ULANGEN 29
29
Perpadanen TUHAN man Israel i negeri Moap
1Enda me aturen perpadanen si ibahan TUHAN man bangsa Israel, sue ras si iperentahkenNa man Musa i negeri Moap. Kerina perpadanen e, jadi tambahen perpadanen si enggo ibahan TUHAN ras kalak e i das Deleng Sinai.
2Ipepulung Musa kerina bangsa Israel; kenca pulung ngerana ia, “Enggo idahndu jine kai si ibahan TUHAN man raja Mesir ras pegawe-pegawena, bage pe man kerina isi negerina. 3Idahndu mara si mbelin, ras tanda-tanda kuasa si ibahan TUHAN. 4Tapi seh ngayak genduari langa ibereNa kam ngerti kai si enggo ialamindu e. 5Empat puluh tahun dekahna TUHAN ngarak-ngarak kam mentasi gurun pasir, tapi uis ras selopndu pe la merigat. 6La lit roti si man panganndu, la lit anggur ntah bir si man inemenndu, tapi TUHAN nikapkenca keperlunndu, guna ngajar kam gelah ietehndu maka ia nge Dibatandu. 7Janah kenca kita enggo seh i bas ingan enda, Raja Sihon i Hesbon nari ras Raja Og i Basan nari reh ngelawan kita. Tapi talu sibahan ia. #Bil 21:21-35 8Sibuat negerina, sibagiken e man suku Ruben ras Gat ras man setengah suku Manase. #Bil 32:33 9E maka ikutkenlah alu tutus kerina aturen perpadanen enda, maka kam rulih i bas ndahiken kerina si idahikenndu.
10Sendah tedis kam kerina i adep-adepen TUHAN Dibatandu, subuk peminpin-peminpinndu, pegawe-pegawendu, kam si dilaki 11ras si diberu ras danak-danak ras bangsa si deban si tading ras kam, si muat ranting ras ngelegi laundu. 12Kam sendah i jenda muat bagin ngaloken tanggung jawab i bas perpadanen si ibahan TUHAN Dibatandu ras kam, 13gelah genduari banci itetapken TUHAN kam selaku bangsaNa ras IA Dibatandu, sue ras si ipadankenNa man bandu ras man nini-ninindu Abraham, Isak, ras Jakup. 14Labo ras kam ngenca TUHAN erbahan perpadanen rikut ras tanggung jawabna e. 15IA erbahan perpadanen ras kerina kita si tedis i adep-adepenNa wari enda, ras bage pe man sinursurta si langa tubuh pe.
16Ingetndu kuga geluhndu sanga i Mesir, kuga nanamna mentasi negeri bangsa-bangsa si deban. 17Idahndu kuga cigana ate ngenehen dibata-dibatana si ibahan i bas kayu, besi, pirak ras emas nari. 18Jaga maka kerina si tedis i jenda sendah, subuk dilaki ntah diberu, keluarga ntah suku-suku, la nundalken TUHAN Dibatanta alu nembah man dibata-dibata bangsa si deban, erkiteken nembah man dibata-dibata si deban bali ras urat si turah jadi sinuan-sinuan si pagit ras si erracun. #Heb 12:15 19Jaga maka ola lit sekalak pe si i jenda sendah megi aturen perpadanen si ibahan TUHAN enda erpengakap maka ia tetap nge mejuah-juah aminna gia alu ukur mersik tetap nge ia nggeluh bagi ate-atena. Adi bage kerina kam ikernepken, subuk si bujur ras si jahat. 20La ialemi TUHAN kalak si bage, tapi gara pernembeh ate TUHAN man bana, janah kerina mara si isuratken i bas kitap enda, ndabuh ku ia, seh maka enggo keri kal ia ikernepken TUHAN.
21Ijadiken TUHAN ia jadi sada usihen man kerina suku Israel. Iukum TUHAN me ia alu mara kelesa sue ras sumpah si isingetken i bas perpadanen si tersurat i bas kitap pengajaren TUHAN enda. 22I bas paksa si reh sinursurndu ras bangsa si deban si asalna i bas negeri si ndauh nari ngidah mara ras kiniseran si ibahan TUHAN i negerindu. 23Jumandu jadi tenggiring si la lit gunana, itambusi kertah ras sira. La tersuani kai pe, rih pe la turah. Negerindu bali ras kuta Sodom ras Gomora, Adma ras Seboim, si ikernepken TUHAN alu rawana si la teralang. #Kej 19:24-25 24E maka kerina doni nungkun, ‘Engkai maka ilakoken TUHAN e man negeri Israel? Kai nge ndia si erbanca maka bage nembehna ateNa?’
25Enda me jabapna, ‘Sabapna e me erkiteken bangsa TUHAN la ncikep perpadanen si ibanna ras IA, Dibata nu ninina, sanga bangsa e ibabana ndarat i Mesir nari. 26Isembahna dibata-dibata si deban si langa penah isembahna, dibata-dibata si ilarang TUHAN man sembahen. 27E maka nembeh TUHAN man bangsaNa, janah itamakenNa ku negeri e kerina mara si isuratken i bas kitap enda. 28Seh kal ate TUHAN nembehna, janah erkiteken pernembehNa si mbelin e, iruahNa bangsaNa e i bas negerina nari, jenari iambekkenNa ku negeri bangsa si deban, janah bagi ah me genduari kecibalna.’
29Memang lit denga si ibuniken TUHAN Dibatanta man banta, tapi enggo ipetangkasNa undang-undangNa, e maka kita ras sinursurta arus ngikutkenca asa lalap.”
Currently Selected:
ULANGEN 29: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
