1 SAMUEL 12
12
Pidato perpisahen Samuel
1Kenca bage ikataken Samuel man bangsa kerina Israel nina, “Enggo kulakoken kai si ipindondu man bangku. Enggo kubereken man bandu raja si merentah kam, 2janah genduari ia si minpin kam. Tapi aku enggo metua janah ubanen janah anak-anakku enggo ras kam. Aku enggo jadi peminpin mulai kin sanga aku nguda denga seh genduari. 3Enda kap aku. Adi lit kin kubahan si salah, adukenlah aku genduari i lebe-lebe TUHAN ras raja si enggo ipilihNa. Lit kin enggo kubuat lembu ntah kelede kalak? Lit kin enggo kalak kutipu ntah kupaksa? Lit kin enggo kualoken sogok i bas ise nari gia? Adi lit kin enggo kulakoken apai gia i bas si enda nari, kugalari mulihken kai si enggo kubuat.”
4Nina bangsa njabapsa, “Lang, labo pernah kami itipundu ntah ipaksandu. Labo pernah ibuatndu kai pe i bas ise nari.”
5E maka nina Samuel ka ngaloi, “TUHAN ras raja si enggo ipilihNa jadi saksi sendah maka sitik pe la lit idatndu kesalahen i bas aku.”
“Ue, TUHAN jadi saksi,” nina kalak njabapsa.
6Iterusken Samuel ngerana nina, “TUHAN kap si milih Musa ras Harun ras maba nini-ninindu ndarat i Mesir nari. #Kel 6:26 7Genduari tedislah kam i bas inganndu sekalak-sekalak kerna perbahanen si mbelin si ilakoken TUHAN guna engkelini kam ras nini-ninindu. 8Kenca Jakup ras keluargana lawes ku Mesir janah kalak Mesir maksa ia kerina, nini-ninindu nderkuh mindo penampat man TUHAN, jenari isuruhNa Musa ras Harun maba ia ndarat i Mesir nari jenari itamakenNa ia ringan i bas taneh enda. #Kel 2:23 9Tapi bangsa e ngelupaken TUHAN Dibatanta, e maka ipelepasNa kalak Pilisti ras raja Moap bage pe Sisera, puanglima tentera kuta Hasor erperang ngelawan nini-ninindu jenari italuken. #Hak 3:12; 4:2; 13:1 10Kenca si e nderkuh ia mindo penampat man TUHAN janah nina, ‘Kami enggo erdosa perban nilah kami i bas Kam nari, TUHAN, janah nembah man gana-gana Baal ras Astarte. Kelinilah i bas musuh-musuh kami nari gelah kami nembah man baNdu!’ #Hak 10:10-15 11E maka isuruh TUHAN me Gideon, kenca bage Barak, jenari Jepta, janah kedungenna aku. Sekalak-sekalak kami engkelini kam i bas musuh-musuhndu nari, e maka aman kam nggeluh. #Hak 4:6; 7:1; 11:29; 1Sam 3:20 12Tapi asum idahndu maka Nahas, raja Amon nandangi merang kam, itulakndu TUHAN jadi rajandu jenari ikatakenndu man bangku, ‘Raja nge ate kami si merentah kami.’ #1Sam 8:19
13Genduari enda me raja si ipilihndu; ipindondu ia, janah genduari enggo ibereken TUHAN ia man bandu. 14Kerina pagi erdalan alu mehuli adi ipehagandu TUHAN Dibatandu, isembahndu IA, ibegikenndu kataNa, ras ipatuhindu kerina pedahNa, bage pe adi kam ras rajandu ngikutken IA. 15Tapi adi la ibegikenndu TUHAN janah la ipatuhindu pedahNa, la banci la ilawanNa kam ras rajandu. 16Dage, tedislah kam i bas inganndu sekalak-sekalak, gelah idahndu kejadin si mbelin si ibahan TUHAN ateNa. 17Ma musim perlego kin genduari? Tapi ertoto ateku maka ibereken TUHAN lenggur ras udan. Adi jadi si enda ngaku me kam maka enggo ilakokenndu dosa si mbelin man TUHAN asum ipindondu man baNa sekalak raja.”
18E maka ertoto Samuel, jenari i bas wari e ka ibereken TUHAN lenggur ras udan. Erkite-kiteken si e kerina bangsa e mbiar man TUHAN ras man Samuel. 19E maka nina man Samuel, “Mindo kal kami gelah ertoto kam man TUHAN Dibatandu kerna kami gelah ola kami mate. Ngaku kami genduari maka kami enggo erdosa kal kerina. Tambah si e enggo ka kami erdosa alu mindo sekalak raja.”
20“Ola kam mbiar,” nina Samuel njabapsa, “Aminna gia enggo ibahanndu perbahanen si jahat e, ola kam nilah i bas TUHAN nari, tapi sembahlah IA alu bulat ukurndu. 21Ola ikutken dibata-dibata si palsu; si e kerina la ngasup nampati kam, sabap labo ia lit. 22Erkiteken gelarNa si mbelin, e maka labo kam itadingkenNa, sabap enggo itetapkenNa kam jadi bangsaNa jine. 23Adi kerna aku, ola min ibere TUHAN aku erdosa man baNa alu lanai ertoto kerna kam. Tapi ateku ngajarken man bandu kai si mehuli ras si benar guna idalankenndu. 24Ikutkenlah TUHAN janah tetaplah sembah IA asa ukurndu. Ingetlah kerina perbahanenNa si mbelin si enggo ilakokenNa man bandu. 25Tapi adi terus kam erdosa, kam ras rajandu la banci la ikernepken.”
Currently Selected:
1 SAMUEL 12: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
