ULANGEN 15
15
Tahun pepituken
(Im 25:1-7)
1“Tep-tep ujung tahun pepituken, sasapken lah utang kalak si rutang man bandu. 2Bagenda perbahanenndu: Ise si minjamken duit man temanna kalak Israel, arus nasapken utang e. Arus maka la icubakenna pe mindosa sabap TUHAN jine enggo ngataken utang e isasapken. 3Banci ipindondu utang kalak pertandang, tapi la banci ipindondu utang kalak si sada bangsa ras kam.
4 TUHAN si masu-masu kam i negeri si iberekenNa man bandu, e maka sada pe la lit kam kalak musil, 5adi iikutkenndu IA dingen alu tutus ngelakoken kasa kai si kuperentahken wari enda. 6TUHAN si masu-masu kam rikutken si ipadankenNa. Ipinjamkenndu pe duitndu man melala bangsa-bangsa si deban, tapi la kam perlu minjam i bas bangsa si apai nari pe. Kam erkuasa nandangi melala bangsa-bangsa, tapi la lit sada bangsa pe si ngkuasai kam.
7I bas kuta-kuta si ibereken TUHAN Dibatandu man bandu, adi lit i je sapih-sapih kam kalak Israel si kekurangen, ola kam nggeluh erbana-bana, tapi sampatilah ia. #Im 25:35 8Tapi melumbar lah, dingen berelah ia minjam asa si iperlukenna. 9Ola tulak adi atena minjam man bandu, aminna pe tahun nasapken utang enggo ndeher. Ola kal pelepas perukuren si jahat e turah i bas ukurndu. Adi la kam nggit mereken pinjamen man bana, erlebuh ia ku TUHAN ngelawan kam e maka ipersalahken TUHAN kam. 10Bereken man bana alu melumbar ras dem keriahen ukur, gelah ipasu-pasu TUHAN kam i bas kerina si idahikenndu.
11Lit nge rusur kalak Israel si musil dingen si kekurangen, e maka kuperentahken man bandu maka melumbar kam man bana.” #Mat 26:11; Mrk 14:7; Joh 12:8
Hak budak
(Kel 21:1-11)
12“Adi sekalak temanndu bangsa Israel, dilaki tah diberu, ndayaken bana man bandu jadi budak, arus ibebaskenndu ia kenca ia erdahin ras kam enem tahun. Kenca seh tahun si pepituken arus maka ibebaskenndu ia. #Im 25:39-46 13Sanga ia ibebaskenndu ola pelawesndu ia ngambe-ngambe. 14Bereken lah man bana alu melumbar kai si enggo idatndu arah pemasu-masun TUHAN: biri-biri, gandum, anggur. 15Inget lah maka kam pe nai budak nge i Mesir, tapi ibebasken TUHAN Dibatandu kam. E me sabapna maka kubereken man bandu genduari perentah enda.
16Tapi banci jadi budakndu e la nggit lawes. Banci jadi keleng atena nandangi kam ras keluargandu, puas akapna tading ras kam. 17Adi bage babalah ia ku pintun rumahndu, tupuklah cupingna i je, alu bage ia enggo jadi budakndu kidekah geluhna. Bage ka lah perbahanenndu man budakndu si diberu pe. 18Ola kam jungut-jungut adi ibebaskenndu budakndu, sabap enggo kap ia erdahin ras kam enem tahun dekahna dua kali lipat pendahinna asang kalak ngemo. Lakokenlah enda, maka ipasu-pasu TUHAN Dibatandu kam i bas kerina si idahikenndu.”
Anak si pemena i bas lembu ntah biri-biri
19“Serapkenlah man TUHAN Dibatandu asa kai jenggi lembu dingen bajar biri-biri si pemenana tubuh. Ola sada pe lembu enda ipakendu erdahin, ola sada pe biri-biri e iguntingndu mbuluna. #Kel 13:12 20Tiap tahun ipanndulah e, kam ras keluargandu, i bas ingan ersembah si sada e i adep-adepen TUHAN. 21Tapi adi rubia-rubia si iserapken e lit cacatna, umpamana pengkar, ntah pentang, ntah cacat si deban si mekelek, la banci ipersembahkenndu e man TUHAN Dibatandu. 22Rubia-rubia si bage banci i rumah ipanndu. Kerina kam subuk si bersih ras lang rikutken aturen agama, banci manca desken pemanndu daging belkih ntah balua. 23Tapi darehna ola pan, arus maka iamburkenndu ku taneh desken lau.” #Kej 9:4; Im 7:26-27; 17:10-14; 19:26; Ul 12:16,23
Currently Selected:
ULANGEN 15: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
