ESEKIEL 36
36
Pasu-pasu Dibata man Israel
1Nina TUHAN, “O manusia si ermasap-masap, ngeranalah kam ku deleng-deleng Israel janah suruhlah ia megiken katangKu, 2Aku TUHAN si Erdolat. Enda me katangKu: Nina musuh-musuh Israel, ‘Genduari deleng-deleng si nuria enggo ajangta!’
3Erkiteken si e, ernubuatlah kam, momoken kai si Kukataken, Aku TUHAN si Erdolat. Tupung bangsa-bangsa i sekelewetna naluken dingen ngerampasi deleng-deleng Israel, kerina ia nggombangi Israel. 4Dage genduari begikenlah o deleng-deleng ras uruk-uruk, o kam lau maler ras baluren, bage pe kam o kuta-kuta si irampasi ras iuru-uru bangsa-bangsa si lit i sekelewetndu.
5I bas pernembeh ateKu si gara, Aku TUHAN si Erdolat, enggo ngerana man negeri-negeri sekelewetndu, terlebih-lebih man Edom. Alu ukur puas rikut ras gombangna irebutna tanehKu janah iperajangna mbalmbalna.
6E maka ernubuatlah kam man taneh Israel; kataken man deleng-deleng, uruk-uruk, lau maler, ras man baluren-baluren, kerna cimberu ateKu, Aku TUHAN si Erdolat si dem alu ate nembeh erkiteken penggombangi ras penguru-nguru bangsa-bangsa e man bana. 7Ersumpah Aku, TUHAN si Erdolat, maka bangsa-bangsa si lit i sekelewet Israel la banci lang mela akapna Kubahan. 8Tapi i das deleng-deleng Israel, batang-batang kayu la banci lang erbulung ka mulihi jenari erbuah man guna bangsangKu Israel. Pedas me kam mulih ku kutandu. 9Aku kap ras kam, janah Aku netapkenca maka tanehndu e la banci lang iperjumai ras ierdangi ka mulihi. 10Bangsandu ertambah-tambah Kubahan. Kam ringan i bas kuta-kuta, janah kasa kai siruntuh nai ipajekkenndu mulihi. 11Subuk manusia bage pe rubia-rubiandu reh buena tetap Kubahan. Nai nari langa pernah bage pagi teremndu, sabap nterem pagi anakndu. Kubere kam nggeluh i bas negerindu bagi semalna kam nggeluh, janah ndauh akapndu senangen asangken si enggo-enggona. Kenca bage ietehndu me maka Aku kap TUHAN. 12O bangsangKu Israel, Kubaba kam mulihken gelah ringan ibas taneh e. Taneh e jadi tanehndu jine, janah asa ndigan pe anak-anakndu lanai kelihen ibahan tanehndu e.”
13Aku, TUHAN si Erdolat ngatakenca, “Tuhu taneh e igelari kalak taneh pengatah manusia dingen pengerampok anak-anak bangsa si ngianisa. 14Tapi mulai genduari nari taneh e lanai pengatah manusia, janah lanai irampokna anak-anakndu. 15Lanai perlu taneh e megiken penggombangi ras penguru-nguru kalak. Taneh e lanai ngerampok anak-anak bangsa e.” Bagenda me nina TUHAN si Erdolat.
Israel ipelimbarui
16Kata TUHAN seh man bangku nina, 17“O manusia si ermasap-masap; mbarenda, tupung kalak Israel ringan i bas tanehna, taneh e iliami alu lagu langkah ras perbahanenna. Lagu langkahna e bali Kuakap melketna ras diberu si sangana nguda bulanna. 18Taneh e iliami erkiteken ia munuh dingen nembah man berhala i je. E maka Kucurcurken pernembeh ateKu si gara man bana. 19Kuukum ia erkiteken lagu langkah ras perbahanenna; Kukerapken ia ku belang-belang negeri si ndauh. 20Ku ja ia lawes, i je gelarKu si badia igombangi kalak, sabap ikataken kalak, ‘Bangsa enda terpaksa nadingken negeri si ibereken Dibatana man bana.’ 21Si e erbahanca ceda ateKu, sabap ku ja saja pe kalak e lawes meling ibahanna gelarKu.
22Dage genduari pesehlah katangKu enda, Aku TUHAN si Erdolat, kempak kalak Israel: Kai si nandangi Kulakoken labo erkiteken kam kalak Israel, tapi guna gelarKu si Badia, si enggo ibahanndu meling i bas tep-tep negeri si idahindu. 23Kenca Kucidahken kebadian gelarKu si mbelin, gelar si enggo icemarkenndu i tengah bangsa-bangsa, kenca bage ieteh bangsa-bangsa e maka Aku kap TUHAN, si Erdolat enggo melasken rananKu. Kupake me kam lako encidahken man bangsa-bangsa maka badia kap Aku. 24Kubuat kam i bas kerina bangsa ras negeri nari, Kubaba mulih ku tanehndu jine. 25Kupirpirken man bandu lau meciho janah Kubersihken kam i bas berhala-berhala ras kerina perkara-perkara si debanna si enggo ngeliami kam. 26Kubereken man bandu pusuh si mbaru ras perukuren si mbaru. Kuagui pusuhndu si batu-batun, jenari Kubereken man bandu pusuh si lembut si nggit patuh. #Esek 11:19-20 27KesahKu Kutamaken i bas pusuhndu, janah tetap Kuperdiateken maka ikutkenndu undang-undangKu, janah patuh man perentah si Kubereken man bandu. 28Kenca bage ringan me kam i bas taneh si Kubereken man nini-ninindu. Kam jadi bangsangKu, janah Aku jadi Dibatandu. 29Kukelini kam gelah olanai lit kai pe si ngeliami kam. Kuperentahken man gandum gelah mbuah ia, gelah olanai kam kelihen. 30Kutambahi buah batang kayundu bage pe ulih jumandu, gelah olanai lit kelihen si erbahanca mela akapndu i tengah bangsa-bangsa. 31Teringet me kam nandangi lagu langkahndu si jahat dingen kesalahen si ilakokenndu, e maka ciga atendu ngenehen dirindu jine erkiteken dosa-dosa ras perbahanenndu si nggesuh. 32O Israel, perlu kuakap ietehndu maka kerina si e Kulakoken labo erkiteken kam. AteKu gelah igejapndu uga melana ras uga medunguna Aku erkiteken kai si ilakokenndu. Aku, TUHAN si Erdolat, enggo melasken katangKu.”
33 TUHAN si Erdolat ngatakenca nina, “Kenca Kubersihken kam i bas dosa-dosandu nari, Kubere ka kam ringan mulihi i bas kuta-kutandu janah Kupelepas ipajekkenndu mulihi si enggo runtuh e. 34Kerina kalak si biasa mentas arah jumandu ngidahsa uga perenna ras rambahenna juma e, tapi Kubere iperjumaindu ka mulihi kerina. 35Mamang pagi ate kalak kerina ngidah negeri si pernah jadi taneh si mesawang e, sabap enggo salih bagi Peken Eden, janah kuta-kuta si nai irontasken, irampasi, si enggo radas, genduari enggo iiani ras ibahan tembokna. 36Kenca bage negeri-negeri si pedeher, si lit denga tading, ietehna me maka Aku TUHAN, Aku kap si majekkenca mulihi kuta-kuta si enggo runtuh dingen nuani juma-juma si enggo terulang. Aku, TUHAN enggo melasken katangKu, janah la banci lang Kusehken katangKu e.”
37 TUHAN si Erdolat ngatakenca nina, “Kalak Israel Kubere ka mulihi mindo penampat man bangKu, janah Kubere ia ertambah-tambah teremna desken sada rarasen biri-biri. 38Kuta-kuta si genduari runtuh dem pagi i je jelma, bali ras Jerusalem si nai dem alu biri-biri si nandangi ipersembahken i bas paksa wari raya. Kenca bage ieteh Israel me maka Aku kap TUHAN.”
Currently Selected:
ESEKIEL 36: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
