1 SAMUEL 21
21
Daud lompat i bas Saul nari
1Lawes Daud ndahi Imam Ahimelek i Nop. Alu nggirgir reh Ahimelek ndarat njumpai ia janahna nungkun, “Engkai maka si sada ngenca kam reh ku jenda?” #Mat 12:3-4; Mrk 2:25-26; Luk 6:3
2“Aku reh ku jenda bekas persuruhen raja,” nina Daud ngaloi. “Ikatakenna man bangku maka ola kupebetehken man ise pe kai si isuruhna kudahiken. Adi kerna temanku enggo kukataken man bana kerina gelah ijumpaina aku i bas sada ingan. 3Genduari dage, kai lit si man pangan i bas kam? Berekenlah man bangku lima ngkibul roti ntah kai gia si deban si lit i bas kam.”
4Nina imam ndai, “La lit i bas aku roti si biasa tapi roti si badia ngenca lit; banci man bandu e adi temanndu ndai la mbaru ersada kula ras diberu.”
5“Tentu saja lang,” nina Daud erjabap. “Teman-temanku tetap njaga dirina rusur bersih rikutken aturen agama aminna gia kami ndarat i bas tugas biasa; apai ka sekali enda kami i bas tugas khusus!”
6E maka ibereken imam e man Daud roti si badia e, sabap roti si ipersembahken man Dibata e ngenca lit i bas ia, si enggo ipindahken i bas meja si badia nari janah igantiken alu roti si mbaru. #Im 24:5-9
( 7Doek, kalak Edom pengulu permakan Saul rembang sangana i je i bas wari e sabap arus isehkenna sada dahin agama.)
8Nina Daud man Ahimelek, “Lit i bas kam lembing ntah pedang si banci ibereken man bangku? Perentah raja erbahanca terpaksa aku pedas-pedas lawes seh maka lanai aku sempat muat pedangku ntah pe senjata si deban.”
9Erjabap Ahimelek nina, “I bas aku lit pedang Goliat, kalak Pilisti si ibunuhndu i Baluren Ela; adah i pudi baju epod ibaluti alu uis. Adi bandu atendu, buatlah; e ngenca senjata si lit i jenda.”
“Enta dage,” nina Daud. “La kap lit pedang si terjilen asa e i japa pe!” #1Sam 17:51
10E maka lawes Daud lompat i bas Saul nari, ndahi Raja Akis, i Gat. 11Nina pegawai raja man Akis “La kin enda Daud, raja negerina? Enda me kalakna si iende-endeken diberu-diberu janahna landek-landek, ‘Ibunuh Saul meribu-ribu, tapi Daud munuh erpuluh-puluh ribu.’ ” #1Sam 18:7; 29:5
12Mbages kal ertina kata enda ndai i bas Daud, janah erkite-kiteken si e mbiar kal ia man Akis raja Gat ndai. #Msm 56:1 13E maka adi i lebe-lebe kalak ndai, ipekulah-kulahna jajat ukurna janah adi icubaken kalak ndai pesinik ia, minter ibahanna langkahna bagi kalak mehado; isurat-suratina pintun gerbang janah ipelepasna tehtehna nehtehen ku janggutna. #Msm 34:1 14E maka nina Akis man pegawaina, “Nehenlah! Adon kap ia! Engkai maka ibabandu man bangku? 15Kurang kin i bas aku kalak adon? Engkai maka ibabandu ka tole erbahanca ngilas kuakap ngidah lagu langkahna si rarat e i rumahku enda?”
Currently Selected:
1 SAMUEL 21: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
