2 KRONIKA 4
4
Alat-alat Rumah Pertoton
(1Raj 7:23-51)
1Isuruh Raja Salomo erbahan batar-batar tembaga; ukurenna e me: siwah meter gedangna ras belangna, dingen ganjangna empat setengah meter. #Kel 27:1-2 2Ibahanna pe tong tembaga bulat, ukurenna e me 2,2 meter bagesna, 4,4 meter garis tengahna, dingen 13,2 meter kelilingna. 3Tong e arah darat ililet alu dua baris hiasen, sada i babo si debanna. Bentuk hiasen e bagi lembu, si ituang ersada ras tong e kerina. 4Tong e iamparken i babo sepuluh dua lembu tembaga si ngala ku darat; tiap telu lembu ngadap kempak tiap jurusen. 5Tong e kapalna pitu setengah meter. Biberna bagi cangkir, lempir ku darat bagi rudang. Isina kira-kira 50.000 liter. 6Ibahan pe sepuluh baskom, lima baskom itamaken arah Selatan Rumah Pertoton dingen lima arah Utara. Baskom e ipake guna murihi bagin-bagin asuh-asuhen si itutung jadi persembahen. Lau si i bas tong si galang e guna ipake man perburihen imam-imam. #Kel 30:17-21
7-8Ibahan sepuluh nahe lampu rikutken bentuk si enggo itetapken, dingen sepuluh meja, jenari itamakenna barang-barang e i bas ruang pematang Rumah Pertoton. Lima nahe lampu ras lima meja arah kawes ras lima arah kemuhen. Ibahan pe seratus mangkuk emas. #Kel 25:31-40 #Kel 25:23-30
9Guna imam-imam ibahan kesain arah darat ras arah bas Rumah Pertoton e. Pintun-pintun i bas pintu gerbang kesain e, ilapisi alu tembaga. 10Tong e itamaken i bas suki Rumah Pertoton e.
11-16Piga-piga belanga, mangkuk, skop pe ibahan Huram ka. Alu bage enggo idungina dahin si enggo ipadankenna man Raja Salomo guna Rumah Pertoton e. Alat-alat e me:
Dua tiang.
Dua takal tiang si tempasna bagi mangkuk i datas tiap tiang.
Dua rante si ibayu jadi hiasen tiap takal tiang.
Empat ratus buah delima tembaga isusun i bas dua baris sekelewet takal tiang e.
Sepuluh gereta.
Sepuluh baskom.
Sada tong.
Sepuluh dua lembu tembaga natang tong e.
Piga-piga belanga, sendok ras garpu.
Huram tukang si beluh mahan kerina alat-alat enda i bas tembaga si erndilap nari, sue ras si enggo iperentahken Raja Salomo, guna ipake i bas Rumah Pertoton TUHAN.
17Kerina barang-barang ndai ituang raja kelang-kelang Sukot ras Sereda i Baluren Lau Jordan. 18Perbahan bage buena alat-alat si ibahan e, lanai ieteh berat tembaga si ipake.
19Alat-alat i bas emas nari pe ibahan Salomo guna Rumah Pertoton e, e me: batar-batarna, piga-piga meja guna ingan roti si ipersembahken man Dibata; 20kerina nahe lampu ras lampuna, ibahan i bas emas murni nari, si isagan i adep-adepen Ingan si Badiana kal, sue ras rencana; 21hiasen, si tempasna bagi bunga, lampu-lampu, ras jepit-jepit rara; 22perkakas guna nimpeti lampu-lampu e, mangkuk-mangkuk, pinggan guna ingan si merim-merim, ingan rara. Kerina alat-alat enda ibahan i bas emas murni nari. Pintun-pintun Rumah Pertoton e, si arah darat ras pintun-pintun ku Ingan si Badiana kal ilapisi alu emas.
Currently Selected:
2 KRONIKA 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.