ESEKIEL 30
30
TUHAN ngukum Mesir
1Jenari seh kata TUHAN man bangku, 2“O manusia si ermasap-masap ernubuatlah kam janah momoken kai si Kukataken:
Andiko, enggo reh wari cilaka,
3enggo ndeher warina TUHAN nehken ukumenNa.
Wari geltem, embun seh kapalna,
e me wari kiniseran man bangsa-bangsa,
4Kesusahen reh man Sudan.
I Mesir pecah peperangen.
Nterem i je kalak maten,
negeri e irampasi janah ibahan jadi runtuhen.
5I bas perang e melala mate tentera upahen i Sudan nari, Libia, Lidia, Arab, Kub, janah bangsangKu jine pe.”
6Nina TUHAN si Erdolat, “Mulai i Migdol nari i Utara terus ku Aswan i Selatan, kerina kalak si mpertahanken Mesir mate i bas peperangen. Tentera kemegahen Mesir ikernepken. Aku, TUHAN si Erdolat ngatakenca. 7Negeri e jadi sada negeri si melungen kal i bas kerina negeri-negeri, janah kuta-kutana keri kal runtuh. 8Tupung Mesir Kuciluk janah kerina si mpertahankenca mate, jenari ietehna me maka Aku kap TUHAN.
9Adi wari e enggo seh, janah Mesir enggo ikernepken, Kusuruh me persuruhen tare kapal nengget Sudan; la iarapna jadi si e man bana, e maka gentar ia kerina. Wari e enggo reh!”
10Nina TUHAN si Erdolat, “Kupake Raja Nebukadnesar i Babilon nari lako engkeriken kebayaken Mesir. 11Nebukadnesar ras tenterana si la meteh mekuah reh engkernepken negeri e. Iserangna Mesir alu pedang, janah amparen me mait i belang-belang negeri e. 12Lau Nil Kukerahi janah Kutamaken Mesir i teruh kuasa kalak jahat. Bangsa si deban mahanca getem kerina negeri e.” Bagenda nina TUHAN.
13Nina ka TUHAN tole, “Kukernepken me gana-gana ras dibata-dibata palsu i Mempis. Lanai lit ise pe si ngerajai Mesir, janah gentar kerina bangsa e Kubahan. 14Terulang Kubahan Mesir selatan, janah Kuciluk Kuta Soam i utara. Ibukotana, Tebe Kuukum, 15janah kebayakenna Kukernepken. Kutelkasken nembeh ateKu man Pelusium, kuta si jadi benteng negeri Mesir. 16Kuciluk negeri Mesir maka mesui kal ate Pelusium. Runtuh me tembok kuta Tebe, jenari banjir me kuta e. 17Anak perana kuta Heliopolis ras Bubastis mate i bas perang e, janah kalak si debanna ibaba jadi tabanen. 18Kenca kuasa Mesir Kuruntuhken janah gegeh si iagahkenna Kukeriken, gelap me Tahpanhes. Embun mekapal nutupi Mesir, janah kerina penduduk kuta-kutana ibaba jadi tabanen. 19Kenca bagenda pengukumKu Mesir, itehna maka Aku kap TUHAN.”
Kuasa Raja Mesir si enggo runtuh
20I bas wari pitu, bulan si pemena, tahun si pesepuluh sadaken, sanga kami i pembuangen, seh kata TUHAN man bangku nina: 21“O manusia si ermasap-masap, enggo Kupenggelken tan raja Mesir. La lit ise pe si malutisa, la lit ise pe si ngerempuisa tanna si penggel e gelah malem, maka megegeh mulihi ngawatken pedang. 22Dage enda me katangKu, Aku TUHAN si Erdolat: Aku kap imbang raja Mesir. Kupenggelken tanna duana, subuk si langa penggel genduari, bage pe si enggo penggel, gelah ndabuh pedang e i bas tanna nari. 23Kukerapken me kalak Mesir e ku belang-belang doni. 24Kenca bage megegeh Kubahan tan raja Babilon, jenari Kutamaken pedangKu i bas tanna. Tapi Kupenggelken tan raja Mesir maka ia ndehereng dingen mate i lebe-lebe musuhna. 25Tuhu, Kupekote me ia, janah Kupegegehi raja Babil. Kenca Kubereken bana pedangKu, janah iawatkenna kempak Mesir, kerina kalak metehsa maka Aku kap TUHAN. 26Kukerapken kalak Mesir ku belang-belang doni. Kenca bage ietehna maka Aku kap TUHAN.”
Currently Selected:
ESEKIEL 30: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
