1 RAJA-RAJA 10
10
Ratu negeri Syeba ndahi Salomo
(2Kro 9:1-12)
1Ratu negeri Syeba megi berita kerna kemulian Salomo, jenari reh ia ku Jerusalem nguji-nguji ia alu penungkunen-penungkunen si mesera. #Mat 12:42; Luk 11:31 2Nterem ibabana pelayanna ras suruh-suruhenna, bage pe melala unta si maba rempah-rempah, batu permata, ras emas. Kenca ia jumpa, Salomo isungkunina alu kerina penungkunen si lit i bas ukurna. 3Ijabap Salomo kerinana, la lit sada pe si mesera akapna nerangkenca. 4Ibegi ratu Syeba kepentaren Salomo janah idahna istana si enggo ipajekkenna. 5Iidahna pangan si isikapken i bas mejana, perumahen pegawai-pegawaina, kiniraturen kalak si erdahin i bas istanana ras paken seragam si ipakena kerina, pelayan-pelayan si ngidangi ia man-man, ras persembahen-persembahen gelehen si ipersembahkenna i bas Rumah Pertoton. Kerina si e erbahanca jengang ia. 6Nina man Raja Salomo, “Kai si kubegi i negeringku kerna kam ras kepentarenndu tuhu nge kepe! 7Tapi la terteki aku e seh aku enggo reh janah ngidahsa alu matangku jine. Kepeken kai si kubegi e langa lit setengahna pe. Kepentarenndu ras kebayakenndu ndauh belinen asa si enggo ituriken kalak man bangku. 8Sangap me kerina ndeharandu! Janah sangap me pelayan-pelayanndu si rusur rembak ras kam, si banci megiken kepentarenndu! 9Terpujilah TUHAN, Dibatandu! Enggo icidahkenNa kuga ngena ateNa man bandu alu mahan kam jadi raja Israel. Perban kekelengenNa man Israel la ermasap-masap, enggo ibahanNa kam jadi rajana gelah banci ijagandu maka undang-undang ras keadilen tetap idalanken.”
10Iberekenna man Raja Salomo luah si enggo ibabana: emas lebih empat ribu kilo, rempah-rempah si seh kal buena, ras batu permata. Rempah-rempah si iberekenna ndauh buen asa si enggo pernah ialokenna, janah ndiganai pe lanai pernah bage buena ialokenna.
( 11Kapal-kapal Hiram, si maba emas i Opir nari pe maba kayu cendana ras batu permata. 12Kayu e ipake Salomo jadi bide i bas Rumah Pertoton ras i bas istana, ras erbahan kulcapi ras murdap man perende-ende. Enda denga nge kayu cendana si mehulina si pernah ibaba ku Israel, janah lanai pernah lit bage jilena.)
13Man ratu Syeba ibereken Raja Salomo kai si ipindona, tambah-tambah pemere biasa si debanna si iberekenna alu melumbar. Kenca bage mulih ratu Syeba ras pelayan-pelayan ras suruh-suruhenna ku negeri Syeba.
Kebayaken Raja Salomo
(2Kro 9:13-29)
14Tiap tahun Raja Salomo ngaloken emas menam dua puluh telu ribu kilo, 15tambah-tambah pajak si igalari perbinaga, keuntungen i bas perbinagan nari ras tanggungen raja-raja Arab ras gubernur-gubernur daerah Israel tandana ia takluk man Salomo.
16Salomo erbahan dua ratus ampang-ampang galang, janah lapisina alu emas menam pitu kilo beratna. 17Tole ibahanna pe telu ratus ampang-ampang si terkitiken, janah ibahanna lapisna emas menam dua kilo beratna. Kerina ampang-ampang enda itamakenna i bas “Gedung Kerangen Libanon.”
18Isuruhna pe gelah ibahan sada kursi kinirajan si mbelin. Sada bagin ilapisi alu gading, selebihna ilapisi alu emas murni si mejilena. 19-20Tangga kursi e lit enem tingkat janah i bas ujung tiap tingkat lit gambar singa, sepuluh dua kerina. Arah pudi kursi e lit gambar takal jenggi lembu, janah arah kawes ras kemuhen deherken ingan encibalken tan lit gana-gana singa. I bas kerajan apai pe la pernah lit kursi kinirajan si bage tempasna.
21Kerina cangkir man ingan minem Salomo ibahan i bas emas nari, janah si lit i bas “Gedung Kerangen Libanon” kerina emas murni. Pirak la lit ipake, sabap i bas jaman Salomo, pirak la iakap meherga. 22Kapalna lit i bas lawit erlayar ras kapal-kapal Hiram. Telu tahun sekali mulih kapal e, maba emas, pirak, gading, bengkala ras kera.
23Raja Salomo bayaken ras pentaren asa raja-raja si apai pe, 24janah kerina doni enda merincuh reh megiken kepentaren si enggo ibereken Dibata man bana. 25Kerina kalak si reh, maba luah man bana: barang pirak ras emas, baju jubah, senjata-senjata, rempah-rempah, kuda ras kelede. Si enda terus erdalan i bas tahun ku tahun.
26Ipegegehi Salomo tenterana, alu pepulung seribu empat ratus gereta perang ras sepuluh dua ribu kuda perang. Deba ibahanna inganna i Jerusalem janah selebihna itamakenna i bas kuta-kuta si deban. #1Raj 4:26 27I bas masa pemerentahenna, pirak enggo soal biasa iakap kalak Jerusalem bali ras batu, janah kayu pinus si merim bali buena ras batang kayu ara biasa. #Ul 17:17 28Agen-agen raja nukuri kuda i Musri ras Kilikia nari, #Ul 17:16 29janah gereta perang i Mesir nari. Jenari kuda ras gereta perang e idayakenna man raja-raja Heti ras Siria; erga sada gereta perang 600 duit pirak janah erga kuda 150 duit pirak.
Currently Selected:
1 RAJA-RAJA 10: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
