1 SAMUEL 23
23
Iselamatken Daud kuta Kehila
1Ibegi Daud maka bangsa Pilisti sangana merang kuta Kehila janah itangkona gandum si mbaru denga iperani. 2E maka isungkunna TUHAN nina, “Banci nge aku lawes merang kalak Pilisti e?”
“Banci,” nina TUHAN ngaloi, “Seranglah ia janah selamatken kuta Kehila.”
3Tapi nina teman-teman Daud man bana, “I bas taneh Juda enda pe cukup si man kebiarenta; tentu saja reh gulutna kari adi lawes kita ku kuta Kehila janah siserang tentera bangsa Pilisti!” 4E maka isungkun Daud ka mulihken sura-sura TUHAN, janah nina TUHAN man bana, “Laweslah janah seranglah Kehila sabap ateKu mereken kemenangen man bandu ngelawan bangsa Pilisti.” 5E maka lawes Daud ras temanna ku Kehila jenari iserangna bangsa Pilisti; nterem kal ibunuhna jenari ibuatna asuh-asuhen. Janah bagenda me dalanna Daud nelamatken kuta e.
6Asum Abiatar anak Ahimelek luah janah ersada ras Daud i Kehila, ikut ibabana epod e.
7Iberitaken man Saul maka Daud enggo lawes ku Kehila, jenari nina Saul, “Dibata enggo namaken ia i teruh kuasangku. Enggo isidingi Daud man bana alu lawes ku kuta si ertembok janah lit pintun gerbangna.” 8E maka ipepulung Saul tenterana, iperentahkenna erperang ngelawan Kehila guna ngepung Daud ras teman-temanna.
9Kenca ibegi Daud maka iserang Saul atena ia, ikatakenna man Imam Abiatar, “Babalah epod ku jenda.” 10Jenari nina Daud, “TUHAN, Dibata Israel, enggo kubegi maka irencanaken Saul reh ku Kehila guna ngkernepkenca erkite-kiteken aku, suruh-suruhenndu. 11Idudurken penduduk Kehila kin aku pagi man Saul? Tuhu kin Saul reh bagi si enggo kubegi? TUHAN, Dibata Israel, alu merendeh dingen meseksek mindo aku man bandu aloi min aku!”
Ngaloi TUHAN nina, “Reh nge ia.”
12“Janah idudurken penduduk Kehila enda kin pagi aku ras temanku man Saul?” nina ka Daud mulihken nungkun.
“Idudurkenna,” nina TUHAN ngaloi.
13E maka Daud ras temanna kira-kira 600 kalak kerina minter nadingken Kehila janah terus ia pindah-pindah. Kenca ibegi Saul maka Daud enggo lompat i Kehila nari, la surung iserangna kuta e.
Daud i deleng-deleng
14Daud cebuni i deleng-deleng, i bas taneh si mesawang deher Sip. Lalap idarami Saul ia, tapi la iendesken Dibata si Daud man Saul. 15Ieteh Daud maka ibunuh Saul atena ia.
Daud sangana i Hores, i taneh mesawang deherken Sip. 16Idahi Jonatan ia ku je janah ipetetapna ukurna alu pengarapen kerna pengkawali Dibata. 17Nina Jonatan man bana, “Ola kam mbiar. Bapangku Saul labo ngasup nehken si jahat man bandu. Ietehna tuhu-tuhu maka kam me pagi jadi raja Israel janah maka aku me teruhenndu.” 18Jenari duana ia ngiket perpadanen i lebe-lebe TUHAN. Daud ringan i Hores, janah Jonatan mulih ka ku rumahna. #1Sam 18:3
19Piga-piga kalak anak kuta Sip lawes ndahi Saul i Gibea janah nina man bana, “Daud sangana cebuni i daerah kami i Hores i Deleng Hakila, arah Selatan taneh mesawang Juda. #Msm 54:2 20Iteh kami o Raja, kuga rincuhna ukurndu nangkap ia, e maka rehlah kam ku daerah kami, janah iusahaken kami tuhu-tuhu maka itangkapndu ia.”
21Ngaloi Saul nina, “TUHANlah si masu-masu kam sabap bage ulina kam man bangku! 22Tolah mulih pepayo sekali nari; pepayo tuhu-tuhu i ja ia janah ise si enggo ngidahsa i je. Sabap enggo kubegi maka ia cerdik tuhu-tuhu. 23Pepayo pagi i ja kin situhuna inganna cebuni, janah minter laporken man bangku mulihken. Kenca bage banci aku lawes ras kam, janah adi i bas daerah e denga ia la banci la kudarami ia seh dat aminna gia arus isiar kerina taneh Juda.”
24E maka berkat kalak ndai mulih ku Sip leben asa Saul. Daud ras teman-temanna sangana i taneh mesawang Maon, i bas sada berneh si la iingani, i bas bagin Selatan taneh mesawang Juda. 25Berkat Saul ras tenterana ndarami Daud, tapi ibegi Daud kerna si e, e maka lawes ia ku uruk si erbatu-batu i taneh mesawang Maon, janah i je ia tading. Kenca ibegi Saul kerna si enda, iayakina Daud ku je. 26Saul ras tenterana arah lepar ah janah Daud ras teman-temanna arah lepar enda, duana ia isirangken uruk ndai. Pedas-pedas ia kerina lawes nadingken Saul ras tenterana, sabap enggo mulai ia ikepung, janah nandangi itangkap kalak ndai me ia. 27Rembang tupung e reh sekalak persuruhen nina man Saul, “Minterlah kam mulih! Enggo iserbu bangsa Pilisti negerinta!” 28E maka ingadiken Saul ngayak-ngayak Daud janah lawes ia merang bangsa Pilisti. Em sabapna maka uruk e igelari persirang-sirangen. 29Daud pe lawes, cebuni i daerah Enggedi.
Currently Selected:
1 SAMUEL 23: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
