ESEKIEL 22
22
Kejahaten Jerusalem
1Kata TUHAN seh man bangku nina, 2“O manusia si ermasap-masap, enggo sikap kam ngadili kuta si dem alu pemunuh-pemunuh e? Petangkas man bana kerina perbahanen-perbahanenna si macik e. 3Kataken man kuta e katangKu, Aku TUHAN si Erdolat bagenda: Erkiteken enggo bage buena penduduk si enggo ibunuhndu, janah enggo iliamindu bandu alu nembah man berhala-berhala, e maka paksandu enggo seh. 4Kam ersalah erkiteken munuh, janah keliamen erkiteken gana-gana bekasndu erbahan, e maka warindu enggo seh, paksandu enggo keri. Kupelepas kam iuru-uru janah igombang-gombangi kerina bangsa ras negeri-negeri. 5Subuk negeri si ndauh bage pe si ndeher megombang man bandu erkiteken kejahaten ras kinigutulenndu. 6Kerina peminpin-peminpin Israel ernalem kempak gegehna jine, janah munuhi dahinna. 7La lit sada pe i bas kuta e si mehamat man orang tuana. Bangsa si deban itipuna janah idaramindu untungndu i bas kesusahen diberu balu-balu ras anak melumang. #Kel 20:12; 22:21-22; Ul 5:16; 24:17 8La sitik pe kam mehamat kempak ingan-ingan si badia, janah wari Sabat la iperdiatekenndu. #Im 19:30; 26:2 9Piga-piga kalak pendudukndu erbahan kesaksin si guak gelah kalak iukum mate. Deba ipanna persembahen-persembahen si ipersembahken man gana-gana. Deba erlua-lua. 10Deba ipedemina nande ngudana. Deba ipaksana diberu si sangana nguda bulanna medem ras ia. #Im 18:7-20 11Deba erlua-lua, si debanna igodana permainna tah pe turangna pedauh nande. 12Lit ka pe pendudukndu jadi pemunuh upahen, deba mperbungaken duit man seninana bangsa Israel janah ipebayakna bana alu muat keuntungen i bas kesusahen seninana e. Enggo ilupakenna Aku.” Bagenda me nina TUHAN. #Kel 22:25; 23:8; Im 25:36-37; Ul 16:19; 23:19
13“Erkiteken si e, genduari kutepuk me kam erkiteken kam ngerampuk dingen munuh e. 14Akapndu kin kam pang denga tah pe ngasup denga ngawatken tanndu adi enggo dung kam Kuukum? Aku, TUHAN enggo melasken kata, janah Kusehken kap KatangKu. 15Kukerapken pendudukndu ku tep-tep negeri ras bangsa, janah Kupengadi kerina perbahanenndu si jahat e. 16Erkiteken si e igombangi bangsa-bangsa si deban me kam, kenca bage itehndu me maka Aku kap TUHAN.”
Api pengane
17Kata TUHAN seh man bangku nina, 18“O manusia si ermasap-masap, kalak Israel e tuhu-tuhu la erguna bangKu. Bangsa e desken campuren tembaga, timah, besi, timah mbiring si tading jadi sampah i bas ginuhur pengane-nganen. 19Dage, Aku, TUHAN si Erdolat, ngatakenca maka bangsa e tuhu-tuhu la erguna bali ras sampah ndai. Kupepulung me ia kerina i Jerusalem, 20bali ras pirak, tembaga, besi, timah mbiring, ras timah si itamaken i bas ginuhur pengane-nganen. Pernembeh ras gara ateKu ngelebur bangsa e, bali ras api si ngelebur besi. 21Tuhu, Kupepulung me ia i Jerusalem. Kupegara api pernembehKu i teruhna, jenari Kulebur ia. 22Kulebur ia i Jerusalem, bali ras timah si melebur i bas ginuhur. Kenca bage itehna maka Aku, TUHAN, enggo encurcurken pernembeh ateKu man bana.”
Dosa peminpin-peminpin Israel
23Seh kata TUHAN man bangku nina, 24“Kataken man bangsa Israel maka negerina la badia. Erkiteken si e Kuukum me negeri e perban nembeh ateKu. 25Peminpin-peminpinna bali kap ras singa si erdengum kenca njerngem rubia-rubia. Peminpin-peminpin e munuh bangsana, jenari ibuatna kerina duit ras erta si terbuatca. Erkiteken ia munuh, ibahanna melala pernanden jadi mbalu. 26Imam-imam ngelanggar Undang-undangKu janah la lit sitik pe kehamatenna nandangi kai si badia. La lit sitik pe ibahanna lainna nandangi kai si badia ras kai si la badia. La iajarkenna kai lainna barang-barang si bersih ras si la bersih rikutken aturen agama, janah la diatena pe wari Sabat. Erkiteken si e, bangsa Israel la mehamat man bangKu. #Im 10:10 27Pegawai-pegawai kerajan bali ras serigala si encaing-caing rubia-rubia si enggo ijerngemna. Munuhi peminpin-peminpin e lako ndatken kebayaken. 28Nabi-nabi muniken dosa-dosa enda ndai kerina desken kalak si encet dingding alu kapur mbentar. Idahna pengenehenen si la tuhu, janah ibahanna nubuat-nubuat si guak. Ikatakenna maka kata TUHAN si Erdolat nge si ibelaskenna, tapi Aku, TUHAN, la pernah ngerana man bana. 29Kalak bayak nipu ras ngerampuk. Jahat perbahanenna nandangi kalak musil janah idaramina untung i bas kalak musil ras i bas kalak pertandang. 30Kudarami kalak si ngasup majekken tembok, tah pe si ngasup tedis i bas ingan-ingan i ja tembok e enggo runtuh lako mpertahanken negeri e tupung Kukernepken ateKu negeri e alu pernembeh ateKu, tapi la lit sada pe Kudat. 31Erkiteken si e Kucurcurken me pernembeh ateKu man bangsa e desken sada api si ngkernepken ia perban kai si enggo ilakokenna.” Bagenda me nina TUHAN si Erdolat.
Currently Selected:
ESEKIEL 22: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
