ESTER 4
4
Mordekai mindo penampat Ester
1Kenca ieteh Mordekai kerina si enggo jadi, icaingkenna bajuna tanda atena ceda. Kenca bage ipakena uis guni, icaburkenna abu ku takalna, jenari erdalan ia ku tengah kuta janahna ngandung nderkuh-nderkuh alu pusuh getem. 2Dungna seh me ia i kerabangen istana. La ia ku bas, sabap la ise pe banci bengket adi make uis guni. 3I belang-belang kerina propinsi, i ja kenca perentah raja e imomoken, minter terbegi sora tangis megang i bas kalak Jahudi. Erpuasa ia, tangis ras ngandung, janah menam kerina make uis guni.
4Asum suruh-suruhen Ester si diberu ras si dilaki nuriken perbahanen Mordekai e man bana, lesek kal atena. Ikiremkenna uis man paken Mordekai gelah itangtangina uis guni e, tapi la nggit Mordekai ngalokenca. 5Kenca bage idilona Hatah, sekalak dilaki si itugasken raja jadi suruh-suruhen Ester, jenari isuruhna ia njumpai Mordekai lako ngorati kai si enggo jadi janah ngkai maka bage perbahanenna. 6Lawes Hatah njumpai Mordekai i bas taneh lapang deherken kerabangen istana. 7Ituriken Mordekai kerina si enggo jadi, bage pe asa kai buena duit si ipadanken Haman lako iberekenna man perbendaharan raja adi kerina kalak Jahudi enggo ibunuh. 8Ibereken Mordekai man Hatah salinen surat raja si enggo imomoken i Susan. I bas surat e iperentahken maka kerina kalak Jahudi arus ikernepken. Ipindo Mordekai maka salinen surat perentah e ibereken man Ester janah gelah iterangkenna uga kecibalna si tuhuna. Tole ipindo Mordekai gelah lawes Ester ngadap raja lako mindo perkuah ate raja nandangi bangsana kalak Jahudi. 9Kenca bage mulihken Hatah ku istana, iturikenna man Ester kai si ikataken Mordekai ndai. 10Jenari isuruh Ester ka ia mulihken ndahi Mordekai nehken berita enda; 11nina Ester, “Asa kai kalak si ndahi raja alu la leben idilo raja, subuk dilaki, bage pe diberu, arus iukum mate. Enda me aturen; janah aturen si enda kerina kalak metehsa, mulai i bas penasehat-penasehat raja nari terus ku kalak si ringan i propinsi-propinsi. Sada ngenca dalan pulah i bas aturen e nari, e me: adi idudurken raja ciken emas kerajan man bana lako ndilosa, e maka la ia ibunuh. Tapi enggo lit sebulan dekahna aku la idilo raja.”
12Kenca ialoken Mordekai kata Ester enda ndai, 13itenahkenna ka mulihken kata pertenget enda nina, “Ola iarapkenndu maka kam sikapen asangken kalak Jahudi si deban erkiteken kam ringan i bas istana. 14Adi sinik pe kam i bas paksa-paksa si bagenda, ugapa pe reh nge penampat man kalak Jahudi tah i ja nari gia, janah kalak Jahudi e la banci lang selamat nge; tapi kam ugapa pe mate, janah keluarga si itadingken bapandu imasapken. Banci jadi guna nampati bangsandu nge maka kam enggo iangkat jadi kemberahen.”
15E maka itenahken Ester perkatan enda man Mordekai, 16“To, pepulunglah kerina kalak Jahudi si lit i kuta Susan enda; ertoto dingen erpuasalah kam kerina guna aku. Ola kai pe pan tah iinemndu telu wari telu berngi dekahna. Aku ras suruh-suruhenku si diberu pe bage ka ibahan kami. Kenca bage lawes aku ndahi raja, aminna gia e ngelanggar aturen. Adi terpaksa kin aku mate guna si e; mate pe labo dalih.”
17Kenca bage lawes Mordekai, jenari ibahanna kai si nikataken Ester ndai.
Currently Selected:
ESTER 4: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
