2 KRONIKA 33
33
Manase raja Juda
(2Raj 21:1-9)
1Tupung Manase jadi raja Juda umurna sepuluh dua tahun. Jenari merentah ia i Jerusalem lit lima puluh lima tahun dekahna. 2Manase erdosa kempak TUHAN, perban iikutkenna lagu langkah si jahat i bas bangsa-bangsa si enggo ipelawes TUHAN i negeri Kanaan nari asum bangsa Israel bengket ku negeri e. #Jer 15:4 3Ipajekkenna mulihi ingan-ingan ersembah kalak perbegu si enggo ikernepken bapana Hiskia. Ipajekkenna batar-batar guna nembah man Baal. Ibahanna gana-gana Dewi Asera dingen isembahna bintang-bintang. 4Enggo ikataken TUHAN maka i bas Rumah Pertoton Jerusalem me IA isembah rasa lalap; tapi i bas Rumah Pertoton e me ipajekken Manase batar-batar ingan ersembah man dibata-dibata kalak perbegu. #2Sam 7:13 5I bas duana kesain Rumah Pertoton e ipajekkenna batar-batar guna nembah bintang-bintang. 6Ipersembahkenna anak-anakna si dilaki i Baluren Hinnom jadi persembahen tutungen. Ngguru-ngguru ia, isungkunna kalak pertendung ras perjinujung. Mbelin kal dosa Manase kempak TUHAN e maka keke ibahanna rawa TUHAN. 7Itamakenna gana-gana i bas Rumah Pertoton e aminna pe enggo ikataken TUHAN man Daud ras anakna Salomo nina, “I jenda, i Jerusalem, i bas Rumah Pertoton enda, i jenda me ingan si enggo Kupilih i bas belang-belang daerah Israel si sepuluh dua suku nari jadi ingan ersembah man bangKu rasa lalap. #1Raj 9:3-5; 2Kro 7:12-18 8Janah adi kalak Israel ngikutken kerina perentahKu, janah patuh man kerina Undang-undangKu, si enggo ibereken suruh-suruhenKu Musa man bangsa e, la Kupelepas kalak Israel ipelawes i bas negeri enda nari e me negeri si enggo Kubereken man nini-ninina.” 9Ibabai Manase kalak Israel erbahan dosa-dosa si belinen asangken si ibahan bangsa-bangsa si enggo ipelawes TUHAN i bas negeri e nari tupung bangsa Israel bengket ku je.
Manase erkadiola
10Aminna ipersingeti TUHAN si Manase ras rayatna, la diatena pe. 11E maka ipelepas TUHAN puanglima tentera Assur merang Juda. Itangkapna Manase alu pengkawit, irantekenna, jenari ibabana ku Babil. 12Erkiteken kiniseranna e, ukurna jadi meteruk e maka mulihken ia ku TUHAN, Dibatana janah ipindona penampat man baNa. 13Ibegiken ras ialoken Dibata pertoton Manase ibereNa ia mulih ku Jerusalem janah jadi raja ka mulihi. Enda erbahanca Manase tek maka TUHAN kap Dibata si tuhu-tuhu.
14Kenca si e, ipeganjangi Manase tembok si arah darat arah Timur Kuta Daud. Ibenaina i bas sada ingan i bas baluren deher ulu Lau Gihon terus ku Utara seh ku Pintu Gerbang Nurung dingen ku bagin kuta si igelari Opel. Itamakenna ka pe puanglima-puanglima tentera ringan i bas tep-tep kuta si erbenteng. 15Iaguina i bas Rumah Pertoton e nari dibata-dibata bangsa si deban ras gana-gana si enggo itamakenna i je. Irontaskenna pe batar-batar persembahen man berhala-berhala si lit i bas uruk ingan Rumah Pertoton e pajek janah i bas ingan-ingan si deban i Jerusalem. Iangkutna kerina barang-barang e ku darat kuta jenari iambekkenna. 16Ipekenana pe batar-batar ingan nembah man TUHAN, jenari ipersembahkenna persembahen perdamen ras persembahen pengataken bujur i babo batar-batar e. Iperentahkenna kerina kalak Juda nembah man TUHAN, Dibata Israel. 17Aminna pe iterusken bangsa e mereken persembahen i bas ingan-ingan persembahen si deban, tapi e ipersembahkenna man TUHAN saja.
Kedungen pemerentahen Manase
(2Raj 21:17-18)
18Kerina si debanna si ibahan Manase, pertotonna man Dibatana, bage pe kata-kata nabi si ngerana man bana i bas gelar TUHAN, Dibata Israel, kerina isuratken i bas Sejarah Raja-raja Israel. 19Pertoton raja dingen jabapen Dibata kerna pertoton e, kerina dosa-dosa si ilakokenna ope denga ia jera, si jahat si ibahanna, ingan-ingan ersembah man berhala-berhala ras gana-gana Dewi Asera si ibahanna bage pe gana-gana si isembahna, kerina isuratken i bas Sejarah Nabi-nabi. 20Mate Manase jenari ikuburken i bas istana, e maka anakna Amon nggantiken ia jadi raja.
Amon raja Juda
(2Raj 21:19-26)
21Umur Amon tupung ia jadi raja Juda dua puluh dua tahun, jenari merentah ia i Jerusalem lit dua tahun dekahna. 22Bali ras bapana Manase, erdosa ia man TUHAN dingen isembahna gana-gana si enggo ibahan bapana. 23Tapi lainna ia ras bapana e me la ipeterukna bana janah la ia nembah man TUHAN. Lebihen dosa-dosa si ibahanna asangken dosa-dosa si ibahan bapana.
24Anak buahna erpekat ngelawan ia e maka ibunuhna Amon i bas istana. 25Kenca bage ibunuh rayat Juda kalak si munuh Amon ndai, jenari itangkuhkenna Josia anak Amon jadi raja.
Currently Selected:
2 KRONIKA 33: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
