ESEKIEL 27
27
Ende-enden penguburen guna Tirus
1Kata TUHAN seh man bangku nina, 2“O manusia si ermasap-masap, endekenlah ende-enden penguburen man kuta Tirus, 3kuta si ingani i tepi lawit, si erbahan perbinagan ras kerina kalak si ringan i tepi lawit. Turiken man bana katangKu, TUHAN si Erdolat, bagenda:
O Tirus, alu ukur meganjang nindu ngerana,
‘KinijilenKu la lit ngelawanca.’
4Rumahndu tempa-tempa i lawit,
kam ipanteki desken sada kapal si mejile.
5Dingdingndu e me kayu aras Deleng Hermon,
tiang layarndu kayu cemara Libanon.
6Si ibahan jadi dayung-dayungndu, kayu jati i Basan nari.
Geladakndu kayu cemara i Siprus nari,
ihiasi alu gading si meherga.
7Layarndu, linen sulamen i Mesir nari,
i dauh nari pe murah nandaisa.
Tenda-tendandu kain alus si mejile,
kain ungu i Kiprus nari.
8Tukang dayungndu i Sidon ras Arwad nari.
Anak buahndu, pelaut-pelaut si beluh.
9Tukang-tukang kayu i bas kapal e,
e me pande tua i Bablas nari.
Pelaut i bas tep-tep kapal,
reh nukuri barang-barangndu.
10Serdadu-serdadu Persia, Lidia ras Libia ikut jadi tenterandu. Isangketkenna ampang-ampangna ras topi wajana i bas ingan tenterandu. Italukenna musuh-musuhndu tama kemuliandu. 11Serdadu-serdadu i Arwad nari engkawal tembokndu, kalak Gamat erjaga i bas menarandu. Isangketkenna ampang-ampangna i bas tembok-tembokndu. Kalak ndai me erbahanca maka seh kal jilendu.
12Erbinaga kam i Sepanyol, jenari ibuatndu pirak, besi, timah, ras timah mbiring tukar barang-barangndu si mbue la teralang. 13Erbinaga kam i Junani, i Tubal ras i Mesek, janah barang-barangndu itukarkenndu ras budak-budak bage pe barang-barang tembaga. 14Itukarkenndu barang-barangndu ras kuda pengerintak gereta, kuda perang, bage pe kuda baban i Bet-Togarma nari. 15Penduduk Rodus pe reh erbinaga ku kam; penduduk si ringan i daerah tepi lawit nukur barang-barangndu alu gading ras kayu mbiring. 16Perbinaga i Siria nari nukur barang-barangndu ras ulih tanehndu si melala e. Iberekenna bandu jadi penukur barang-barangndu e batu permata, uis meherga, uis si enggo isulam, linen alus, batu permata karang, batu permata rubia. 17Juda ras Israel mereken gandum, tengguli, minak saitun ras rempah-rempah jadi penukur barang-barangndu. 18-19Perbinaga i Damaskus nari nukur binagandu ras ulih tanehndu, janah jadi galarna iberekenna bandu anggur i Helbon nari bage pe mbulu biri-biri i Sahar nari, bage pe besi si enggo itepa ras rempah-rempah. 20Perbinaga i Dedan nari nukarken kain pelana ras barang-barangndu. 21Perbinaga Arab ras raja-raja negeri Kedar nukur barang-barang binagandu alu anak biri-biri ras kambing. 22Saudagar-saudagar i Syeba ras Raama nari nukur barang-barangndu alu permata, emas ras rempah-rempah si mejilena. 23Kuta-kuta Haran, Kane, Eden, saudagar-saudagar Syeba, kuta-kuta Assur ras Kilmad kerina erbinaga ras kam. 24Idayakenna man bandu uis si la tanggung jilena, uis si meherga, uis si enggo i sulam, permadani si erbage-bage rupana bage pe nali si nteguh. 25Barang-barangndu ibaba tare kapal-kapal barang si galang.
Kam desken kapal i tengah lawit,
dem alu barang-barang si mberat. #Ket 18:11-19
26Tupung kam ikayuhken ku tengah lawit,
angin timur nggedapken kam ndauh i daraten nari.
27Kerina barang-barang kebayakenndu,
kerina anak kapalndu,
tukang kayu kapal ras saudagar-saudagarndu,
kerina serdadu-serdadundu si lit i bas kapal,
la lit si tading-tading, kerina gedap ku lawit,
tupung kam karam.
28Sora nderkuh anak kapal si karam e,
terbegi erlolingen i tepi lawit.
29Genduari kerina kapal e enggo itadingken,
kerina anak kapal enggo seh i daraten.
30Kam ingandungina tangis ia, ceda atena.
Icaburkenna abu ku takalna, i babo taneh erguling-guling ia.
31Erkiteken kam itakal-tabukenna bana,
ipakena uis guni tanda ate ceda.
Tangis ia kerina erkiteken kam,
ingandungina kam alu pusuh si getem.
32Kenca bage iendekenna man bandu, ende-enden penguburenndu,
‘O Tirus, ise kin terpeseri ras kam,
Tirus si genduari sinik i teruh lawit?
33Tupung barang-barangndu lawes ngepari lawit,
icukupindu kerina keperlun bangsa-bangsa.
Raja-raja ibahanndu bayak,
erkiteken barang-barang kebayakenndu.
34Genduari kam enggo karam,
enggo gedap i bas lawit si mbages.
Barang-barangndu ras si erdahin ras kam,
bene ras kam i bas lawit si mbages.’
35Kerina kalak si ringan i tepi lawit sengget megiken kejadin si ngkenai kam. Subuk raja-rajana pe gentar; arah ayona teridah maka mbiar kal ia. 36Kam enggo kernep, masap seh rasa lalap. Janah kerina saudagar-saudagar i belang-belang doni gentar, sabap mbiar ia tahsa ia pe jumpa cilaka bagi kam e.”
Currently Selected:
ESEKIEL 27: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
