ESRA 6
6
Surat perentah Raja Kores nai idat mulihken
1E maka iperentahken Raja Darius gelah ipepayo kerina surat-surat kerajan si isusun i Babil. 2Tapi i kuta Ekbatana, i bas propinsi Media nge gulungen surat e terdat. Isina bagi si tersena si arah teruh enda:
3“I bas tahun si pemena pemerentahenna raja Kores, merentahken maka Rumah Pertoton i Jerusalem ipajekken ka mulihi man ingan nehken persembahen gelehen ras persembahen tutungen. Rumah Pertoton e ganjangna dua puluh pitu meter janah belangna dua puluh pitu meter. 4Dingdingna ibahan ilapisi selambar kayu i babo tiap telu lapis batu. Kerina kinikerin igalari perbendaharan kerajan. 5Bage pe perkakas-perkakas emas ras pirak si ibaba Raja Nebukadnesar nai ku Babil i bas Rumah Pertoton i Jerusalem nari, arus iulihken ku bas inganna si payo i bas Rumah Pertoton i Jerusalem.”
Iperentahken Darius gelah dahin e iterusken
6Kenca bage ikiremken Darius balasen si tersurat arah teruh enda:
“Man Tattenai, Gubernur Eprat Barat ras Setar Bosenai bage pe teman-temanndu pegawai i Eprat Barat.
Ola deherindu Rumah Pertoton e, 7janah ola campurindu dahin e. Pelepas gubernur Juda ras peminpin Jahudi e majekken Rumah Pertoton Dibata mulihi i bas inganna si gelgel. 8I jenda kuperentahken man bandu gelah isampatindu kalak e majekkenca. Kerina kinikerin arus igalarindu man kalak e, ola terlat, janah buat i bas kas kerajan si ialoken i bas duit pajak propinsi Eprat Barat, gelah dahin e ola lang-lang. 9Tep-tep wari, arus tetap iberekenndu man imam-imam i Jerusalem kai keperlun si ikataken man bandu: jenggi lembu si nguda denga, biri-biri, ntah anak biri-biri si man tutungen jadi persembahen Dibata Surga, ntah gandum, sira, lau anggur, tah minak saitun. 10Si enda arus ilakoken gelah banci ipersembahkenna persembahen si ngena ate Dibata Surga dingen ertoto mindo pasu-pasuNa guna aku ras anak-anakku si dilaki. 11Tole pe kuperentahken: ise si la ngikutken perentah enda arus idekdek sada beloti i bas rumahna nari, jenari itelapi sada ujungna, kenca bage ipantemken ku bas beltekna seh telpus. Janah rumahna iruntuhken jadi gun-gunen sampah-sampah. 12Dibata, si milih Jerusalem jadi ingan ersembah man baNa, Ialah si ngambekken raja tah bangsa si ngelanggar perentah enda ras ncubakenca ncedaken Rumah Pertoton si lit i bas kuta e. Perentah enda la banci la ipatuhi tuhu-tuhu. Aku, si mereken perentah enda.”
Raja Darius
Rumah Pertoton ibengket
13Kenca bage gubernur Tattenai, Setar Bosenai, ras teman-temanna pegawai si deban, nehken perentah Raja Darius, sitik pe la nimpang. 14E maka peminpin-peminpin Jahudi nerusken pembangunen Rumah Pertoton e, si erdalan alu mehuli alu penjemba-jemba Nabi Hagai ras Sakaria. Idungina Rumah Pertoton e sue ras si enggo iperentahken Dibata Israel ras si iperentahken Kores, Darius, ras Artasasta, raja Persia. #Hag 1:1; Sak 1:1 15Rumah Pertoton e enggo dung i bas wari si peteluken bulan Adar, i bas tahun peenemken pemerentahen Raja Darius. 16Kenca bage bangsa Israel, imam-imam, kalak Lewi, ras kerina kalak si deban, si enggo mulih i pembuangen nari alu ukur meriah mengket Rumah Pertoton e. 17Guna kerja mengket Rumah Pertoton e ipersembahkenna seratus jenggi lembu, dua ratus biri-biri, ras empat ratus anak biri-biri jadi persembahen gelehen, ras sepuluh dua kambing jadi persembahen pengalemi dosa, sada guna tiap suku Israel. 18Tambah si e iaturkenna pe imam-imam ras kalak Lewi guna ndahiken dahin-dahin i bas Rumah Pertoton i Jerusalem, sue ras pedah-pedah si isuratken i bas kitap Musa.
Paskah
19Kalak si enggo mulih i pembuangen e nari ngerayaken Paskah i bas wari si pesepuluh empatken bulan si pemena. #Kel 12:1-20 20Kerina imam-imam ras kalak Lewi enggo mbersihken dirina, e maka enggo ia bersih rikutken aturen agama. Jenari kalak Lewi nggeleh asuh-asuhen si man persembahen i bas wari Paskah e guna kerina kalak si enggo mulih i bas pembuangen e nari, bage pe guna imam-imam ras kalak Lewi e jine. 21Si atan man persembahen e, e me kalak Israel si enggo mulih i bas pembuangen nari, bage pe kalak si ngiani negeri e si lanai nggit ngikutken lagu langkah perbegu si melket e, jenari reh ia nembah man TUHAN. 22Pitu wari dekahna kalak ndai ngerayaken Wari Raya Roti si La Itama Ragi e alu dem keriahen. Meriah kal ukur kalak ndai erkiteken ibahan TUHAN enggo mehuli ukur raja Assur man bana seh maka isampati raja e ia i bas dahin majekken mulihi Rumah Pertoton Dibata nu Israel.
Currently Selected:
ESRA 6: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
