ULANGEN 2
2
Perdalanen i gurun pasir
1“Dungna mulihken kita ku gurun pasir ngikuti dalan si kempak Teluk Akaba, bagi si iperentahken TUHAN man bangku. Ndekah kita mampa-mampa i deleng-deleng negeri Edom. #Bil 21:4
2Kenca bage maka ikataken TUHAN man bangku, 3maka enggo bias dekahna kita mampa-mampa i deleng-deleng e, janah kita arus lawes kempak Utara. 4IsuruhNa aku mereken perentah-perentah enda man bandu, ‘Nandangi ibentasindu me deleng-deleng negeri Edom. E kap ingan kade-kadendu kesusuren Esau. Mbiar kalak e man bandu, #Kej 36:8 5tapi la banci iperangndu ia, erkiteken la ateKu Kubereken sejengkal pe taneh e man bandu. Enggo Kubereken Edom man sinursur Esau. 6Nakan ras lau ngenca banci itukurndu i bas ia nari.’
7Ingetlah kuga enggo pemasu-masu TUHAN Dibatandu i bas kerina si enggo idahindu. IkepkepNa kam kidekah kam mampa-mampa i gurun pasir si mbelang enda. Iarak-arakNa kam kidekah empat puluh tahun enda, janah kerina keperlunndu icukupiNa.
8E maka kita erdalan terus nadingken dalan i kuta Elat ras Esiongeber nari ku Lawit Mate, jenari melok kita ku Timur Laut nuju Moap. 9Nina TUHAN man bangku, ‘Ola gasgasi bangsa Moap sinursur si Lut. Ola erperang ras ia. Enggo Kubereken kuta Ar man bana, janah la ateKu mereken taneh e sitik pe man bandu.’ ”
#
Kej 19:37
( 10Sada bangsa manusia Emim gelgel e tading i kuta Ar. Seri gedangna ras bangsa Anakim. Bangsa Anakim e pe bangsa si gedang mbelin. 11Bali ras bangsa Anakim, bangsa Emim pe igelari bangsa Repaim, tapi igelari bangsa Moap kalak enda Emim. 12Bangsa Hori pe mbarenda tading i Edom. Tapi ipelawes sinursur Esau kalak enda, ikernepkenna negerina, e maka iinganina, bali ras bangsa Israel si arah pudi mpelawes musuhna i bas negeri si ibereken TUHAN man bana.)
13“Kenca bage sikepari Lau Seret, sabap bage perentah TUHAN. 14Si enda jadi kenca enggo telu puluh waluh tahun kita nadingken Kades-Barnea. Kerina kalak si ngasup erperang i bas paksa si e enggo mate, sue ras kai si enggo ikataken TUHAN. #Bil 14:28-35 15Kalak enda tetap ilawan TUHAN la ngadi-ngadi ikernepkenNa ia kerina.
16Kenca kerina kalak si ngasup erperang e mate, 17ngerana TUHAN man banta, 18‘I bas wari enda ibentasindu daerah Moap arah kuta Ar. 19Kenca bage maka enggo kam ndeher ras negeri bangsa Amon, bangsa sinursur Lut. Ola gasgasi ia, ola erperang ras ia, sabap la ateKu Kubereken sitik pe man bandu taneh si enggo Kubereken man bana e.’ ” #Kej 19:38
( 20Taneh e semal igelari taneh Repaim, sue ras gelar bangsa si gelgel e tading i je. Tapi bangsa Amon nggelari kalak e bangsa Samsumim. 21Gedangna bali ras bangsa Anakim. Kalak enda nterem janah megegeh. Tapi ikernepken TUHAN kalak enda, gelah banci ikuasai bangsa Amon tanehna, janah ringan i je. 22Bage ka pe perbahanen TUHAN man bangsa Edom sinursur Esau si ringan i deleng-deleng Edom. Ikernepken TUHAN bangsa Hori gelah banci ikuasai bangsa Edom tanehna janah ringan i je. Seh ngayak genduari i je denga kalak enda ringan. 23Taneh i gedang-gedang tepi Lawit Tengah gelgel e iingani kalak si rehna i pulau Kreta nari. Ikernepken kalak enda bangsa Awi, e me kap penduduk asli daerah e, jenari ikuasaina negerina seh ku kuta Gasa i Selatan.)
24“Kenca enggo si bentasi Moap, ngerana TUHAN man banta nina, ‘Genduari berkat lah, kepari Lau Arnon. Kuendesken man bandu si Sihon, raja bangsa Amori si erkuasa i Hesbon, ras negerina. Perang lah ia, rampas negerina. 25Mulai sendah, Kuban maka mbiar kalak i ja pa pe man bandu. Si megi gelarndu nggirgir ia perbahan biarna ngenehen kam.’ ”
Raja Sihon italuken bangsa Israel
(Bil 21:21-30)
26“Kenca bage maka kusuruh piga-piga persuruhen i gurun pasir Kedemot nari ngadap man Sihon raja si erkuasa i Hesbon, guna nehken usul perdamen enda, 27‘Bere lah kami mentasi negerindu. Mentas ngenca kami, janah labo kami luar i bas dalan nari. 28Igalari kami pangan si ipan kami ras inemen si inem kami. Mentas ngenca ate kami arah negerindu, 29seh maka banci kami ngepari Lau Jordan ku negeri si ibereken TUHAN Dibata kami ateNa man kami. Bangsa sinursur Esau si tading i Edom ras bangsa Moap si ringan i Ar, e pe iberena nge kami mentasi daerahna.’
30Tapi la ibere Raja Sihon kita mentasi negerina. TUHAN Dibatandu enggo erbahanca maka batu-batun pusuh Raja Sihon ras la ia nggit patuh, maka banci sitaluken ia, janah ngerampasi negeri si genduari iingani kita enda.
31Nina TUHAN man bangku, ‘Nen me! Enggo Kuendesken Raja Sihon ras negerina man bandu. Rebutlah ras ingani lah negerina e.’ 32Ndarat Sihon ras kerina tenterana, erperang ia ras kita i deher kuta Jahas. 33Tapi iendesken TUHAN Dibatanta ia ku bas kuasanta, e maka si bunuh ia, ras anak-anakna, ras kerina tenterana. 34I bas paksa e me kita ngerampas ras ngkernepken tep-tep kuta, munuhi tep-tep jelma subuk dilaki ntah diberu bage pe anak-anak, sada pe lanai lit tading. 35Sibuati asuh-asuhenna, sirampasi kuta-kutana. 36TUHAN Dibatanta nampati kita naluken kuta-kuta, menaken i Aroer nari si lit i tepi berneh-berneh Arnon ras kuta si lit i tengah-tengah berneh-berneh e, seh ku Gileat. La lit tembok kuta enteguh-enteguhsa man banta. 37Tapi la si deheri daerah bangsa Amon ntah ndeheri Lau Jabok, ntah kuta-kuta si apai pe i bas uruk-uruk e. Bage pe labo si deheri ingan si apai pe si la iperentahken TUHAN kita ku je.”
Currently Selected:
ULANGEN 2: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.