DANIEL 9
9
Daniel ertoto guna bangsana
1Darius kalak Medi, anak Ahasweros, enggo jadi raja i bas kerajan Babilon. 2I bas tahun si pemena kenca ia jadi raja aku sangana mpelajari pustaka-pustaka si badia, janah rukur aku kerna paksa si pitupuluh tahun Jerusalem terulang, sue ras si ikataken TUHAN man Nabi Jeremia. #Jer 25:11; 29:10 3E maka ertoto aku alu tutus man Tuhan Dibata, mindo man baNa alu mengisngis, erpuasa, make uis guni, janah kundul i bas abu. 4Ertoto aku man TUHAN Dibatangku dingen kuakuken dosa-dosa bangsangku.
Ningku, “O Tuhan, Kam kap Dibata si mbelin, e maka ipehaga kami Kam. Kam tetap i bas padanNdu janah kekelengenNdu la mobah man kalak si erkeleng ate man baNdu janah ngelakoken kai si iperentahkenNdu.
5Kami enggo erdosa, jahat, dingen salah perbahanen kami. La ilakoken kami kai si iperentahkenNdu man kami, janah isilahken kami si bujur si icidahkenNdu man kami. 6La ibegiken kami nabi-nabi suruh-suruhenNdu, si ngerana i bas gelarNdu man raja-raja kami, man peminpin-peminpin kami, man nini-nini kami, ras man kerina bangsa kami. 7O Tuhan, Kam tetap ngelakoken si bujur, tapi tetap ipekitik kami diri kami jine. Si enda kerina nge kami ngelakokenca, subuk si ringan i taneh Juda ras Jerusalem, bage pe kerina kalak Israel si ikerapkenNdu ku negeri-negeri si ndauh ras si ndeher erkiteken la ia erkemalangen man baNdu. 8Raja-raja kami, peminpin-peminpin kami, bage pe nini-nini kami, perbahanenna kerina man kemelanken, janah erdosa ia man baNdu, o Tuhan. 9Kam melias dingen dem alu pengalemi dosa, aminna gia kami enggo nimbak Kam. 10La ibegiken kami Kam, o TUHAN Dibata kami, tupung isuruhNdu kami nggeluh rikutken Undang-undang si niberekenNdu man kami arah nabi-nabi, suruh-suruhenNdu. 11Kerina Israel ngelanggar Undang-undangNdu, janah la nggit megikenca kai si ikatakenNdu. Erdosa kami man bandu, janah erkiteken si e idabuhkenNdu man kami sumpah si tersurat i bas Undang-undang Musa, suruh-suruhenNdu e. 12Kai si enggo ikatakenNdu, ilakokenNdu kerina man kami ras man peminpin-peminpin kami. Belinen ukumen si idabuhkenNdu man Jerusalem asangken man kerina kuta-kuta i doni enda; 13idabuhkenNdu man kami kerina ukumen si ituriken i bas Undang-undang Musa. Tapi amin bage gia, o TUHAN Dibata kami, genduari pe langa icubaken kami mperiahken ukurNdu alu nadingken dosa-dosa kami, tah pe ngikutken kai si ngena ateNdu. 14O TUHAN, Dibata kami, Kam enggo sikap ngukum kami, janah enggo me kami iukumNdu, sabap Kam tetap ngelakoken si bujur, janah kami la megiken Kam.
15O Tuhan Dibata kami, icidahkenNdu kuasaNdu alu maba bangsaNdu ndarat i Mesir nari, janah kuasaNdu e tetap denga nge iinget. Tapi kami enggo erdosa, enggo salah perbahanen kami. 16Erkiteken kiniulinNdu icidahkenNdu man kami i bas paksa si enggo lepas, olanai min ateNdu nembeh man Jerusalem genduari. KotaNdu kap kuta e, delengNdu si badia. Kerina bangsa-bangsa sekelewet kuta e, megombang man Jerusalem ras man bangsaNdu erkiteken dosa-dosa kami ras kejahaten si ilakoken nini-nini kami. 17O Dibata, begiken pertotonku ras pingko-pingkongku. Panteki mulihi Rumah PertotonNdu si enggo ikernepken; pajekken mulihi gelah kerina kalak meteh maka Kam kap Dibata. 18Begikenlah kami, o Dibata; tataplah kami, janah perdiateken kesusahen kami ras kiniseran kuta si igelari alu gelarNdu. Ertoto kami man baNdu erkiteken Kam perkuah, labo erkiteken perbahanen kami bujur. 19Tuhan, dengkehkenlah kami Tuhan, alemilah kami Tuhan begikenlah min kami, tedisken! Olanai pedekah-dekah, gelah kerina kalak meteh maka Kam kap Dibata. Kuta enda ras bangsa enda sikerajangenNdu kap.”
Gabriel nerangken nubuat e
20Terus aku ertoto, ngakuken dosa-dosangku ras dosa-dosa bangsangku Israel, janah mindo alu mengisngis man TUHAN Dibatangku gelah ipajekkenNa mulihi Rumah Pertoton si Badia e. 21Tupung aku ertoto denga, malekat Gabriel, si enggo kuidah i bas pengenehenen si perlebe, reh kabang ku inganku. Sanga e enggo seh paksana mpersembahken persembahen si karaben. #Luk 1:19,26 22Iterangkenna man bangku nina, “O Daniel, aku reh ku jenda nampati kam gelah ierti kam nubuat e. 23Tupung ibenakenndu mindo alu mengisngis man Dibata, ialoiNa kam. Keleng kap ateNa man bandu, janah erkiteken si e aku reh lako nurikenca man bandu jabapna. Genduari perdiatekenlah dage tupung kuterangken man bandu pengenehenen e.
24Dekahna paksa si enggo itetapken Dibata guna mbebasken bangsandu ras kutandu si badia e i bas dosa ras kejahaten nari e me pitu kali pitu puluh tahun. Kenca si e dosa ialemi janah keadilen rasa lalap pajek, gelah pengenehenen ras nubuat e jadi, janah Rumah Pertoton si Badia itangkuhken mulihi. 25Perdiatekenlah enda, janah ertikenlah: Mulai i bas paksa ibereken perentah lako majekken Jerusalem mulihi, seh paksa kerehen sekalak peminpin si ipilih Dibata, dekahna pitu kali pitu tahun. I je ipanteki me mulihi Jerusalem, rikut ras pasar-pasarna ras benteng-bentengna, janah kuta e pajek dekahna pitu kali enem puluh tahun. Tapi paksa si e, e me paksa kesusahen. 26Janah i bas pengkeri-kerin paksa si e, peminpin pilihen Dibata e ibunuh la arah bujur. Kuta ras Rumah Pertoton ikernepken tentera raja si erkuasa si reh nerang kuta e. Paksa pendungi e, reh desken banjir si mbelin, maba perang ras kecedan si enggo isikapken Dibata. 27Raja e erbahan perpadanen si nteguh ras melala bangsa pitu tahun dekahna, janah kenca setengah i bas paksa e enggo lepas, ipengadina me persembahen asuh-asuhen ras persembahen si deban. E maka itamaken me Gana-gana si Mejin i bas ingan si meganjangna i bas Rumah Pertoton e, janah tetap tading i je seh ku bas paksa kalak si namakenca i je mate i bas paksa si enggo itetapken Dibata.” #Dan 11:31; 12:11; Mat 24:15; Mrk 13:14
Currently Selected:
DANIEL 9: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
