1 SAMUEL 14

Kinirawan Jonatan

1I bas sada wari nina Jonatan man anak perana si maba senjatana, “Ota lawes kita ngepar ku perkemahen kalak Pilisti ah.” Tapi la ikataken Jonatan man Saul, bapana, 2si sanga erkemah i teruh batang galiman i Migron, la ndauh i Gibea nari; lit enem ratus tentera ras ia. 3(Imam si maba epod guna meteh sura-sura TUHAN e me Ahia, anak Ahitup senina Ikabot, anak Pinehas, kempu Eli, imam TUHAN i Silo.) La ieteh kalak ndai maka Jonatan enggo lawes.

4I bas baluren dalan ku Mikmas, si arus ibentasi Jonatan gelah banci seh ku ingan kalak Pilisti erkemah, lit dua batu galang njurjur i bas lingling, sada arah kawes sada arah kemuhen baluren e; sada igelari Boses janah sada nari Sene. 5Sada arah Utara baluren e, ngala ku Mikmas, janah sada arah Selatan, ngala ku Geba.

6Nina Jonatan man anak perana ndai, “Ota ngepar kita ku ingan erkemah bangsa Pilisti si perbegu ah. Mbera-mbera TUHAN nampati kita kari. Adi bage, la lit kai pe si banci ngambati IA mereken kemenangen man banta aminna gia la kita nterem.”

7Nina anak perana ndai ngaloi, “Kai pe atendu ibahanndu, aku tetap ras kam.”

8“Merandal,” nina Jonatan. “Lawes kita ngepar janah si pediat idah kalak Pilisti kita. 9Adi isuruhna kita nimai ia e maka ngadi kita i bas inganta. 10Tapi adi isuruh kita lawes ndahi ia e maka berkat kita, sabap e me tandana maka TUHAN enggo mereken kemenangen man banta ngelawan ia.”

11E maka ipelepasna bana idah bangsa Pilisti jenari nina bangsa e, “Nehenlah! Piga-piga kalak Heber ndarat i bas lubang inganna cebuni nari!” 12Jenari erlebuh ia man Jonatan ras man anak perana e nina, “Mari ku jenda! Lit si man katanken kami man bandu!”

Ikataken Jonatan man anak perana ndai nina, “Ikutken aku. TUHAN enggo mereken kemenangen man Israel ngelawan kalak ah.” 13Nangkeng Jonatan i bas baluren e nari cirawis-cirawis ku das, janah anak perana ndai ngikut arah pudina. Iserang Jonatan kalak Pilisti, idampeskenna ku taneh, jenari reh anak perana ndai munuhisa arah pudi. 14I bas serangen si pemena e saja lit ibunuh Jonatan ras anak perana ndai kira-kira duapuluh kalak i bas ingan si belangna kira-kira seperempat hektar. 15Kerina kalak Pilisti i bas mbalmbal e lanai kal langlang biarna; pasukan si merang bage pe tentera si lit i bas kemah nggirgir perban biarna. Taneh pe mundu-undu, e maka bene kal ukurna.

Kalak Pilisti italuken

16Tentera Saul si erjaga i Gibea i daerah Benyamin ngidah kalak Pilisti kiamen lanai erturi-turin. 17E maka nina Saul man tenterana, “Beligai tentera e kerina jenari pepayo ise si lanai i je.” Minter bage ibahanna janah tereteh man bana maka Jonatan ras anak perana si maba senjatana lanai i je. 18“Baba epod ena ku jenda,” nina Saul man Imam Ahia. (I bas wari e Ahia maba epod e i lebe-lebe bangsa Israel.) 19Asum Saul sangana ngerana denga ras imam e, i bas ingan erkemah kalak Pilisti si enggo guntar e, erdekahna ergejekna, e maka nina Saul man bana, “Lanai sempat nungkun TUHAN!” 20Kenca bage lawes ia ras tenterana ku peperangen ngelawan bangsa Pilisti, si enggo si tampulen sapih-sapih ia perban bage enggo guntarna. 21Piga-piga kalak Heber si gelgel nari arah pihak kalak Pilisti janah si enggo lawes ku bas ingan erkemah e ras ia, genduari enggo ka erbalik mulihken ukurna jenari ersada ia ras Saul ras Jonatan. 22Si debanna, si mbarenda enggo cebuni i uruk-uruk Eperaim, megi maka kalak Pilisti sangana kiamen, e maka ia pe kerina reh nggabungken bana jenari iserangna kalak Pilisti. 23Pertempuren e terus ngepari Bet-Awen. TUHAN ngkelini Israel i bas wari e.

Kejadin-kejadin kenca perang e

24I bas wari e enggo kote kalak Israel perban lihena, sabap Saul alu ersumpah enggo mereken perentah nina, “Sendah, ise saja kalak si man kai gia ope denga aku erbalas man musuhku la banci lang kena sumpah.” E maka la lit ise pe si man kai pe gedang-gedang wari e. 25E maka seh me ia kerina i bas sada kerangen janah melala i je tengguli. 26Tuhu melala tengguli i bas kerangen ndai, tapi ise pe la lit si manca sabap mbiar ia kerina kena sumpah Saul. 27Tapi la ibegi Jonatan bapana erbahan larangen man bangsa e alu sumpah, e maka ijukjukna alu ciken si ibabana, igedapkenna ujungna ku asar wani jenari ipanna tengguli ndai. Minter ergegehna akapna. 28Tapi sekalak i bas ia nari ngataken, “Kerina nge kita kote perban lihena, tapi ilarang bapandu kami nina, ‘Ise si man kai gia sendah la banci lang kena sumpah.’ ”

29Ngaloi Jonatan nina, “Bene me bangsanta erkite-kiteken perbahanen bapangku. Nehenlah kuga senangna dagingku kenca enggo kupan tengguli enda ndai sitik! 30Ndauhkal min ndai ulin bangsanta ipelepas man nakan si ibuatna i bas musuh si italuken e. Nterem denga min ndai kalak Pilisti si banci ibunuhna!”

31I bas wari e talu bangsa Pilisti ibahan bangsa Israel, iperangna mulai i Mikmas nari seh ku Ayalon. Tupung e kalak Israel seh kal kotena perban lihena. 32E maka kurang pedas akapna muati barang-barang rampasen i bas musuh e nari; ibuatna biri-biri ras lembu, minter igelehna i je, jenari ipanna dagingna ras dareh si lit denga i bas daging e. 33Ituriken kalak man Saul, “Nehenlah, bangsa e enggo erdosa man TUHAN sabap ipanna daging ras darehna.”

Isergangi Saul kalak ndai nina, “Penghianat kam! Gulingken sada batu si galang ku jenda man bangku.” #Kej 9:4; Im 7:26-27; 17:10-14; 19:26; Ul 12:16,23; 15:23 34Kenca bage iperentahkenna ka tole, “Laweslah ku tengah-tengah kerina bangsa e jenari kataken man bana kerina maba lembu ras biri-birina ku jenda. Arus igelehna jenari ipanna i jenda; la banci ia erdosa man TUHAN erkite-kiteken man daging ras dareh.” E maka i bas berngi e kerina ia maba lembuna jenari igelehna i je. 35Ipajekken Saul sada batar-batar man TUHAN, janah e me si pemena ipajekkenna.

36Nina Saul man tenterana, “Ota kita ku berneh gelah siserang bangsa Pilisti enggo kenca berngi, sirampasi barangna seh siang erpagi-pagi, jenari sibunuh ia kerina.”

“Bahanlah kai iakapndu si mehulina,” nina kalak ndai ngaloi.

Tapi nina imam, “Marilah sisungkun lebe Dibata.”

37E maka isungkun Saul me Dibata nina, “Banci ka nge kuserang kalak Pilisti? IberekenNdu nge man kami kemenangen?” Tapi la ijabap Dibata i bas wari e. 38Kenca bage ikataken Saul man peminpin bangsa e nina, “Marilah ku jenda jenari cubaken pepayo dosa kai si enggo ilakoken sendah. 39Erpadan aku i bas TUHAN si nggeluh si mereken kemenangen man Israel, maka kalak si ersalah la banci la ibunuh aminna gia ia anakku Jonatan.” Tapi ise pe la lit si pang ngerana. 40Kenca bage nina Saul man bana kerina, “Kam kerina tedis arah ah, janah Jonatan ras aku tedis arah enda.”

“Bahanlah kai akapndu mehuli,” nina kalak ndai ngaloi.

41Nina Saul man TUHAN, Dibata Israel, “TUHAN, ngkai maka la ialoiNdu penungkunenku wari enda? TUHAN, Dibata Israel, aloilah aku arah batu si badia e. Adi kesalahen e kesalahen Jonatan ntah kesalahenku, jabaplah alu Urim, tapi adi kesalahen e kesalahen bangsaNdu Israel, jabaplah alu Tumim.” Jabapna ngataken Jonatan ras Saul si ersalah, e maka bangsa e enggo terang la ersalah. #Bil 27:21; 1Sam 28:6 42Kenca bage nina Saul, “Tentukenlah, anakku Jonatan ntah aku.” E maka Jonatan me si ituduhken. 43Jenari nungkun Saul man Jonatan nina, “Kai enggo ibahanndu?”

Erjabap Jonatan nina, “Enggo kupan sitik tengguli. Kuendesken diringku, aku enggo pang mate.”

44Nina Saul man bana, “Dibata gia si ngukum aku mate adi la kam kari ibunuh!”

45Tapi nina bangsa e man Saul, “Arus kin Jonatan ibunuh? Adi enggo idatsa kemenangen si mbelin man bangsa Israel? Lang! Erpadan kami i bas TUHAN si nggeluh maka bukna selambar pe la banci naktak i bas takalna nari. Kai si enggo ibahanna sendah e me arah penampat Dibata.” Bage me Jonatan itebusi bangsa e maka la ibunuh.

46Kenca si e, ingadiken Saul ngayak-ngayak bangsa Pilisti, jenari mulih bangsa Pilisti ku daerahna.

Kerajan Saul ras keluargana

47Kenca Saul jadi raja i taneh Israel iperangna kerina musuh-musuh i japa pe: bangsa Moap, Amon, ras Edom, raja-raja Soba, ras Pilisti. I japa pe ia erperang, ia tetap menang. 48I bas peperangen icidahkenna maka ia kalak merawa janah kalak Amalek pe ngasup ia nalukenca. Iselamatkenna bangsa Israel i bas kerina serangen nari.

49Anak Saul si dilaki e me Jonatan, Iswi, ras Milkisua. Gelar anakna si diberu sintua e me Merap, janah si peduaken Mihal. 50Gelar ndeharana Ahinoam, anak Ahimas; puanglima tenterana seninana sembuyak bapa, Abner, anak Ner. 51Bapa Saul e me Kis janah bapa Abner e me Ner, duana anak Abiel.

52Kidekah nggeluh Saul terpaksa erperang alu mesangat ras kalak Pilisti. E maka adi jumpa ia ras kalak si mbisa ntah merawa, minter ijadikenna jadi tenterana.

Currently Selected:

1 SAMUEL 14: BTX

Highlight

Copy