenndu si deban. 11Adi i Gosen kam ringan, banci kam kupekena-kena. Lit lima tahun nari dekahna kelihen enda; la ateku kam mate kelihen ras keluargandu bage pe ras asuh-asuhenndu.’ ”
12Iterusken Jusup cakapna, “Genduari kerina kam, bage pe agingku Benyamin, enggo ngidahsa maka aku tuhu-tuhu kap si Jusup. 13Turiken man bapangku kuga belinna kuasangku i taneh Mesir; turiken man bana kerina si enggo idahndu. Kenca bage pedas ia baba ku jenda.”
14Idakep Jusup agina Benyamin janahna tangis. Benyamin pe tangis sanga ndakep Jusup. 15Kenca bage, sanga tangis denga, idakepi Jusup kerina seninana, iemaina. Kenca bage maka mulai seninana ngerana ras Jusup.
16Kenca seh berita e ku istana raja, maka enggo reh senina Jusup, meriah ukur raja ras kerina pegawaina. 17Nina man Jusup, “Kataken man senina-seninandu kerina gelah iampekenna barang-barangna ku das keledena gelah ersikap mulih ku negeri Kanaan. 18Suruh ia kerina ngelegi bapana ras keluargana mulihken ku jenda. Aku merekenca taneh si mejilena kal i Mesir enda man bana, gelah idatca lebih asang keperlun geluhna. 19Kataken man bana gelah ibabana gereta i Mesir nari maba ndeharana ras anak-anakna si kitik denga, janah suruh ibabana bapana ku jenda. 20La pada aru atena nadingken ertana, sabap kasa kai si mejilena i taneh Mesir jadi sikerajangenna me.”
21Ilakoken anak-anak Jakup me bagi si isuruh e. Ibereken Jusup piga-piga gereta bagi si iperentahken raja, bage pe pangan i bas perdalanen. 22Iberekenna ka pe man seninana e sekalak-sekalak sepasang uis, tapi man Benyamin iberekenna telu ratus duit pirak ras lima pasang uis. 23Itenahkenna man bapana barang-barang si mejilena i Mesir si ibaba sepuluh kelede ras sepuluh kelede nari ka maba pangan, roti ras pangan si deban guna perdalanen e denggo. 24Ipeberkatna senina-seninana e, janah muat kalak enda lawes ikataken Jusup man bana kerina, “Ola rubat-rubat i bas dalan.”
25Itadingkenna negeri Mesir, mulih ia ku kutana ndahi bapana Jakup i Kanaan. 26“Jusup nggeluh denga!” nina man bapana. “Ia kap si erkuasa i belang-belang taneh Mesir!” Mamang ate Jakup. La ia tek kai si ikataken kalak enda.
27Tapi kenca ituriken kalak enda man bana kerina si ikataken Jusup e man kalak enda, janah kenca idahna ka gereta si ikirimken Jusup guna maba ia ku Mesir, nggeluh ka mulihken ukur Jakup. 28E maka nina, “Anakku Jusup nggeluh denga! E kap ngenca pinta-pintangku. Aku arus lawes gelah jumpa ras ia ope aku mate.”
Currently Selected:
KEJADIN 45: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
