DANIEL 11
11
1Ia ngenca penampatku ras sikawalku. 2Janah kai si nandangi kuturiken man bandu enda, tuhu-tuhu kap.”
Kerna Mesir ras Siria
Nina malekat e, “Lit telu nari si ngerajai Persia, jenari reh ka si peempatken, si ndauh bayaken asangken kerina raja-raja si debanna. Kenca enggo seh kal belinna kuasana, janah kebayakenna pe enggo mbue kal, ilawanna me kerajan Junani.
3Kenca bage keke me sekalak raja si mbisa. Ikuasaina sada kerajan si lanai kal lang-lang belinna, janah kai atena ibahanna, idalankenna bagi ate-atena. 4Tapi tupung kuasana sangana belin kal, pecah me kerajanna jadi empat bagin. Si ngancihken ia jadi raja la lit sada pe kesusurenna, tapi kuasa raja-raja e la bagi kuasana mbarenda belinna.
5Kuasa raja Mesir pe ertambah-tambah. Tapi sekalak i bas puanglima-puanglimana mbisan asa raja e, e maka kerajanna pe belinen ka pagi. 6Kenca lepas piga-piga tahun ibahan raja Mesir me perpadanen ras raja Siria, janah iserehkenna anakna man raja Siria. Tapi perpadanen e la ndekah umurna, janah putri Mesir, bage pe perbulangenna, anakna, ras suruh-suruhenna si lawes ras ia, kerina ibunuh. 7La ndekahsa kenca si e, sekalak i bas keluarga putri Mesir ndai nangkih jadi raja. E maka iserangna tentera raja Siria, ibengketina bentengna, janah italukenna tentera Siria e. 8Jenari ibabana mulih ku Mesir gana-gana sembah-sembahenna, rikut ras perkakas-perkakas si ibahan i bas emas ras pirak nari si enggo ipersembahken man berhala-berhala e. Kenca dame piga-piga tahun dekahna, 9reh me raja Siria nerang Mesir, tapi ia ipaksa mundur.
10Kenca bage ersikap me anak-anak raja Siria guna erperang janah ipepulungna tentera nterem. Sekalak i bas anak-anakna e maju terus desken banjir si mbelin, janah iserangna terus ku bas benteng musuh. 11Perban nembehna ate raja Mesir, lawes ia erperang ngelawan raja Siria janah italukenna tentera raja Siria si seh teremna e. 12E maka meganjang ukur raja Mesir erkiteken kemenangenna, tapi la lalap ia menang.
13Kenca bage mulihken raja Siria, ipepulungna me tentera ndauh teremen asa si enggo-enggona. Kenca seh pagi paksa si payo, mulihi me ia erperang alu tentera si nterem janah lengkap senjatana. 14Kenca bage nterem kalak berontak ngelawan raja Mesir. Janah piga-piga kalak si perampang i bas bangsandu nari pe, o Daniel, ikut ka berontak erkiteken ia ersura-sura gelah jadi min bagi pengenehenen si iidahna e. Tapi talu me ia. 15Dage ikepung raja Siria me kuta si erbenteng janah italukenna kuta e. Tentera Mesir lanai iteruskenna erperang; tentera pilihenna pe la cukup gegehna. 16E maka tentera Siria si reh nerang e, rate-ate me pagi, alu la lit ise pe ngelawanca. Tedis ia i bas Taneh Perpadanen janah kerina ikuasaina.
17E maka irencanaken raja Siria sada serangen alu make kerina tenterana. Janah guna engkernepken kerajan musuhna, ibahanna sada perpadanen ras musuhna e, janah iserehkenna atena anakna man bana; tapi sura-surana e la banci seh. 18Kenca si e iserangna bangsa-bangsa i lawit nari, janah melala bangsa italukenna. Tapi lit pagi sekalak peminpin bangsa si deban naluken ia, janah ipengadina keganjangen ukur raja e; tuhu, keganjangen ukur raja Siria iulihkenna man bana. 19Mulih pagi raja Siria ku bas bentengna i negerina, tapi italuken me ia, janah e me pagi pengkeri-kerinna.
20E maka lit pagi raja si deban nggantikenca. Isuruhna pagi perwira-perwira nindih rayat alu pajak si mberat lako nambahi kebayaken kerajanna. I bas paksa si gendek ibunuh kalak me raja e, la i tengah-tengah jelma si nterem, la i bas peperangen.”
Raja Siria si jahat
21Nina malekat ndai tole, “Si nggancihkenca pagi jadi raja e me sekalak dilaki si jahat, si la lit hakna jadi raja, tapi reh me ia alu la niarap janah irebutna kuasa alu dalan tipu. 22Kasa kalak si ngelawan ia, subuk Imam si Mbelin nu Dibata pe, isapuna dingen ilesapkenna. 23Alu erbahan perpadanen itipuna bangsa-bangsa si deban, janah reh gegehna ia lalap aminna gia kitik-kitik nge negeri kerajanna. 24Iserangna sada propinsi si bayak alu la niarap, janah kai si ilakokenna i je, langa pernah pe ilakoken nini-ninina nai. Kenca bage ibagi-bagikenna ras pengikut-pengikutna barang-barang ras erta-erta si irampasna i bas perang. Irencanakenna nerang benteng-benteng, tapi lanai ndekahsa peltep me umur geluhna.
25Iperpang-pangna bana mpepulung tentera nterem lako nerang raja Mesir si enggo ersikap ngelawanca alu tentera si la tanggung teremna ras gegehna. Tapi tertipu me raja Mesir janah talu me ia. 26Temanna si ndeherna kal me si meneken ia. Nterem tenterana ibunuh dingen ikelayapken. 27Kenca bage ras-ras me duana raja e man, tapi perukurenna duana jahat, janah erguak ia sapih-sapih ia. Tapi labo seh kai si isurakenna, sabap paksana guna si e langa seh. 28Kenca bage mulih me raja Siria ku kutana maba barang rampasen si idatca, janah enggo itetapkenna ukurna engkernepken agama bangsa Dibata. Ilakokenna bagi ate-atena janah kenca bage mulih ia ku negerina.
29I bas sada paksa si tertentu pagin, iserangna ka Mesir, tapi sekali enda lanai bali jadina ras si tangtangna. 30Tupung si e reh pagi kalak Roma tare kapal ngelawan ia, janah mbiar me raja Siria e.
Kenca bage mulih ia dingen merawa kal atena janah icubakenna engkernepken agama bangsa Dibata. Iikutkenna ajar sekalak si enggo murtad i bas agama e nari. 31Rumah Pertoton e iliami tenterana. Ipengadina persembahen si tep-tep wari, janah ipajekkenna i je Gana-gana si Mejin. #Dan 9:27; 12:11; Mat 24:15; Mrk 13:14 32Alu tipu datca penampat i bas kalak si enggo nadingken agamana, tapi kalak si ngikutken Dibata ngelawan ia. 33Kalak si pentar i bas bangsa e mereken ajar man nterem kalak si deban. Tapi i bas paksa si kentisik deba ibunuh i bas perang, tah pe itutung seh mate, janah deba ka irampok ras itahan. 34Tupung pemunuhen e sangana erdalan, sitik ngenca pagi dat bangsa Dibata penampat, tapi si nampati ia e guna kepentingen dirina nge maka ia nggit nampati. 35Piga-piga kalak peminpin si pentar ibunuh, tapi erkiteken si e bangsa e ibersihken. Si e terus erdalan seh paksa pendungi, paksa si enggo itetapken Dibata.
36Raja Siria ngelakoken perbahanenna bagi ate-atena. Alu ukur meganjang ikatakenna maka ia belinen asangken kerina dibata, ganjangen pe asa Dibata si Meganjangna, ngasup ngelakoken si enda seh paksa ukumen si enggo itetapken Dibata man bana. Ilakoken Dibata me sue ras si enggo irencanakenNa. #2Tes 2:3-4; Ket 13:5-6 37Raja e la mperdiateken dibata si isembah nini-ninina, dibata si kekelengen diberu-diberu pe lang. Janah si tuhuna, dibata si apai pe labo diatena, sabap belinen akapna ia asangken kerina dibata-dibata e. 38Si ihamatina e me dibata si ngkawali benteng. Ipersembahkenna emas, pirak, permata, ras erta-erta si deban si meherga, man dibata si la pernah isembah nini-ninina. 39Guna mpertahanken benteng-bentengna, ipakena bangsa si nembah man dibata si deban. Ipehagana kal kalak si nggit ngaloken ia selaku raja, ibahanna pangkatna meganjang, janah iberekenna taneh jadi upahna.
40Kenca paksa pengkeri-kerin raja Siria enggo seh, reh me raja Mesir nerang ia, janah raja Siria pe ngelawan alu kerina gegeh si lit i bas ia, make gereta perang, kuda ras melala kapal. Iserangna melala negeri, bali ras lau banjir. 41Taneh perpadanen e pe ikut iserangna janah ibunuhna erpuluh-puluh ribu kalak, tapi negeri Edom, Moap, janah iba-iba negeri Amon pulah i bas ia nari. 42Tupung iserangna negeri-negeri e, Mesir pe la pulah ibanna. 43Kebayaken Mesir si terbuni iangkutna, e me emas, pirak, ras erta-erta si deban si terbuni. Libia ras Sudan pe italukenna. 44Kenca bage mbiar me ia megi berita si reh i Timur ras Utara nari, e maka erperang me ia alu merawa, munuhi nterem jelma. 45Kemah kerajanna si mbelin ipajekkenna kelang-kelang lawit ras deleng i bas ingan Rumah Pertoton. Tapi mate ia alu la ise pe i je si nampatisa.”
Currently Selected:
DANIEL 11: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
