ESEKIEL 20
20
Peraten Dibata ras penimbang manusia
1I bas wari si pesepuluhken, bulan si pelimaken, tahun si pepituken i bas paksa kami ibuang, piga-piga kalak peminpin Israel reh ndahi aku nungkun peraten TUHAN. Kenca ia kundul kerina i lebe-lebengku, 2e maka nina TUHAN man bangku, 3“O Manusia si ermasap-masap, ngeranalah man kalak enda kerina, janah turiken man bana katangKu, TUHAN si Erdolat, nindulah: Atendu kin reh nungkun peratenKu? Erkiteken Aku tuhu-tuhu Dibata si nggeluh, la Aku nggit isungkunndu kerna kai pe. Enda me katangKu, Aku TUHAN si Erdolat.
4Enggo kin kam sikap ndabuhken ukumen man bana, o manusia si ermasap-masap? Adi enggo, lakokenlah. Persingeti man bana kai perbahanen si macik si ibahan nini-ninina nai. 5Turikenlah man bana katangKu enda. Tupung Kupilih Israel, erpadan Aku man bana. Kupetangkas diringKu man bana i Mesir, janah Kukataken man bana: ‘Aku kap TUHAN Dibatandu.’ #Kel 6:2-8 6Tupung si e me Kupadanken man bana maka Kubaba me ia ndarat i Mesir nari, janah Kutaruhken ku negeri si enggo Kupilih, sada negeri si bayak dingen mehumur, negeri si mehulina kal i belang-belang doni. 7Kusuruh ia menterken gana-gana kekelengenna si nggesuh, janah ola iliamina bana alu dibata-dibata Mesir si la tuhu, sabap Aku kap TUHAN Dibatana. 8Tapi isimbakna Aku, la ia nggit megiken. La iambekkenna gana-gana si nggesuh, la itadingkenna dibata-dibata Mesir e. Tupung si e turah perukuren i bas Aku lako nehken gara ateKu man bana i negeri Mesir. 9Tapi si e la Kulakoken, sabap adi Kuukum ia, igombangi kalak kap denggo gelarKu i tengah-tengah bangsa i ja ia sangana ringan. Sabap i lebe-lebe bangsa inganna tading e enggo Kumomoken maka Kutaruhken ateKu bangsa Israel ndarat i Mesir nari.
10Dage Kubaba ia ndarat i Mesir nari kempak gurun pasir. 11Kubereken man bana perentahKu janah Kuajarken Undang-undangKu si mereken kegeluhen man kasa kalak si ngikutkenca. #Im 18:5 12Kusuruh ia enghamati wari Sabat jadi sada tanda perpadanenKu ras ia, lako mpersingeti ia maka Aku, TUHAN, enggo mperbadiaken ia. #Kel 31:13-17 13Tapi i bas gurun pasir e pe isimbakna Aku. Ilanggarna Undang-undangKu, janah ilawanna perentahKu, si mereken kegeluhen man kerina kalak si matuhisa. Lanai tanggung pengeliamina wari Sabat. Tupung si e turah perukuren i bas Aku lako nehken gara ateKu man bana i gurun pasir e lako engkernepken ia. 14Tapi si e la Kulakoken sabap adi Kukernepken ia, igombangi kalak pagi gelarKu i tengah bangsa-bangsa si enggo ngidah Aku mabai Israel ndarat i Mesir nari. 15E maka erpadan Aku i gurun pasir maka la ia Kubaba ku negeri si enggo Kubahan jadi sikerajangenna, sada negeri si bayak dingen mehumur, negeri si mehulina kal i belang-belang doni. #Bil 14:26-35 16Kupadanken si e erkiteken itulakna perentahKu, ilanggarna Undang-undangKu, janah iliamina wari Sabat; ulin akapna nembah man berhala-berhala.
17Tapi mekuah ateKu man bana, e maka la ia Kukernepken i gurun pasir e. 18Tapi man anak-anakna Kukataken, ‘Ola pake undang-undang si ibahan nini-ninindu, ola ikutken kebiasan-kebiasan, ola liami bandu alu berhala-berhala. 19Aku kap TUHAN Dibatandu. Ikutkenlah Undang-undangKu ras perentahKu. 20Bahanlah Sabat sada wari si badia, gelah e jadi sada tanda perpadanenKu ras kam, maka arah e ipersingeti man bandu maka Aku kap TUHAN Dibatandu.’
21Tapi anak-anakna e pe ngelawan Aku ka nge. Ilanggarna Undang-undangKu janah la ipatuhina perentahKu si mereken kegeluhen man kalak si ngikutkenca. Iliamina wari Sabat. Tupung si e turah perukuren i bas Aku lako nehken gara ateKu i gurun pasir e, janah munuh ia kerina. 22Tapi si e la Kulakoken, sabap adi Kubunuh ia kerina, igombangi kalak pagi gelarKu i tengah-tengah bangsa si enggo ngidah Aku maba bangsa e ndarat i Mesir nari. 23Erkiteken si e Kubahan ka perpadanen si deban ras ia i bas gurun pasir. Ersumpah Aku maka Kukerapken ia ku belang-belang doni enda. #Im 26:33 24Si e Kubahan erkiteken ilawanna perentahKu, ilanggarna Undang-undangKu, iliamina wari Sabat, janah isembahna berhala-berhala si isembah nini-ninina nai.
25Kenca bage Kubereken man bana undang-undang si la mehuli dingen perentah si la mereken kegeluhen. 26Kupelepas ia ngeliami dirina alu persembahen-persembahenna, bage pe mpersembahken anakna sintua jadi persembahen tutungen. Enda sada ukumen kap man bana lako encidahken maka Aku kap TUHAN.
27Dage o manusia si ermasap-masap, genduari pesehlah katangKu, Aku TUHAN si Erdolat, man kalak Israel e. I bas perkara si enda pe nini-nini bangsa e megombang man bangKu arah kelapatuhenna. 28Kenca Kutaruhken ia ku negeri si enggo Kupadanken man bana, janah kenca iidahna i je uruk-uruk si meganjang ras kayu si meratah, minter ipersembahkenna persembahenna i bas ingan-ingan e kerina. Ipekekena rawangku arah persembahen tutungen si ibahanna bage pe arah lau anggur si ipersembahkenna. 29Kusungkun ia, ningKu: Ingan si meganjang si kuga kin si idahindu e? E maka mulai i bas paksa e nari ingan e enggo igelari ‘Ingan si Meganjang’
30Genduari pesehlah katangku, Aku TUHAN si Erdolat, kempak kalak Israel e, bagenda: Engkai maka ibahanndu ka dosa bali ras dosa si ibahan nini-ninindu nai, janah papak perdalanndu ngikutken perlangkahna si macik e? 31Seh wari si sendah pe tetap nge iliamindu bandu alu mereken persembahen ras nutung anak-anakndu jadi persembahen man berhala e. Jenari pang denga ka kam mindo pedah i bas Aku nari? Ersumpah Aku, TUHAN si Erdolat, Dibata si nggeluh, maka la Aku nggit mereken pedah man bandu. 32I bas pusuhndu ersura-sura kam maka atendu bali ras bangsa-bangsa si deban, bali ras bangsa-bangsa si ringan i negeri-negeri si deban dingen ersembah man batang-batang kayu ras batu galang. Tapi si enda ndigan pe la banci jadi.”
Dibata ngukum ras ngalemi bangsaNa
33“Erkiteken Aku TUHAN si Erdolat, Dibata si nggeluh, Kupersingeti kam erkiteken nembah ateKu, Kuperentah me kam alu tan si megegeh, maka igejapndu kuasangKu. 34Kucidahken bandu kuasangKu ras rawangKu tupung Kupepulung kam dingen Kubaba mulih i bas kerina negeri-negeri nari, i ja gelgel nari kam enggo ikerapken. 35Kutamaken kam ku ‘Gurun pasir Bangsa-bangsa’, janah i je Kudabuhken ukumen man bandu sanga kita petala-tala. 36Kuukum me kam genduari bali ras nini-ninindu nai pe Kuukum i Gurun Pasir Sinai, bage nina TUHAN si Erdolat.
37Meser perbahanenKu man bandu gelah alu bage patuh kam man perpadanenKu. 38I tengah-tengahndu nari Kupedauh kerina kalak perdosa ras pemberontak. Kupedarat ia i bas negeri inganna tading genduari e, tapi la Kupediat ia mulih ku negeri Israel. Kenca bage itehndu me maka Aku kap TUHAN.”
39Nina TUHAN si Erdolat, “O kalak Israel kerina, bahanlah bagi ate-atendu! Teruskenlah nembah man berhala-berhalandu! Tapi Kupersingeti kam, kenca si e arus kam erkemalangen man bangKu janah olanai icemarkenndu gelarKu si badia alu mereken persembahen man berhala-berhalandu. 40I bas negeri e, i das delengKu si Badia, deleng si meganjang nu Israel, kerina kam kalak Israel, nembah man bangKu i je. I bas ingan e, malem ateKu ngidah kam, janah Kuarapken maka ibabandu bangKu persembahen-persembahenndu, persembahen si mehulina, ras pemerendu si badia. 41Kenca Kubaba kam ndarat i negeri-negeri inganndu ikerapken e nari, janah kenca kam Kupepulung kerina, Kualoken me persembahen si itutungndu, janah iidah bangsa-bangsa me maka badia kap Aku. 42Kenca Kubaba kam mulih ku Israel, negeri si enggo Kupadanken man nini-ninindu, i je itehndu me maka Aku kap TUHAN. 43Kenca bage iingetndu me kerina perbahanenndu si la mehuli, janah kuga kam ngeliami dirindu jine. Ciga atendu bandu erkiteken kerina kejahaten-kejahaten si enggo ilakokenndu. 44Janah adi la Kubalas man bandu sue ras kejahaten ras dosa-dosandu, ietehndu min o kalak Israel, maka Aku kap TUHAN, janah si e Kulakoken guna kiniulin gelarKu.” Bagenda me nina TUHAN si Erdolat.
Api Selatan
45E maka seh kata TUHAN man bangku nina, 46“O manusia si ermasap-masap, tataplah ku Selatan, jenari ngerana kam kerna negeri Selatan janah pandanglah kerangenna. 47Suruh kerangen selatan megiken kai si ikataken TUHAN si Erdolat nina, ‘Begiken! Genduari Kupegara api, jenari kerina batang kayundu, keri meseng ibahanna, subuk si meratah denga bage pe si enggo kerah. La lit kai pe si banci mahanca nimpet. Api e jajat i Selatan nari terus ku utara, janah kerina kalak nggejap uga lasna api e. 48Kerina kalak ndai ngidahsa maka Aku, TUHAN, Aku kap si enciluk kerangen e, janah ise pe la ngasup nimpetisa.’ ” 49Tapi ningku man TUHAN, “O TUHAN si Erdolat, ola min aku isuruhNdu melasken si e! Sabap kerina kalak enggo jungut-jungut; ikatakenna maka aku rusur ngerana alu anding-andingen.”
Currently Selected:
ESEKIEL 20: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
