2 KRONIKA 12
12
Iserbu bangsa Mesir kerajan Juda
(1Raj 14:25-28)
1Kenca ipeteguhi Rehabeam kuasana jadi raja, ia ras kerina rayatna minter nadingken Undang-undang TUHAN. 2I bas tahun si pelimaken pemerentahen Raja Rehabeam TUHAN ngukum bangsa Juda erkiteken bangsa e la setia man TUHAN. Raja Sisak i Mesir nari, merang Jerusalem 3alu 1.200 tentera si ergereta kuda, 60.000 tentera si ngersak kuda, dingen tentera si la terbeligai teremna subuk kalak Libia, kalak Suki ras kalak Sudan. 4Italukenna kuta-kuta Juda si erbenteng jenari iasakna seh ku Jerusalem.
5Nabi Semaya lawes ndahi Raja Rehabeam ras peminpin-peminpin kerajan Juda si enggo pulung i Jerusalem erkiteken serangen Sisak e. Nina Semaya man bana kerina, “Enda tenah TUHAN man bandu, ‘Enggo itadingkenndu Aku, e maka genduari Kutulak kam man Sisak.’ ”
6Igejap raja ras peminpin-peminpin e maka ia enggo erdosa, e maka nina, “Kai si ibahan TUHAN e bujur kap.”
7Kenca idah TUHAN kerna si enda, reh ka kata TUHAN man Semaya nina, “Erkiteken enggo igejapna dosana la Kukernepken bangsa e. Tapi tupung iserang Sisak la piga kalak si pulah. Pernembeh ateKu la kerina Kucurcurken ku kuta Jerusalem, 8tapi italuken Sisak ia, gelah ietehna nanamna kuga lainna adi ia jadi suruh-suruhenKu ras adi ia jadi suruh-suruhen raja doni enda.”
9Reh Raja Sisak merang Jerusalem jenari irampasina erta-erta si lit i bas Rumah Pertoton ras i bas istana. Irampasina, ampang-ampang emas si ibahan Raja Salomo nai pe. #1Raj 10:16-17; 2Kro 9:15-16 10Guna nggancih si e ibahan Rehabeam ampang-ampang tembaga, jenari isuruhna ikepkep kalak si njaga pintu gerbang istana. 11Tiap lawes raja ku bas Rumah Pertoton, ipake penjaga e ampang-ampang ndai; kenca bage iulihkenna ku bas rumah jaga. 12Erkiteken raja erpengendes man TUHAN e maka la ia keri kal ikernepken rawa TUHAN, e maka negeri Juda pe enggo jadi mehuli.
Ringkasen pemerentahen Rehabeam
13Rehabeam jadi raja i Jerusalem dingen ertambah-tambah kuasana. Sanga ia jadi raja umurna empat puluh sada tahun janah lit sepuluh pitu tahun dekahna ia merentah i Jerusalem, e me kuta si enggo ipilih TUHAN i bas daerah Israel nari jadi ingan ersembah man baNa. Nande Rehabeam e me si Naama i negeri Amon nari. 14Rehabeam ngelakoken si jahat, erkiteken la iusahakenna ndarami si ngena ate TUHAN.
15Perbahanen Rehabeam mula-mulana nari seh kedungenna bage pe laporen kerna keluargana isuratken i bas Sejarah Nabi Semaya dingen i bas Sejarah Nabi Iddo. Rehabeam la erngadi-ngadi erperang ras Jerobeam. 16Rehabeam mate jenari ikuburken i bas kuburen raja i Kuta Daud. E maka anakna Abiya nggantiken ia jadi raja.
Currently Selected:
2 KRONIKA 12: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
