KELUAREN 2
2
Musa tubuh
1Sanga si e, sekalak suku Lewi erjabu ras sekalak diberu si sada suku ras ia, 2jenari ipupusna me sekalak anak dilaki. Kenca idahna rupa anakna e mejile tuhu-tuhu, e maka ibunikenna telu bulan dekahna. #Perb 7:20; Heb 11:23 3Tapi kenca lanai terbunikenca, ibuat nande anak e sada keranjang si ibahan i bas batang rengo nari, jenari ilapisina alu damar gelah ola ku bas lau. Itamakenna anakna ku bas keranjang e, jenari icibalkenna i tengah-tengah dukut si mbages i tepi Lau Nil. 4I dauh-dauh nari tedis turang anak e ngenehen tah kai kari jadi man bana.
5E maka reh me puteri raja ridi ku lau belin e. Sanga ia ridi, erdalan-dalan dayang-dayangna i tepi lau. Rempet idah puteri raja keranjang e i tengah-tengah dukut si mbages, e maka minter isuruhna sekalak suruh-suruhenna si diberu muatsa. 6Italangi puteri raja keranjang e, idahna sekalak anak dilaki i bas. Tangis anak e, e maka mekuah atena. “Ugapa pe anak kalak Heber enda,” nina.
7Kenca bage isungkun turangna ndai puteri raja nina, “Ntah kulegiken atendu sekalak diberu bangsa Heber gelah ipepinemna anak enda?”
8“Merandal, to legiken,” nina. E maka lawes singuda-nguda ndai ndilo nande anak e. 9Ikataken puteri raja man nande anak e nina, “Baba anak enda, pekena-kena, kubereken pagi upahndu.” E maka ibabana ras ipekena-kenana anak e. 10Kenca enggo cukup umur anak e, e maka itaruhkenna man puteri raja. Ibahanna jadi anak angkatna. Nina i bas ukurna, “Kuangkat ia i bas lau nari, e maka kubahanlah gelarna Musa.” #Perb 7:21
Musa lompat ku taneh Midian
11I bas sada wari kenca Musa enggo dewasa, ndarat ia njumpai bangsana, bangsa Heber. E maka idahina ku ingan bangsa e ipaksa ndahiken dahin si mberat. Tupung si e idahna pe sekalak bangsa Mesir munuh sekalak bangsa Heber, teman sebangsana. #Heb 11:24 #Perb 7:23-28 12Ipernehen Musa ku sekelewetna, janah kenca idahna maka ise pe la mperdiateken ia, ibunuhna kalak ndai, jenari itanemkenna i bas kersik. 13Pepagina ndarat ka ia, idahna dua kalak Heber sangana rubat. Ikataken Musa man kalak si ersalah nina, “Engkai maka ipekpekndu teman sebangsandu?”
14Tapi erjabap ia nina, “Ise si ngangkat kam jadi peminpin ras hakim kami? Ntah atendu munuh aku bagi enggo ibunuhndu bangsa Mesir nderbih?” E maka mbiar Musa janah nina i bas ukurna, “Tentu enggo iteh kalak kai si enggo kubahan.” 15-16Kenca ibegi raja kerna kai si enggo jadi, e maka idaramina dalan munuh Musa, tapi lompat Musa jenari lawes ia ringan i taneh Midian.
I bas sada wari, tupung ia kundul deherken sada sumur, reh me pitu kalak singuda-nguda, atena muat lau man inemen biri-biri ras kambing bapana. Singuda-nguda si pitu e, e me anak Jetero, imam Midian. #Perb 7:29; Heb 11:27 17Tapi ipelawes piga-piga kalak permakan ia pituna. E maka keke Musa nampati ia janah iberena minem asuh-asuhenna ndai. 18Kenca singuda-nguda e mulih jumpa ras bapana, isungkun bapana ia nina, “Engkai maka bage lampasna kam mulih sendah?”
19“Lit sekalak kalak Mesir reh nampati kami sanga kami igasgasi permakan-permakan,” nina erjabap. “Tambah si e itimbana lau man kami janah iberena minem asuh-asuhen kami.”
20“I ja ia?” nina nungkun man anakna. “Engkai maka itadingkenndu ia i darat ah? Dilo, maka ia man.”
21Bage me Musa pe setuju ringan i je. Jenari iserehken Jetero anakna, Sipora, man Musa. 22Ipupusna sekalak anak dilaki. Nina Musa i bas ukurna, “Aku sekalak pertandang i bas ingan enda, e maka kubahanlah gelarna Gersom.”
23Kenca piga-piga tahun dekahna, mate me raja Mesir e, tapi kalak Israel tetap denga nge kesah-kesah perban perbudaken janah nderkuh pe ia mindo penampat. Penderkuhna e seh man Dibata, 24si megi sorana tangis, janah iinget Dibata padanNa ras Abraham, Isak ras Jakup. #Kej 15:13-14 25Idah Dibata bangsa Israel iperbudak, janah iperdiatekenNa bangsa e.
Currently Selected:
KELUAREN 2: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.