2 SAMUEL 10
10
Daud naluken bangsa Amon ras bangsa Siria
(1Kro 19:1-19)
1Lanai ndekah kenca si e mate Nahas raja Amon, janah anakna Hanun jadi raja. 2Nina Raja Daud, “Arus maka kucidahken kesetianku erteman man Hanun bali ras si ilakoken bapana Nahas man bangku.” E maka isuruh Daud utusen encidahken maka ia pe ikut rate ceda.
3Kenca seh utusen e i Amon nina peminpin bangsa Amon man Raja Hanun, “Ola iakapdu maka Daud ngutus persuruhenna ku jenda guna enghamati bapandu! Isuruhna persuruhen e jadi mata-mata mpergermetken kuta enda, guna nalukenca!”
4Itangkap Hanun utusen Daud, icukurna janggutna sembelah, ikeretna uisna ngayak buta-butana, jenari ipelawesna. 5Mela kal iakap kalak e, e maka la ia pang mulih. Kenca ibegi Daud si enggo jadi, itenahkenna kata maka kalak enda arus tading i Jeriho janah la mulih seh janggutna turah ka.
6Bangsa Amon nggejap maka ia ermusuhen ras Daud. E maka isewana 20.000 kalak tentera Siria si ringan i Betrehop ras Sobah 12.000 kalak i Tob nari, ras 1.000 i Maaka nari. 7Ibegi Daud kerna si e e maka isuruhna Joap ras kerina tenterana ngelawanca. 8Bangsa Amon maju, inganna i lebe pintun gerbang ibu kutana Raba. Si deban bangsa Siria, kalak i Tob nari ras kalak Maaka muat ingan i bas mbalmbal.
9Asum idah Joap tentera musuh nandangi merang i lebe ras i pudi nari, ipilihna tentera Israel si merawana. Iaturna petala-tala ras bangsa Siria. 10Si lebihna isuruhna ipinpin seninana Abisai, si ngaturkenca petala-tala ras bangsa Amon. 11Nina Joap man seninana e, “Adi idahndu bangsa Siria mulai naluken aku reh kam janah sampati aku, bage pe adi bangsa Amon mulai naluken kam reh aku nampati kam. 12Jadilah megegeh janah ola mbiar! Erperanglah kita asa gegehta guna bangsanta ras guna kuta-kuta Dibatanta. Janah peraten Dibatalah jadi!”
13Asum Joap ras tenterana maju ngelawan, kiamen bangsa Siria. 14Kenca idah bangsa Amon maka bangsa Siria enggo kiam, e maka kiam ka bangsa Amon nadingken Abisai mundur ku bas kuta. Kenca bage mulih Joap i bas peperangen e nari ku Jerusalem.
15Ieteh bangsa Siria maka ia enggo italuken bangsa Israel, e maka ipepulungna kerina tenterana. 16Idilo Raja Hadadeser kalak Siria si ringan arah Timur Lau Eprat, e maka reh kalak ku Helam i teruh pinpinen Sobah, puanglima perang Raja Hadadeser i Sobah nari. 17Kenca ibegi Daud kerna si e, minter ipepulungna tentera Israel, ikeparina Lau Jordan, jenari erdalan ia ku Helam. I bas ingan e me kalak Siria ngatur barisenna ngalaken Daud. Perang mulai. 18E maka iasak Israel tentera Siria mundur, Daud ras tenterana munuh 700 tentera Siria si ergereta perang janah 40.000 tentera si erkuda. Puanglima Sobah luka, jenari mate i bas perang e. 19Kenca igejap raja-raja si ijajah Raja Hadadeser maka enggo ia italuken Israel ibahanna perdamen, e maka jadi jajahen Israel ia. Jenari lanai pang bangsa Siria tole nampati bangsa Amon.
Currently Selected:
2 SAMUEL 10: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
