ULANGEN 13
13
1Banci jadi lit sekalak nabi ntah sekalak si ngasup ngantusi nipi erpadan ngelakoken tanda kuasa ntah si erbahanca ate kalak mamang. 2Alu e atena mabai kam ersembah dingen erdahin guna dibata-dibata si deban, si langa pernah isembahndu gelgel nari. Aminna jadi gia bagi si ipadankenna e, 3ola perdiateken ia. TUHAN Dibatandu make ia guna nguji kam, metehsa ntah keleng atendu man TUHAN asa ukurndu lit. 4Ikutkenlah TUHAN ras mbiarlah man baNa. Patuhlah man baNa janah ikutken lah perentah-perentahNa, sembah lah IA, janah setia lah man baNa. 5Tapi bunuh lah si ngantusi nipi ntah nabi si nuruh kam ngelawan TUHAN, e me Dibata si enggo mulahi kam i Mesir nari inganndu jadi budak mbarenda. Kalak si bage kap ersura-sura mabai kam papak i bas dalan kegeluhen si enggo iperentahken TUHAN man bandu. Kalak si bage arus ibunuh gelah kam pulah i bas si jahat enda nari.
6Banci jadi pe, maka seninandu, ntah anakndu si dilaki ntah anakndu si diberu ntah ndeharandu si ikelengindu ntah temanndu meriah ngajuk kam alu erbuni-buni gelah nembah ku dibata-dibata si deban si langa pernah isembahndu ras nini-ninindu. 7Sekalak i bas si enda nari banci jadi ngajuk kam, gelah nembah man dibata-dibata bangsa si ndeher ntah ndauh i bas kam nari. 8Tapi ola kam nggit iajukna, ola begiken pe. Ola mekuah atendu man bana, ola kelengi, janah ola kawali ia.
9Bunuhlah ia! Kamlah si pemena si menterisa alu batu. Kenca bage bere maka kerina kalak si deban pe menterisa alu batu. 10Benterilah ia alu batu seh mate! Sabap icubakenna mabai kam sirang ras TUHAN Dibatandu, si mulahi kam ndarat i Mesir nari, inganndu jadi budak mbarenda. 11Alu bage maka kerina bangsa Israel megi kai si jadi, gelah mbiar ia, janah ise pe lanai pang ngelakoken si jahat e.
12Adi enggo kam tading i kuta si ibereken TUHAN Dibatandu ntah mawen lit ibegindu cakap, 13maka lit piga-piga kalak si la terpake i bas bangsandu nari enggo mabai papak penduduk kutana nembah man dibata-dibata si langa pernah isembahndu. 14Adi ibegindu berita-berita si bage, selidikilah mehuli-mehuli. Adi payo maka tuhu enggo jadi perkara si jahat e, 15bunuhlah kerina penduduk kuta e ras asuh-asuhenna pe. Kernepken lah kuta e seh maka sitik pe lanai lit tading. 16Pepulungilah erta-erta penduduk si ringan i bas kuta e, pegun-gun i tengah-tengah kesain kuta e. E maka ciluk kuta e ras kasa kai si lit i je jadi persembahen man TUHAN Dibatandu. Pelepas maka bene ia rasa lalap, olanai ndigan pe ipanteki mulihi. 17Ola buniken kai pe si enggo kena ukum guna ikernepken, gelah mulihken TUHAN lanai nembeh tapi icidahkenNa perkuah ateNa man bandu. Mekuah ateNa man bandu janah ijadikenNa kam jadi sada bangsa si mbelin rikutken si ipadankenNa man nini-ninindu, 18adi ikutkenndu kerina perentah-perentahNa si enggo kubereken man bandu wari enda, dingen ngelakoken kai si isuruhNa.”
Currently Selected:
ULANGEN 13: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
