1 SAMUEL 30
30
Perang ras bangsa Amalek
1Dua wari kenca si e seh Daud ras teman-temanna i Siklak. Alu la isangka-sangka enggo iserang bangsa Amalek taneh Juda Selatan janah enggo ikernepkenna Siklak. Enggo icilukna kuta e, 2janah kerina diberu-diberu itabanna; la lit sekalak pe ibunuhna, tapi enggo ibabana kerina lawes. 3Kenca Daud ras teman-temanna seh, idapetina maka kuta e enggo keri meseng, janah ndehara-ndeharana, anak-anakna si dilaki ras si diberu enggo ibabaken lawes. 4Daud ras teman-temanna tangis la erngadi-ngadi seh ia enggo ngelabuh kerina. 5Ndehara Daud pe duana, Ahinoam ras Abigail, enggo ibabaken kalak lawes. #1Sam 25:42-43
6Genduari Daud lit i bas keguluten si mbelin sabap ngilas kal ate teman-temanna kerina kerna kebenen anak-anakna e, janah ibenterina atena Daud alu batu; tapi TUHAN Dibatana mereken ukur si tetap man bana. 7Nina Daud man Imam Abiatar anak Ahimelek, “Baba man bangku epod e.” E Maka ibaba Abiatar man bana. #1Sam 22:20-23 8Nungkun Daud man TUHAN nina, “Kuayaki nge pengerampok e? Tunduk aku denga nge ndia ia?”
Ngaloi IA nina, “Ayakilah; tundukndu denga nge ia janah banci ipulahindu tabanen e.”
9E maka minter berkat Daud ras temanna si 600 kalak ndai, janah kenca enggo seh i Lau Besor, piga-piga kalak ia tading i je. 10Daud nerusken perdalanenna ras 400 kalak temanna; si 200 kalak nari lanai ngasup ngepari lau e perban enggo latihsa akapna, e maka tading ia. 11Kalak si ikut ras Daud njumpai sekalak anak perana kalak Mesir i bas mbalmbal jenari ibabana ku Daud. Ibere kalak ndai ia man ras minem, 12e me buah ara si enggo ikerahken, ras dua tandan buah anggur si enggo ikerahken. Kenca elah man, enggo ka reh gegehna; enggo telu wari telu berngi ia la lit man ntah minem kai pe. 13Isungkuni Daud ia, “Ise tuanndu janah i ja nari kam?”
“Aku bangsa Mesir budak kalak Amalek,” nina ngaloi. “Telu wari si enggo lepas itadingken tuanku aku erkite-kiteken aku sakit. 14Enggo iserang kami daerah Kereti i bagin Selatan Juda daerah terpuk Kalep, janah iciluk kami kuta Siklak.”
15“Nggit kam mabai kami ku pengerampok e?” nina Daud nungkun ia.
Ngaloi ia, “Adi ersumpahlah kam i bas gelar Dibata maka la aku ibunuhndu ntah ndudurken aku man tuanku, nggit aku naruhken kam.” 16Jenari itaruhkenna Daud ku kalak ndai.
Perampok-perampok e merap kerina i belang-belang ingan e, sangana man ras minem, janahna erpesta erkite-kiteken seh kal buena barang rampasen si ibuatna i bas taneh Pilisti ras Juda nari. 17Pepagina, enggo kenca terang, iserang Daud perampok-perampok e janah ibunuhina seh ben. La lit sada pe si luah, seakatan 400 anak perana si lawes ngersak unta. 18Kasa si enggo itaban kalak Amalek ndai ipulahi Daud kerina, ikut pe ndeharana si dua e. 19La lit sada kal pe si bene. Kerina ibaba Daud mulih, subuk anak-anak dilaki ras anak diberu teman-temanna, ras kerina barang-barang rampasen si enggo ibuat bangsa Amalek. 20Kerina biri-biri ras lembu pe idatca, igera kalak ndai kerina asuh-asuhen e arah lebe-lebena janah nina, “Enda sikerajangen Daud!”
21Kenca bage lawes mulihken Daud ndahi temanna si 200 kalak ndai si lanai ngasup erdalan ras ia janah enggo tading i Lau Besor. Reh ia kerina ngalo-ngalo Daud ras temanna, janah Daud erdalan ndeheri ia kerina jenari isalamina alu ukur meriah. 22Tapi ngerana piga-piga kalak si jahat ras la terpake si enggo lawes ras Daud nina, “Kalak enda la ikut ras kita e maka la kami nggit merekenca sitik pe man kalak enda barang-barang rampasen e. Ndeharana ras anak-anakna banci ibuatna, jenari mulih ia.”
23Tapi nina Daud ngaloi, “O senina-seninangku, la banci bage perbahanenndu kerna kai si enggo ibereken TUHAN man banta! IkawaliNa kita janah iberekenNa man banta kemenangen ngelawan perampok-perampok e. 24Labo ise pe nggit ngikutken kata si ibelaskenndu e! Kerina la banci la ngaloken bagin si seri: kalak si tading ngiani barang-barang ndat bagin si seri ras kalak si lawes erperang.” 25Ibahan Daud enda jadi sada peraturen, janah mulai i bas paksa e nari peraturen e iikutken i Israel.
26Kenca Daud enggo mulih ku Siklak, itenahkenna sada bagin i bas barang-barang rampasen e man teman-temanna, peminpin-peminpin negeri Juda, alu berita, “Enda pemere man bandu i bas barang-barang rampasen si ibuat kami i bas musuh-musuh TUHAN nari.”
27Ikirimkenna e man anak kuta Betel, Rama i bagin Selatan Juda, ras man anak kuta Jatir, 28Aroer, Sipmot, Estemoa, 29ras Rakal; man terpuk Jerahmeel, man kalak Keni, 30ras man anak kuta Horma, Borasan, Atak, 31ras Hebron. Ikiremkenna hadiah-hadiah e ku kerina ingan si enggo isiarna ras teman-temanna.
Currently Selected:
1 SAMUEL 30: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
